ខេត្តមណ្ឌលគីរី ៖ រថយន្តកូរ៉េដឹកទំនិញពីរគ្រឿងបានក្រឡាប់ក្នុងថ្ងៃតែមួយ លើបណ្តោយផ្លូវជាតិលេខ៧៦ ក្នុងភូមិពូលុង សង្កាត់រមនា ក្រុងសែនមនោរម្យ ដែលមួយគ្រឿងក្រឡាប់នៅវេលាម៉ោង៧ព្រឹក និងមួយគ្រឿងទៀតនៅវេលាម៉ោង៣រសៀល ចម្ងាយពីគ្នាប្រមាណ១គីឡូម៉ែត្រប៉ុណ្ណោះ ហេតុការណ៍នេះកើតនៅថ្ងៃទី៣០ មេសា ២០១៨នេះ។ ប្រភពបានឲ្យដឹងថា រថយន្តដែលក្រឡាប់នាពេលព្រឹក នៅចំណុចកែងផ្លូវបំបែកប៊ូស្រា ម៉ាកហ៊ីយ៉ាន់ដាយ គ្មានស្លាកលេខ បានក្រឡាប់លើទ្រូងផ្លូវ ឆ្ពោះទៅស្រុកពេជ្រាដា។ ក្នុងគ្រោះថ្នាក់នេះមិនមានបណ្តាលឲ្យមនុស្សណាម្នាក់រងគ្រោះថ្នាក់ឡើយ ក្រោយកើតហេតុម្ចាស់រថយន្តបានអូសយកទៅជួសជុលខ្លួនឯង ដោយមិនមានរំខានដល់សមត្ថកិច្ចឡើយ។
ចំណែកករណីទី២ បានកើតឡើងនៅពេលរសៀល ចំណុចមុខប៉ុស្តិ៍នគរបាលរមនា បង្កដោយរថយន្តពាក់ស្លាកលេខ ភ្នំពេញ ២E-២២៣០ ដាយបានក្រឡាប់ខ្លួនឯង អ្នកបើកបរឈ្មោះ សែ សុភ័ស្ស ភេទប្រុស អាយុ៣០ឆ្នាំ រស់ភូមិព្រែកប៉ាន ឃុំត្រើយស្លា ស្រុកស្អាង ខេត្តកណ្តាល។ បានបើកចេញពីភូមិពូជ្រៃ ឆ្ពោះទៅទីរួមខេត្តមណ្ឌលគិរី ក៏ជួបហេតុការណ៍នេះតែម្តង។ ទោះជាយ៉ាងណាករណីនេះ មិនបានបង្កគ្រោះថ្នាក់ដល់មនុស្សណាម្នាក់ឡើយ គឺខូចខាតតែលូ និងបាក់បង្គោលទ្រីបមួយ ហើយសមត្ថកិច្ចបានទាក់ទងជាមួយមន្ទីរសាធារៈការដើម្បីឲ្យម្ចាស់រថយន្តសងការខូចខាតទ្រព្យសម្បត្តិសាធារណៈ។ គ្រោះថ្នាក់ទាំងពីរករណីនេះ ត្រូវបានគេដឹងថា បណ្តាលមកពីមានភ្លៀងធ្លាក់ច្រើនអស់មួយយប់មួយថ្ងៃ ទើបធ្វើឲ្យអ្នកបើកបរពិបាកមើលផ្លូវដែលពោពេញទៅដោយអ័ព្ទ និងទឹកភ្លៀងយ៉ាងក្រាស់ ទើបមានគ្រោះថ្នាក់បែបនេះ។លោក កាន់ ពេញ អធិការនគរបាលក្រុងសែនមនោរម្យ បានផ្តាំផ្ញើដល់អ្នកបើកបរទាំងឡាយដែលធ្វើដំណើរ តាមបណ្តាផ្លូវនានាក្នុងខេត្តមណ្ឌលគិរី ត្រូវមានស្មារតីប្រុងប្រយ័ត្នឲ្យបានខ្ពស់ ព្រោះផ្លូវតំបន់នេះសម្បូរទៅដោយភ្នំ និងព្រៃឈើអមសងខាង ពិបាកមើលឧបសគ្គនៅខាងមុខ។ ជាពិសេសរដូវនេះមានភ្លៀងញឹកញាប់ ដែលជាហេតុធ្វើឲ្យអ្នកបើកបរពិបាកមើលផ្លូវ ទើបបណ្តាលឲ្យមានគ្រោះថ្នាក់រថយន្តក្រឡាប់ដល់នៅពីរគ្រឿងក្នុងថ្ងៃតែមួយ និងកន្លែងក្បែរគ្នាបែបនេះ៕
ចែករំលែកព័តមាននេះ