ខេត្តបាត់ដំបង ៖ បុរស២នាក់ និងស្ត្រីម្នាក់ដែលគេសង្ស័យថា ជា«ចោរ» ត្រូវសមត្ថកិច្ចតាមប្រមាញ់ស្ទាក់ចាប់បានភ្លាមៗ បន្ទាប់ពីពួកគេសមគំនិតគ្នាលួចយករថយន្តកាមរីមួយគ្រឿង កាលពីវេលាម៉ោង៨ និង៤០នាទីព្រឹកថ្ងៃទី១ កុម្ភៈ ២០១៣ ខណៈម្ចាស់ធ្វេសប្រហែសចតចោលមិនដកសោនៅលើផ្លូវខាងមុខផ្ទះ ក្នុងភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ។
លោកមៀន ឡាយ ប្រធានការិយាល័យព្រហ្មទណ្ឌកម្រិតស្រាលបានឱ្យដឹងថា រថយន្តដែលត្រូវចោរលួចនោះម៉ាកកាមរីចង្កូតឆ្វេង ពណ៌ប្រផេះ ស៊េរីឆ្នាំ៩៣ ពាក់ស្លាកលេខបាត់ដំបង 2A 1661 ម្ចាស់ឈ្មោះគុជ ជ ភេទប្រុស អាយុ៦៨ឆ្នាំ ជាមន្ត្រីយោធាចូលនិវត្ត ។ រីឯជនសង្ស័យទាំង៣នាក់ ដែលត្រូវឃាត់ខ្លួន១-ឈ្មោះណាម ប៊ុនថង ភេទប្រុស អាយុ៣៣ឆ្នាំ ជាអ្នកបើក ២-ឈ្មោះសុខ ស្រីឃីម ជាអ្នកសមគំនិត និងជាប្រពន្ធរបស់ឈ្មោះប៊ុន ថង រស់នៅភូមិព្រែកអម្ពរ ឃុំអណ្តើកហែប ស្រុករតនមណ្ឌល និង៣- ឈ្មោះផាម មិនវឹង ភេទប្រុស អាយុ៣៦ឆ្នាំ ជាមេផ្តើមគំនិតនៅភូមិពាលញែក១ ឃុំផ្ទះព្រៃ ស្រុកសំពៅមាស ខេត្តពោធិ៍សាត់ ប៉ុន្តែបានស្នាក់នៅបណ្តោះអាសន្នជាមួយប្តីប្រពន្ធខាងលើ ដើម្បីងាយស្រួលនាំគ្នា ដើរប្រពឹត្តបទល្មើស ។
លោកមៀន ឡាយ បញ្ជាក់ថា ឈ្មោះប៊ុនថង ជាអ្នកចូលបើករថយន្តនោះ រីឯស្ត្រីឈ្មោះឃីម និងឈ្មោះមិន វឹង ជាអ្នកជិះម៉ូតូតាមក្រោយ ។ ប៉ុន្តែ ត្រូវសមត្ថកិច្ចតាមស្ទាក់ចាប់បានភ្លាមៗ លើកំណាត់ផ្លូវជាតិ៥៧ ក្នុងភូមិអណ្តូងព្រីង សង្កាត់អូរម៉ាល់ ក្រុង បាត់ដំបង ក្នុងគ្រាដែលក្រុមនេះ ព្យាយាមបើកគេចទៅកាន់ផ្ទះរបស់ខ្លួននៅឯស្រុករតនមណ្ឌល៕
ចែករំលែកព័តមាននេះ