រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា ការបោះឆ្នោតជាតិឆ្នាំ២០១៨ នឹងគ្មានការពន្យាពេលនោះទេ ហើយចំពោះមនុស្សរបស់អតីតគណបក្សប្រឆាំងដែលលើកឡើងថា…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានបញ្ជាក់ជាថ្មីម្តងទៀតថា ការបោះឆ្នោតជាតិឆ្នាំ២០១៨ នឹងគ្មានការពន្យាពេលនោះទេ ហើយចំពោះមនុស្សរបស់អតីតគណបក្សប្រឆាំងដែលលើកឡើងថា អន្តរជាតិនឹងចាប់ខ្លួនសម្តេច បើមិនព្រមពន្យាការបោះឆ្នោតនោះ គឺជារឿងមិនអាចទៅរួចនោះទេ ។
ថ្លែងនាឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រដល់និស្សិតនៃសាកលវិទ្យាល័យធនធានមនុស្ស នៅវិទ្យាស្ថានជាតិអប់រំ រាជធានីភ្នំពេញព្រឹកថ្ងៃទី៣០ ខែមេសា ឆ្នាំ២០១៨ នេះសម្តេចតេជោបានបញ្ជាក់ថា ចាប់ពីថ្ងៃនេះ (ថ្ងៃទី៣០ ខែមេសា ឆ្នាំ២០១៨) គឺជាថ្ងៃចាប់ផ្តើមចុះឈ្មោះបេក្ខជនសម្រាប់ឈរឈ្មោះបោះឆ្នោតអណ្ណតិ្តទី៦ ដែលការចុះបញ្ជីគណបក្សនយោបាយ និងចុះឈ្មោះបេក្ខជនសម្រាប់ឈរឈ្មោះបោះឆ្នោត មានរយៈពេល១៥ ថ្ងៃ ដូច្នេះវាពិតជាយឺតពេលសម្រាប់អតីតគណបក្សសង្គ្រោះជាតិ ព្រោះកុំសង្ឃឹមថា នឹងរស់រានមានជីវិតម្តងទៀតឲ្យសោះ ។
សម្តេចតេជោ ហ៊ុន សែន មានប្រសាសន៍បញ្ជាក់ថា ៖ «អញ្ចឹងទេខ្មោចដែលវាងាប់ គេយកទៅដុតកប់មិនដឹងឆ្អឹងនៅឯណា វាមិនរស់ឡើងវិញទេ ។ វាមានតែអ្នកដែលបក្សនយោបាយពិតប្រាកដប៉ុណ្ណោះដែលអាចឈរឈ្មោះបោះឆ្នោតពិតប្រាកដនោះ ។ អញ្ចឹងស-ខ្មៅ វាបានឃើញហើយ […] អ្នកដែលមិនជឿ [ហើយ] អ្នកជឿ ជឿងងប់ រហូតដល់មានអ្នកខ្លះគេថា បើលោក ហ៊ុន សែនមិនព្រមធ្វើមិនព្រមពន្យា (ការបោះឆ្នោត) ទេ ច្បាស់ជាគេចាប់លោក ហ៊ុន សែន ។ ខ្ញុំសួរថា ៖ «អាណាក្បាលប៉ានដែក មកចាប់ក្បាលហ៊ុន សែន នោះ ។ ប្រាប់ត្រង់ត្រឡប់ទៅវិញទៅ គេថា គេចាប់ ហ៊ុន សែន ។
នាយករដ្ឋមន្ត្រីនៃរដ្ឋអធិបតេយ្យមួយត្រូវគេចូលមកចាប់ខ្លួននៅទីនេះ ។ ល៎មើល អញ្ជើញមក ក្រែងលោពិបាករកខ្មោចទៀត មកពីត្រង់ណា0x017d7» ។ សម្តេចតេជោបានផ្ញើសារតបទៅវិញថា បើអ្នកណាហ៊ានតែរំលោភអធិបតេយ្យរបស់កម្ពុជា គឺនាយករដ្ឋមន្ត្រីមានសិទ្ធគ្រប់គ្រាន់ក្នុងការបញ្ជារទ័ព ។ សម្តេចបានបញ្ជាក់យ៉ាងដូច្នេះថា ៖ «កុំភ្លេច! ខ្ញុំមិនមែនជាអគ្គបញ្ជារការទ័ពទេ ក៏ប៉ុន្តែខ្ញុំមានសិទ្ធបញ្ជាវ៉ៃគ្រប់ពេលទាំងអស់ ក្នុងឋានៈជានាយករដ្ឋមន្ត្រី ហើយមានកម្លាំងពិត ដើម្បីវ៉ៃសូមជម្រាបជូនអ្នកឯងឲ្យច្បាស់» ។
ប្រមុខដឹកនាំរាជរដ្ឋាភិបាលកម្ពុជាមិនដែលខកខាន ឬពន្យាការបោះឆ្នោតនោះទេ អ្នកដែលមិនបានចូលរួម គឺអ្នកបានប្រព្រឹត្តកំហុស តែប៉ុណ្ណោះ កម្ពុជាមិនដែលបោះបង់ការបោះឆ្នោត ពន្យាការបោះឆ្នោតព្រោះ ខុសនឹងរដ្ឋធម្មនុញ្ញ អញ្ចឹងទាល់តែកែរដ្ឋធម្មនុញ្ញ ដែលទាមទារនូវសម្លេង ២/៣ ។ តែការពន្យាពេល គឺមិនអាចនោះទេ ព្រោះឥឡូវគ្រប់យ៉ាងចូលដល់ដៃ គណៈកម្មាធិការជាតិរៀបចំការបោះឆ្នោត (គជប) ហើយ យើងគ្មានសិទ្ធប៉ះពាល់ទេ យើងជាបក្សនយោបាយមួយ យើងត្រូវអនុវត្តតាមគជប ដែលជាអង្គការឯករាជ្យមួយសម្រាប់ការបោះឆ្នោត ។ អញ្ចឹងល្បែងប្រជាធិបតេយ្យនៅកម្ពុជាមិនត្រូវបានរាំងខ្ទប់ ដោយក្រុមការណាមួយនោះទេ ព្រោះប្រព័ន្ធសេរីពហុបក្សនៅតែបន្ត» ៕
ចែករំលែកព័តមាននេះ