ទីក្រុងបែរឡាំង ៖ កាលពីថ្ងៃសៅរ៍ អ្នកដឹកនាំអាជីវកម្មក្នុងប្រទេសអាល្លឺម៉ង់បានបង្ហាញពីការខកចិត្ត ព្រោះតែលទ្ធផលនៃកិច្ចចរចារវាងលោកស្រីអធិការបតីអាល្លឺម៉ង់ Angela Merkel និងលោកប្រធានាធិបតីអាមេរិក ដូណាល់ ត្រាំ។ ពួកគេភ័យព្រួយថា លោកត្រាំ អាចនឹងដាក់ពន្ធលើដែកថែប និងអាលុយមីញ៉ូមនាំចូល ។
គួរបញ្ជាក់ថា កាលពីខែមីនា សហរដ្ឋអាមេរិកបានដាក់ពន្ធ២៥%លើដែកថែប និង១០%លើអាលុយមីញ៉ូមនាំចូល ប៉ុន្តែអនុញ្ញាតឲ្យមានការលើកលែងពន្ធបណ្តោះអាសន្ន រហូតដល់ថ្ងៃទី១ ខែឧសភា សម្រាប់សហភាពអឺរ៉ុប។ បន្ទាប់មក លោកត្រាំ នឹងសម្រេចចិត្តថា តើនឹងអនុញ្ញាតឲ្យរួចផុតពីពន្ធនេះជាអចិន្ត្រៃយ៍ឬទេ ។
លោក Dieter Kempf ប្រធានសហព័ន្ធឧស្សាហកម្មអាល្លឺម៉ង់ បាននិយាយថា ៖«ខ្ញុំសោកស្តាយដែលការធ្វើទស្សនកិច្ចរបស់លោកស្រីអធិការបតី ទៅកាន់សហរដ្ឋអាមេរិកមិនបានផ្តល់លទ្ធផលផ្លែផ្កាដល់បញ្ហារវាងប្រទេសអាល្លឺម៉ង់ និងសហរដ្ឋអាមេរិក » ។
កាលពីថ្ងៃសុក្រ លោកស្រី Merkel និងលោកត្រាំ បានបង្ហាញពីការខ្វែងគំនិតគ្នាទាក់ទងនឹងការធ្វើពាណិជ្ជកម្ម និង NATO ក្នុងអំឡុងពេលកិច្ចប្រជុំនៅ White House ខណៈពួកគេព្យាយាមបង្ហាញពីមិត្តភាព ។
នៅក្នុងសន្និសីទកាសែតមួយ លោកត្រាំ បានលើកឡើងពីឱនភាពពាណិជ្ជកម្មរបស់សហរដ្ឋអាមេរិកជាមួយសហភាពអឺរ៉ុប ។ លោកស្រី Merkel បាននិយាយដែរថា រាល់ការសម្រេចចិត្តលើការអនុញ្ញាតឲ្យរួចផុតពីពន្ធដោយអចិន្ត្រៃយ៍ គឺស្ថិតក្នុងដៃរបស់លោកប្រធានាធិបតី ។
ប្រធានាធិបតីប្រទេសបារាំង លោក Emmanuel Macron ក៏បានដាក់សម្ពាធទៅលើលោកត្រាំ ផងដែរ ក្នុងអំឡុងពេលលោកធ្វើទស្សនកិច្ចទៅកាន់សហរដ្ឋអាមេរិក ។ ប៉ុន្តែអ្នកដឹកនាំទាំងពីររូបនេះហាក់មិនទាន់អាចបញ្ចុះបញ្ចូលលោកត្រាំ ឲ្យលើកលែងការដាក់ពន្ធលើសហភាពអឺរ៉ុបបាននៅឡើយទេ ៕
ចែករំលែកព័តមាននេះ