ខេត្តស្ទឹងត្រែង ៖ វិសាខបូជា ជាថ្ងៃមួយត្រូវបានប្រជាពលរដ្ឋខ្មែរប្រារពឡើងជារៀងរាល់ឆ្នាំ នៅថ្ងៃ១៥កើត ខែពិសាខ ជារៀងរាល់ឆ្នាំ។ ចំណែកនៅខេត្តស្ទឹងត្រែងនាថ្ងៃអាទិត្យ ១៥កើត ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែមេសា ឆ្នាំ២០១៨នេះ ជាថ្ងៃសីល និងពេញបូណ៌មី បានរៀបចំពិធីបុណ្យដ៏ធំបំផុតជាលើកទីមួយ ដែលមានព្រះចំនួន៤៣៦អង្គ ដង្ហែក្បួនធម្មយាត្រាបិណ្ឌបាត្រ។ ស្ថិតក្នុងព្រឹត្តិការណ៍នោះគេបានឃើញ ប្រជាពលរដ្ឋ រៀបចំចង្ហាន់ ទឹកបរិសុទ្ធ ប្រាក់ មីកញ្ចប់ និងគ្រឿងឧបភោគបរិភោគមួយចំនួនទៀត រៀបដង្ហែតាមចញ្ចើមផ្លូវ រង់ចាំព្រះសង្ឈនិមន្តបិណ្ឌបាត្រអមដោយតាជីយាយជីសមាជិក សមាជិកា ឧបាសក ឧបាសិកា គណៈកម្មការចំណុះជើងវត្តនាៗ ទាំងខេត្តស្ទឹងត្រែងក្រោមការរៀបចំពីមន្ទីរធម្មការ និងសាសនា ក្រោមការផ្តួចផ្តើមពីអាជ្ញាធរថ្នាក់ដឹកនាំខេត្តផងដែរ។
ក្បួនធម្មយាត្រានោះ ព្រះចំនួន៤៣៦អង្គ បានប្រមូលផ្តុំជ្រើសយកនូវវត្តស្រះកែវមុន្នីវណ្ណ ហៅវត្តលើ ជាចំណុចផ្តើមដង្ហែ ហែហមអមដោយភ្លេងសាសនា និងព្រះធម៌និមន្តថ្មើជើង និងមានរថយន្តមួយចំនួនធ្វើដំណើតាមបណ្តោយមាត់ទន្លេ ឆ្លងកាត់រង្វងមូលមាត់ទន្លេ ឆ្ពោះមកទិសខាងត្បូងកាត់រង្វង់មូលធំទៅដល់មុខសាលាខេត្តស្ទឹងត្រែង។ ដោយមានថ្នាក់ដឹកនាំខេត្តរង់ចាំហែហមអមដំណើររហូតដល់ទីតាំងរាប់បាត្រ បន្ទាប់មកព្រះទាំង៤៣៦អង្គ និមន្តត្រឡប់ក្រោយតាមក្បួនដែលបានរៀបចំអមសងខាងផ្លូវលម្អដោយទង់ជាតិ និងទង់សាសនា ចូលទៅកាន់វត្តស្រះកែវមុន្នីវណ្ណវិញ ដើម្បីបន្តកម្មវិធីបុណ្យតាមទំនៀមទម្លាប់។ នាព្រឹកថ្ងៃអាទិត្យ ១៥កើត ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែមេសា ឆ្នាំ២០១៨ និងជាថ្ងៃសីល ពេញបូណ៌មី ព្រះពិរុណបាន បង្អុរទឹកភ្លៀង ចាប់តាំងពីវេលាម៉ោង៤ទៀបភ្លឺ រហូតទល់ម៉ោងជាង៨ព្រឹក នៅរលឹមស្រិចៗ។
តែព្រះសង្ឈ គណៈកម្មការ និងថ្នាក់ដឹកនាំខេត្ត រួមមានអភិបាល នៃគណៈអភិបាលខេត្តស្ទឹងត្រែង លោក ម៉ម សារឿន អ្នកតំណាងរាស្ត្រមណ្ឌលខេត្តស្ទឹងត្រែង លោក ឡូយ សុផាត ប្រធានអនុប្រធានក្រុមប្រឹក្សាខេត្ត រួមប្រធានអនុប្រធានមន្ទីរជុំវិញខេត្តព្រមទាំង ឧបាសក ឧបាសិកា គណៈកម្មការអាចារ្យវត្ត នៅតែបន្តក្បួនដង្ហែធម្មយាត្រាបុណ្យវិសាខបូជាតាមការគ្រោងទុកបើទោះបីជាព្រះពិរុណមិនអំណោយផលតិចតួចក្តី។ មន្ទីរធម្មការ និងសាសនាក៏ដូចជាថ្នាក់ដឹកនាំខេត្តស្ទឹងត្រែងបានកំណត់ជាផ្លូវការថា ថ្ងៃអាទិត្យ១៥កើត ខែពិសាខ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៩ ខែមេសា ឆ្នាំ២០១៨ នេះជាព្រឹត្តិការណ៍លើកទី១ហើយធំបំផុតសម្រាប់ ខេត្តស្ទឹងត្រែង ដែលមានព្រះសង្ឈនិមន្តមកពីបណ្តាវត្តទូទាំងខេត្តស្ទឹងត្រែងដង្ហែជាក្បួនធម្មយាត្រា ដោយមានព្រះសង្ឈជាង៤០០អង្គ និងស្មារតីប្រជាពលរដ្ឋស្រឡាញ់ គោរពវប្បធម៌ប្រពៃណីសាសនា យ៉ាងច្រើនកុះករ មិនថាក្រោមដំណកទឹកភ្លៀងរលឹមក្តី៕
https://www.youtube.com/watch?v=0KVq6o-WjyM
ចែករំលែកព័តមាននេះ