ខេត្តព្រៃវែង ៖ យុវជនម្នាក់បានស្លាប់បាត់បង់ជីវិតពេលបញ្ជូនដល់មន្ទីរពេទ្យ និង៤នាក់ផ្សេងទៀតបានរងរបួសធ្ងន់ និងស្រាល នៅក្នុងហេតុការណ៌គ្រោះថ្នាក់ចរាចរណ៌ដ៏គួរឱ្យរន្ធត់មួយ ដែលបានកើតឡើងនៅលើកំណាត់ផ្លូវជាតិលេខ៨អា ត្រង់ចំណុចចន្លោះគីឡូម៉ែត្រលេខ55 និង56 ស្ថិតក្នុងភូមិពារាំង ឃុំរាប ស្រុកពារាំង ខេត្តព្រៃវែង កាលពីវេលាម៉ោង២និង៣០នាទីរសៀលថ្ងៃទី២៧ ខែមេសា ឆ្នាំ២០១៨ ។
ជនរងគ្រោះក្នុងហេតុការណ៍នេះទី១-ឈ្មោះ បញ្ញា ភេទប្រុស អាយុ១៨ឆ្នាំ បានស្លាប់បាត់បង់ជីវិតក្រោយពេលបញ្ជូនដល់មន្ទីរពេទ្យ, ទី២-ឈ្មោះ ខា ដាវ៉ាន់ ភេទប្រុស អាយុ១៨ឆ្នាំ រងរបួសធ្ងន់ អ្នកទាំង២មានទីលំនៅក្នុងភូមិថ្មគោល សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ, ទី៣-ឈ្មោះ ឈុន វ៉ាន់ណេត ភេទប្រុស អាយុ១៧ឆ្នាំ រងរបួសធ្ងន់, ទី៤-ឈ្មោះ ព្រំ វុទ្ធី ភេទប្រុស អាយុ១៧ឆ្នាំ រងរបួសស្រាល ទាំង២នាក់មានទីលំនៅក្នុងភូមិថ្មគោល សង្កាត់ចោមចៅដូចគ្នា និងទី៥-ឈ្មោះ ថា មិនា ភេទប្រុស អាយុ១៨ឆ្នាំ រងរបួសស្រាល មានទីលំនៅក្នុងភូមិព្រែកប្រា ឃុំព្រែកឬស្សី ស្រុកល្វាឯម ខេត្តកណ្តាល ។
បើយោងតាមប្រភពព័ត៌មានពីសមត្ថកិច្ចស្រុកពារាំងបានឱ្យដឹងថា គ្រោះថ្នាក់ចរាចរណ៌គឺបង្កឡើងដោយសារតែជនរងគ្រោះខ្លួនឯងជិះម៉ូតូក្នុងល្បឿនលឿន ខ្វះការប្រុងប្រយ័ត្នបង្កឱ្យមានគ្រោះថ្នាក់ស្លាប់ទាំងខ្លួនឯង ហើយរបួសដល់អ្នកដទៃថែមទៀត ។ ទាក់ទិនទៅនិងហេតុការណ៍ខាងលើនេះ ត្រូវបានសមត្ថកិច្ចបញ្ជាក់ប្រាប់ថា នៅមុនពេលកើតហេតុគេឃើញជនរងគ្រោះឈ្មោះ បញ្ញា បានជិះម៉ូតូមួយគ្រឿងម៉ាក ឌ្រីមសង់សេ១២៥ ពណ៌ខ្មៅ ពាក់ផ្លាកលេខ កណ្តាល 1P-3979 រួមដំណើរដោយជនរងគ្រោះឈ្មោះ ខា ដាវ៉ាន់ ក្នុងទិសដៅពីកើតទៅលិច ពេលមកដល់កន្លែងកើតហេតុស្រាប់តែម៉ូតូជនរងគ្រោះបានជ្រុលចង្កូតទៅបុកពីក្រោយគូថរថយន្ត1គ្រឿង (មិនស្គាល់ម៉ាក) ដែលកំពុងធ្វើដំណើរនៅខាងមុខក្នុងទិសដៅស្របគ្នា បណ្តាលឲ្យម៉ូតូជនរងគ្រោះដួលបោកទៅលើថ្នល់ ហើយក៏ត្រូវម៉ូតូមួយគ្រឿងផ្សេងទៀត ម៉ាកនិចពណ៌ស ពាក់ផ្លាកលេខ ភ្នំពេញ 1GW-8746 បើកបរដោយឈ្មោះ ឈុន វ៉ាន់ណេត រួមដំណើរដោយឈ្មោះ ព្រំ វុទ្ធី និង ថា មិនា ដែលបើកមកពីក្រោយបុកថែមមួយតង់ទៀត បណ្តាលឱ្យម៉ូតូទាំង២គ្រឿង និងមនុស្សទាំង៥នាក់ខ្ទាតខ្ចាយពេញថ្នល់ ។ ចំណែករថយន្តដែលត្រូវម៉ូតូជនរងគ្រោះបុកគូថមិនបានឈប់ទេគឺបានបើកចេញពីកន្លែងកើតហេតុបាត់ស្រមោលឈឹងតែម្តង ។
ទោះជាយ៉ាងណាក៏ដោយ ក្រោយពីកើតហេតុភ្លាមសមត្ថកិច្ចក៏បានទៅដល់កន្លែងកើតហេតុភ្លាម ហើយបានទាក់ទងហៅរថយន្តសាមុយដឹកយកជនរងគ្រោះទាំង៥នាក់ ទៅកាន់មន្ទីរពេទ្យបង្អែកស្រុកពារាំងភ្លាមៗផងដែរ ដើម្បីឱ្យក្រុមគ្រូពេទ្យជួយសង្គ្រោះ ប៉ុន្តែជាអកុសលពេលទៅដល់មន្ទីរពេទ្យជនរងគ្រោះឈ្មោះ បញ្ញា បានស្លាប់បាត់បង់ជីវិតបាត់ទៅហើយ ៕
ចែករំលែកព័តមាននេះ