ខេត្តស្ទឹងត្រែង ៖ សេចក្តីរាយការណ៍បានឱ្យដឹងថា ម៉ូតូស៊េរីទំនើបមួយគ្រឿងត្រូវគេប្រទះឃើញសល់តែគ្រោងឆ្អឹងក្នុងអូរគុម្ពោតគុម្ពឬស្សីក្បែរឈាបណដ្ឋាន កាលពីព្រឹកថ្ងៃទី២៩ ខែមេសា ស្ថិតនៅភូមិលើ សង្កាត់ស្រះឬស្សី ក្រុងស្ទឹងត្រែង ដោយសង្ស័យថា ត្រូវចោរលួចបាត់យកទៅលាក់ទុក។
ប្រភពព័ត៌មានឱ្យដឹងថា កាលពីយប់ម៉ោងប្រមាណជាង២រំលងអធ្រាត្រឈានចូលថ្ងៃទី២៩ មេសា ប្រជាពលរដ្ឋរស់នៅក្បែរឈាបណដ្ឋានបានប្រទះឃើញភ្លើងឆេះគុម្ពោតព្រៃឬស្សីមិនដឹងមូលហេតុ លុះព្រឹកទើបទៅមើលក៏ឃើញម៉ូតូមួយគ្រឿងឆេះហ្មត់សល់តែគ្រោងឆ្អឹង ទើបរាយការណ៍ទៅនគរបាលប៉ុស្តិ៍រដ្ឋបាលសង្កាត់ស្រះឬស្សីចុះមកត្រួតពិនិត្យ។
លោក ប៊ុន រតនា នាយប៉ុស្តិ៍រដ្ឋបាលឱ្យថា កាលពីយប់ថ្ងៃទី២៩ មេសា ជនរងគ្រោះម្នាក់ឈ្មោះ សុខ សាអែម ភេទប្រុស អាយុ២៣ឆ្នាំ មករាយការណ៍ពីការបាត់ម៉ូតូមួយគ្រឿងម៉ាកឌ្រីមស៊េរីឆ្នាំ២០១៨ គ្រាទុកនៅមុខផ្ទះដោយមិនបានដកសោចេញ ស្រាប់តែព្រឹកឡើងប្រជាពលរដ្ឋរាយការណ៍ថា ប្រទះម៉ូតូមួយគ្រឿងត្រូវភ្លើងឆេះសល់តែគ្រោងឆ្អឹងតែម្តង ទំនងគេយកមកលាក់នៅក្នុងអូរគុម្ពោតព្រៃឬស្សី លុះចុះទៅពិនិត្យជាក់ស្តែងក៏ហៅជនរងគ្រោះ ដើម្បីទៅផ្ទៀងផ្ទាត់លេខតួ និងលេខម៉ាស៊ីន ទើបដឹងថា ជាម៉ូតូបាត់កាលពីយប់មែន។
តាមការសន្និដ្ឋានរបស់នគរបាលថា ម៉ូតូដែលចោរលួចយកទៅលាក់ទុកនៅក្នុងអូរមានដុះដើមឬស្សីក្បែរឈាបណដ្ឋាន បន្ទាប់មកក៏ត្រូវភ្លើងឆេះស្លឹកឬស្សីចាស់ជ្រុះរួចរាលដាលដល់ម៉ូតូ លុះព្រឹកទើបមេឃធ្លាក់ភ្លៀង តែយ៉ាងណាម៉ូតូនោះភ្លើងឆេះហ្មត់ទៅហើយ។
ព័ត៌មានលម្អិតនឹងមានផ្សាយជូនបន្តលើទំព័រកាសែតកោះសន្តិភាព
ចែករំលែកព័តមាននេះ