រាជធានីភ្នំពេញ ៖ ព្រះសង្ឃគង់នៅសាលាបុណ្យពន្លឺសាមគ្គីបានផ្តល់អំណោយជាគ្រឿងឧបភោគបរិភោគ និងបច្ច័យមួយចំនួនដល់សមាគមនារីកម្ពុជាដើម្បីសន្តិភាព និងអភិវឌ្ឍន៍ខណ្ឌទួលគោគ ដើម្បីចូលរួមចំណែកជួយដល់ការងារផ្នែកមនុស្សធម៌។ ពិធីប្រគល់និងទទួលអំណោយនេះបានរៀបចំឡើងកាលពីរសៀលថ្ងៃទី១៥ ខែតុលា នៅសាលាបុណ្យពន្លឺសាមគ្គីស្ថិតនៅតាមផ្លូវលេខ២៣០ សង្កាត់ផ្សារដើមគ ខណ្ឌទួលគោគ ដោយមានការអញ្ជើញទៅទទួលអំណោយដោយផ្ទាល់ពីសំណាក់លោកស្រីនួន មុនីរតនា ប្រធានសមាគមនារីកម្ពុជា ដើម្បីសន្តិភាពនិងអភិវឌ្ឍន៍ខណ្ឌទួលគោក ព្រមទាំងមានការចូលរួមពីសមាជិក-សមាជិកាសមាគមយ៉ាងច្រើនកុះករ។
អំណោយដែលបានផ្តល់ជូនសមាគមនារីសំរាប់យកទៅចែកជូនគ្រួសារក្រីក្រ និងរងគ្រោះនៅក្នុងឱកាសនោះរួមមាន អង្ករចំនួន៣បាវ ទឹកស៊ីអ៊ីវ៥យួរ ទឹកត្រី៥យួរ ចានស្រាក់១៥សំរាប់ មី២០០កញ្ចប់ ទឹកដោះគោ១០០កំប៉ុង ស្ករស១០០កញ្ចប់ តែ១០០កញ្ចប់ និងថវិកាចំនួន៥០ម៉ឺនរៀល។ លោកស្រីនួន មុនីរតនា ប្រធានសមាគមនារីខណ្ឌទួលគោក បានឱ្យដឹងថា អំណោយទាំងនេះមានសារសំខាន់ណាស់សំរាប់ជួយដល់ប្រជាពលរដ្ឋទីទ័លក្រ និងជនរងគ្រោះនៅក្នុងសង្កាត់ទាំង១០ នៃខណ្ឌទួលគោកទាំងមូល។
ក្នុងនាមសមាគមនារីខណ្ឌទួលគោកសូមថ្លែងអំណរព្រះគុណដល់ព្រះសង្ឃគង់នៅសាលាបុណ្យពន្លឺសាមគ្គីទាំងអស់ ព្រមទាំងអាជ្ញាធរសង្កាត់ផ្សារដើមគ ដែលបានផ្តល់អំណោយមកឱ្យសាមាគមនារីដើម្បីនាំយកទៅចែកជូនដល់ជនរងគ្រោះបន្តទៀត។ លោកស្រីនួន មុនីរតនា បានបន្តទៀតថា ចាប់ពីសមាគមនារីខណ្ឌទួលគោកបង្កើតឡើងរយៈពេលជាង១ឆ្នាំនេះ លោកស្រីបានខិតខំយ៉ាងខ្លាំងក្នុងការបំផុសចលនាសប្បុរសជនក៏ដូចជានៅតាមវត្តនានាដើម្បីស្វែងរកអំណោយមកចែកជូនប្រជាពលរដ្ឋទីទ័លក្រ ចាស់ជរា និងអ្នកមានជំងឺផ្សេងៗ៕
ចែករំលែកព័តមាននេះ