រាជធានីភ្នំពេញ ៖ អ្នកលក់ភេសជ្ជៈណែនាំភ្ញៀវខ្លួនឯងឲ្យទៅទិញចង្រិតកន្លែងផ្សេងបែរជាឈ្លោះប្រកែកគ្នាជាមួយអ្នកលក់ចង្រិតទល់មុខគ្នារហូតវ៉ៃគ្នាផ្អើលពេញផ្លូវ ត្រូវសមត្ថកិច្ចឃាត់យកទៅសួរនាំទាំងសងខាង ហេតុការណ៍នេះបានកើតឡើងកាលពីវេលាម៉ោង៧យប់ថ្ងៃទី២៩ ខែមេសា ឆ្នាំ២០១៨ តាមបណ្តោយផ្លូវមុខស្ពានហង្ស នៅចំណុចស្ពានហង្សកោះពេជ្រ ស្ថិតនៅក្នុងសង្កាត់ទន្លេបាសាក់ ខណ្ឌចំការមន ។
អ្នកលក់ចង្រិតមានទី១- ឈ្មោះហុង ស្រីពៅ ភេទស្រី អាយុ១៨ឆ្នាំ មុខរបរសិស្ស ស្នាក់នៅសង្កាត់ច្បារអំពៅ២ ខណ្ឌច្បារអំពៅ ទី២-ឈ្មោះ ហុង រតនា ភេទប្រុស អាយុ១៦ឆ្នាំ ស្នាក់ជាមួយគ្នា និងទី៣- ឈ្មោះ ហុង ស្រីមុំ ភេទស្រី អាយុ២០ឆ្នាំ ស្នាក់នៅជាមួយគ្នា ។
ចំណែកឯអ្នកលក់ភេសជ្ជៈមានឈ្មោះ ស្រី អូន ភេទស្រី អាយុ១៩ឆ្នាំ មុខរបរអ្នកលក់ភេសជ្ជៈ នៅស្ពានហង្ស ស្នាក់នៅដីឡូត៍ ក្បែរស្ពានកោះពេជ្រ និងម្នាក់ទៀតមានឈ្មោះ ហាង ស្រីនិត ភេទស្រី អាយុ២៥ឆ្នាំ ។
តាមប្រភពព័ត៌មានពីអ្នកលក់ចង្រិតបានឲ្យដឹងថា មុនពេលកើតហេតុគាត់ជាមួយអ្នកលក់ភេសជ្ជៈខាងលើនេះមិនត្រូវគ្នាទេ តែងតែកាច់កុងគ្នារហូត លុះពេលដែលកើតហេតុមានភ្ញៀវ៥ទៅ៦នាក់ ជិះរថយន្តមកបានឈប់ទិញទឹក រួចក៏ចង់ទិញចង្រិតហូប ហើយភ្ញៀវនោះចង់ទិញកន្លែងគាត់ ប៉ុន្តែខាងអ្នកលក់ទឹកភេសជ្ជៈនោះណែនាំកុំឲ្យចូលទិញកន្លែងគាត់ឲ្យទៅទិញកន្លែងផ្សេង ទើបគាត់ខឹងក៏ឈ្លោះជាមួយបានមួយសន្ទុះ ក្រោយមកខាងលក់ភេសជ្ជៈស្ទុះទៅវ៉ៃលើរូបគាត់ ទើបគាត់តដៃវិញក៏ជ្រុលបង្ករបួសស្នាមតិចតួចតែម្តង ។
បើតាមសម្តីអ្នកលក់ភេសជ្ជៈវិញបានឲ្យដឹងថា មានភ្ញៀវជិះរថយន្តសាំយ៉ុងចូលមកទិញទឹក ហើយភ្ញៀវគាត់និយាយថា ចង់ទិញចង្រិត ប៉ុន្តែឡានម៉ូតូច្រើនពេកមិនហ៊ានឆ្លង ក៏ឲ្យគាត់ជួយឆ្លងថ្នល់ រួចក៏ដើរមកកន្លែងលក់វិញ បែរជាខាងអ្នកលក់ចង្រិតចោទថា គាត់ណែនាំភ្ញៀវទិញកន្លែងគេហើយ មកឈ្លោះប្រកែកបានវ៉ៃគ្នាបណ្តាលឲ្យប្អូនស្រីឈ្មោះ ហាង ស្រីនិច រងរបួសយ៉ាងដំណំផ្អើលទៅដល់សមត្ថកិច្ចចុះមកអន្តរាគមន៍ឃាត់ខ្លួនទាំងសងខាងយកមកសួរនាំតែម្តង ។
ក្រោយពេលកើតហេតុភាគីទាំងសងខាងចង់ឈ្នះចង់ចាញ់រៀងៗ ទើបសមត្ថកិច្ចកសាងសំណុំរឿងបញ្ចូនទៅអធិការដ្ឋាននគរបាលខណ្ឌចំការមន ដើម្បីដោះស្រាយជាបន្តទៀត ៕
ចែករំលែកព័តមាននេះ