រាជធានីភ្នំពេញ ៖ ក្រសួងមហាផ្ទៃបានសម្រេចជាផ្លូវការចុះបញ្ជីគណបក្សនយោបាយថ្មីមួយទៀត ដែលមានឈ្មោះថា «គណបក្សរស្មីខេមរា» ដែលសរសេរកាត់ (គ.រ.ខ) ដែលមានទីស្នាក់ ការកណ្តាល នៅសង្កាត់ចោមចៅទី២…
រាជធានីភ្នំពេញ ៖ ក្រសួងមហាផ្ទៃបានសម្រេចជាផ្លូវការចុះបញ្ជីគណបក្សនយោបាយថ្មីមួយទៀត ដែលមានឈ្មោះថា «គណបក្សរស្មីខេមរា» ដែលសរសេរកាត់ (គ.រ.ខ) ដែលមានទីស្នាក់ ការកណ្តាល នៅសង្កាត់ចោមចៅទី២ ខណ្ឌពោធិ៍សែនជ័យ ដែលនាំឲ្យចំនួនគណបក្សនយោបាយដែលបានចុះបញ្ជី និងទទួលស្គាល់ដោយក្រសួងមហាផ្ទៃកើនឡើងដល់ប្រមាណជា៣៣គណបក្សនយោបាយ ។
យោងតាមប្រកាសមួយរបស់ក្រសួងមហាផ្ទៃ ដែលបានចុះហត្ថលេខាដោយសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ និងចុះថ្ងៃទី៣០ ខែមេសា ឆ្នាំ២០១៨នេះ បានសម្រេចថា ត្រូវបានចុះឈ្មោះគណបក្សរស្មីខេមរា ដែលមានអាសយដ្ឋាននៃទីស្នាក់ការកណ្តាល តាំងនៅផ្លូវលេខ០៨ ភូមិក្រាំងដូនទៃ សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញក្នុង «បញ្ជីគណបក្សនយោបាយ» នៅក្រសួងមហាផ្ទៃ ។
លិខិតដដែលបានបញ្ជាក់ថា ៖ «គណបក្សរស្មីខេមរាត្រូវធ្វើសកម្មភាពស្របតាមច្បាប់ស្តីពីគណបក្សនយោបាយលិខិតបទដ្ឋានគតិយុត្តនានាជាធរមាន និងលក្ខន្តិកៈរបស់គណបក្សដែលបានតម្កល់តុកនៅក្រសួងមហាផ្ទៃ» ។ យ៉ាងណាមិញ គេនៅមិនទាន់ដឹងច្បាស់ថា តើ គណបក្សរស្មីខេមរានឹងសម្រេចចូលរួមប្រកួតប្រជែងការបោះឆ្នោតសភានាថ្ងៃទី២៩ ខែកក្កដា ឆ្នាំ២០១៨ខាងមុខនេះ ឬយ៉ាងណានោះទេ ក៏ប៉ុន្តែគណៈកម្មការជាតិរៀបចំការបោះឆ្នោតចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា ឆ្នាំ២០១៨នេះ ចាប់ផ្តើមទទួលពាក្យពីគណបក្សនយោបាយនានាសម្រាប់ចុះបញ្ជីឈ្មោះបេក្ខជនសម្រាប់ការបោះឆ្នោតខាងមុខផងដែរ ។
វិញការបង្កើតគណបក្សនយោបាយថ្មីៗនេះផងដែរ សម្តេចតេជោ ហ៊ុន សែន នាយករដ្ឋមន្ត្រីកម្ពុជានៅថ្ងៃទី៣០ ខែមេសាបានប្រតិកម្មទៅនឹងការរិះគន់មួយចំនួនរបស់មន្ត្រីបក្សប្រឆាំងក៏ដូចជា មេដឹកនាំបក្សប្រឆាំងដែលតែងតែចោទថា គណបក្សតូចៗ និងបង្កើតថ្មី គឺជាគណបក្ស «អាយ៉ងបក្សកាន់អំណាច» ដើម្បីតែលម្អឆាកបោះឆ្នោតតែប៉ុណ្ណោះ ដែលការចោទប្រកាន់នេះ គឺជាទង្វើមិនបានស៊ីខ្លួន ចង់ឲ្យគេអត់ស៊ីជាមួយខ្លួនដែរ ៕
ចែករំលែកព័តមាននេះ