ខេត្តស្ទឹងត្រែង ៖ ប្រជាពលរដ្ឋកំពុងតក់ស្លុតពេលព័ត៌មានបានបង្ហាញពីវត្តមានគ្រាប់ដែលមានទម្ងន់ជាង២០០គីឡូក្រាមមួយគ្រាប់កំពុងស្ថិតនៅក្នុងព្រៃចំណុចអូរពូន ភូមិបានហួយ ឃុំសេកុង ស្រុកសៀមប៉ាង ។
បើតាមប្រភពព័ត៌មានឱ្យដឹងថា គ្រាប់មិនទាន់ផ្ទុះនោះត្រូវគេប្រទះឃើញច្រើនថ្ងៃទៅហើយ ហើយមានប្រជាពលរដ្ឋចំនួន៤នាក់បានចង់ខ្សែដាក់ឈើសែងរំកិលបានជាង៣០ម៉ែត្រពីកន្លែងដែលប្រទះឃើញព្រមទាំងថតរូបភាពដើម្បីផ្តល់ព័ត៌មានទៅកម្លាំងមានសមត្ថកិច្ចពិសេសអង្កការស៊ីម៉ាក ។
ប្រភពព័ត៌មានមួយទៀតបានបង្ហើបថា ក្នុងចំណោមប្រជាពលរដ្ឋចំនួន៤នាក់មានម្នាក់ជាអតីតយោធាបានផ្តល់ព័ត៌មានមកអង្គភាពយោធាដើម្បីរកវិធីសាស្ត្រជម្លៀសគ្រាប់នោះចេញពីតំបន់នោះ ចំណែកក្រុមសមាជិករបស់ខ្លួនមានបំណងប្រុងលាក់បាំងដើម្បីរក្សាទុកលក់ ។
មន្ត្រីប្រចាំការអង្កការស៊ីម៉ាកស្ទឹងត្រែងក្រោយពិនិត្យលើរូបភាពគ្រាប់នោះបានសន្និដ្ឋានថា ជាប្រភេទគ្រាប់MK សម្រាប់ទម្លាក់ពីលើយន្តហោះកាលពីសម័យអាមេរិកកាំងចន្លោះឆ្នាំ១៩៧០ដល់១៩៧៥ ។ លោកបានបញ្ជាក់ថា លោកផ្តល់ព័ត៌មានទៅថ្នាក់លើតែរហូតមកដល់ថ្ងៃទី២៩ ខែមេសា ឆ្នាំ២០១៨ នេះមានរយៈពេល៩ថ្ងៃទៅហើយនៅមិនទាន់មានវិធានការយកចេញនៅឡើយទេ ។
លោក ចាន់ សុផា ស្នងការរងទទួលបន្ទុកការិយាល័យគ្រប់គ្រងអាវុធជាតិផ្ទុះ និងអគ្គីភ័យស្នងការដ្ឋាននគរបាលខេត្តស្ទឹងត្រែងឱ្យដឹងថា ក្រោយទទួលព័ត៌មានខាងលើលោកបានទំនាក់ទំនងទៅមន្ត្រីរបស់លោកនៅស្រុកសៀមប៉ាងដើម្បីចុះទៅកន្លែងទីតាំងនោះជាមួយប្រជាពលរដ្ឋដែលបានប្រទះឃើញគ្រាប់នោះដើម្បីឱ្យប្រាកដលើទីតាំងភូមិសាស្ត្រ តែជាក់ស្តែងយើងគ្រាន់តែបានឃើញក្នុងរូបភាពប៉ុណ្ណោះ បន្ទាប់សិក្សាអំពីទីតាំងភូមិសាស្ត្រច្បាស់លាស់លោកនឹងរាយការណ៍ជូនថ្នាក់ដឹកនាំថា តើគួរប្រើវិធីសាស្ត្ររបៀបណាក្នុងការយកគ្រាប់នោះមកក្រៅបានដោយមិនមានគ្រោះថ្នាក់ ។
ទាក់ទិនករណីខាងលើនេះមន្ត្រីយោធាម្នាក់បានបញ្ជាក់ថា ប្រជាពលរដ្ឋខាងលើបានប្រទះឃើញគ្រាប់នោះចាប់តាំងពីថ្ងៃទី២០ ខែមេសា ឆ្នាំ២០១៨ ក្រោយផ្តល់ដំណឹងមកក្រៅនៅថ្ងៃទី២១ ខែមេសា ឆ្នាំ២០១៨ ពួកគេបានរំកិលគ្រាប់នោះចេញពីកន្លែងប្រទះឃើញបានប្រមាណជា៣០ម៉ែត្រ ដោយក្នុងគោលបំណងយកទៅលាក់ទុកដើម្បីលក់ ក្រោយធ្លាយរឿងខាងលើពួកគេមានការទៀមទារ និងតថ្លៃជាថ្នូរនឹងការនាំផ្លូវទៅមើលគ្រាប់នោះ តែរហូតដល់ថ្ងៃទី២៩ ខែមេសា ឆ្នាំ២០១៨ នេះនៅមិនទាន់ទទួលព័ត៌មានបន្ថែមស្តីពីវិធានការយ៉ាងណានៅឡើយទេ ។
តាមប្រភពព័ត៌មានសម្ងាត់បានបង្ហើបថា គ្រាប់ដែលគេប្រទះឃើញមានចំនួន២គ្រាប់មួយគ្រាប់ដែលដែលប្រទះឃើញនោះជាប្រភេទគ្រាប់ MK មានទម្ងន់ចាប់ពី២០០គីឡូទៅជិត៣០០គីឡូក្រាមកំពុងនៅបច្ចុប្បន្ន ចំណែកមួយគ្រាប់ទៀតមានទំហំធំជាងត្រូវបានគេលក់ចេញទៅក្រៅដែលបច្ចុប្បន្នកម្លាំងយោធាកំពុងស្រាវជ្រាវសម្ងាត់តែដោយសារមិនមានរូបភាពអះអាងគេនៅមិនទាន់ផ្តល់ព័ត៌មានលម្អិតឡើយ ៕
ចែករំលែកព័តមាននេះ