ខេត្តមណ្ឌលគិរី ៖ មនុស្សប្រុសស្រីចំនួន៦នាក់ត្រូវបានមន្ត្រីជំនាញបរិស្ថានចាប់ឃាត់ខ្លួនក្រោយរកឃើញថា បានប្រព្រឹត្តបទល្មើសកាប់រានដីព្រៃនៅដែនជម្រកសត្វព្រៃកែវសីមា កាលពីថ្ងៃទី២៨ ខែមេសា ឆ្នាំ២០១៨ នៅចំណុចកណ្តាលព្រៃជ្រៅក្នុងភូមិពូគង់ ឃុំស្រែព្រះ ស្រុកកែវសីមា…
ខេត្តមណ្ឌលគិរី ៖ មនុស្សប្រុសស្រីចំនួន៦នាក់ត្រូវបានមន្ត្រីជំនាញបរិស្ថានចាប់ឃាត់ខ្លួនក្រោយរកឃើញថា បានប្រព្រឹត្តបទល្មើសកាប់រានដីព្រៃនៅដែនជម្រកសត្វព្រៃកែវសីមា កាលពីថ្ងៃទី២៨ ខែមេសា ឆ្នាំ២០១៨ នៅចំណុចកណ្តាលព្រៃជ្រៅក្នុងភូមិពូគង់ ឃុំស្រែព្រះ ស្រុកកែវសីមា ។
លោក ព្យើប ប៉េ មេឃុំស្រែព្រះប្រាប់ថា មនុស្សទាំង០៦នាក់ដែលត្រូវចាប់ខ្លួនជាមនុស្សដែលឈ្មោះ ប៉ាង ឈួន ប្រធានស្នាក់ការអង្គការជនពិការ នៅឃុំស្រែព្រះ ហៅឱ្យមកកាប់ព្រៃ ក្នុងទឹកដីភូមិពូគង់ ឃុំស្រែព្រះ ។ លោកថា ឈ្មោះ ប៉ាង ឈួន បានយកលេសអង្គការខាងលើជ្រកកោន ដើម្បីប្រមូលប្រជាជនប្រមាណ៨០០គ្រួសារមកពីខេត្តដទៃ ដើម្បីកាប់រាន្តដីព្រៃធ្វើជាកម្មសិទ្ធផ្ទាល់ខ្លួន ។ លោកមេឃុំបញ្ជាក់ថា ករណីនេះឈ្មោះ ប៉ាង ឈួន បានទាក់ទងមកលោកសូមឱ្យជួយអន្តរាគមន៍ដោះលែងមនុស្សផងដែរ ។
លោក ប៉ាង ឈួន ប្រធានស្នាក់ការអង្គការជនពិការឱ្យដឹងនៅថ្ងៃទី២៩ ខែមេសា ឆ្នាំ២០១៨ នេះថា លោកមិនបានហៅមនុស្ស៨០០គ្រួសារមកកាប់ព្រៃនោះទេ តែលោកបានហៅប្រជាពលរដ្ឋ១០០គ្រួសារដែលក្រីក្រដើម្បីមកកាប់ឆ្ការព្រៃយកធ្វើចម្ការពិតមែន ។ លោកបន្តថា ករណីនេះលោកបានសូមទៅអាជ្ញាធរ សមត្ថកិច្ច ពិសេសលោកមេឃុំ ព្យើប ប៉េ រួចហើយដើម្បីឱ្យពលរដ្ឋមក ។
ករណីស្នើរសុំនេះលោកមេឃុំក៏យល់ព្រមដែរ តែនឹកឆ្ងល់ហេតុអីបានជាមេឃុំហៅគេឱ្យមកចាប់បែបនេះ ។ ប្រធានស្នាក់ការអង្គការដដែលបញ្ជាក់ថា លោកមានឯកសារស្នើរសុំពីថ្នាក់ក្រសួងមកច្រើនណាស់ ។ ករណីចាប់នេះលោកថា នៅមានក្រុមពលរដ្ឋជាច្រើនកំពុងកាប់ព្រៃដែរ ហេតុអីសមត្ថកិច្ចមិនចាប់ មកចាប់តែក្រុមលោក?
លោក នួន សារ៉ន អភិបាលស្រុកកែវសីមាបានឲ្យដឹងថា អាជ្ញាធរមិនបានទទួលឯកសារស្នើរសុំដូចការលើកឡើងនោះទេ ។ លោកថា តែបានទទួលឯកសារស្នើរសុំបង្កើតស្នាក់ការអង្គការជនពិការក្នុងទឹកដីឃុំស្រែព្រះ ចំពោះឯកសារដែលឈ្មោះ ប៉ាង ឈួន អះអាងថាមានលោកក៏រង់ចាំពិនិត្យដែរ ។
គិតត្រឹមវេលាម៉ោង២នឹង៣០នាទីរសៀល ថ្ងៃទី២៩ ខែមេសា ឆ្នាំ២០១៨ មន្ត្រីនៃដែនជម្រកសត្វព្រៃកែវសីមាកំពុងបន្តសួរនាំលើជនសង្ស័យទាំង០៦នាក់ដើម្បីស្វែងរកមេខ្យល់នៃអ្នកនៅពីក្រោយខ្នងក្នុងករណីខាងលើនោះ ។
ក្រុមឃ្លាំមើលបញ្ហាបរិស្ថានបានលើកឡើងថា ការកាប់ព្រៃឈើទន្ទ្រានយកដីជាកម្មសិទ្ឋផ្ទាល់ខ្លួននៅក្នុងដែនជម្រកសត្វព្រៃកែវសីមាហាក់កំពុងមានការកើនឡើងពីមួយថ្ងៃទៅមួយថ្ងៃ ខណៈ៥ឆ្នាំចុងក្រោយនេះផ្ទៃដីព្រៃអភិរក្សបានបាត់បង់អស់យ៉ាងហោចណាស់ប្រមាណ១ម៉ឺនហិកតាក្នុងពេលកន្លងមកនេះ ៕
ចែករំលែកព័តមាននេះ