ខេត្តមណ្ឌលគិរី ៖ ឈើខុសច្បាប់ចំនួន៤រថយន្តកែច្នៃ ត្រូវបានជំនាញបរិស្ថានខេត្តមណ្ឌលគិរីចាប់បង្ក្រាបបាន កាលពីល្ងាចថ្ងៃទី២៦ ខែមេសា ២០១៨ ស្ថិតក្នុងភូមិសាស្ត្រ ដែនជម្រកសត្វព្រៃ លំផាត់ ត្រង់ចំណុច អូរព្រះ ភូមិរវាក់ ឃុំរយ៉ ស្រុកកោះញែក ។
លោកកែវ សុភគ៌ ប្រធានមន្ទីរបរិស្ថានខេត្តបានឲ្យដឹងថា ក្រុមឧទ្យានុរក្សនៃដែនជម្រក សត្វព្រៃ ភ្នំព្រេចនឹងលំផាត់ បានធ្វើការចាប់រឹបអូស រថយន្តកែច្នៃ (រ៉េវ) ចំនួន០៤គ្រឿង ផ្ទុកឈើហ៊ុបមូល ប្រភេទឈើទាល ចំនួន១៥កំណាត់ ។
ក្នុងប្រតិបត្តិការនេះ មន្ត្រីជំនាញបានត្រឹមចាប់ឃាត់វត្ថុតាងប៉ុណ្ណោះ ដោយជនសង្ស័យបានរត់គេចខ្លួនចូលព្រៃបាត់អស់ ។ លោកប្រធានមន្ទីរបានឲ្យដឹងថា បច្ចុប្បន្នវត្ថុតាងរថយន្ត និងឈើត្រូវបានក្រុម ឧទ្យានុរក្ស កំពុងយកទៅរក្សាទុកនៅស្នាក់ការរវាក់ ដើម្បីកសាងសំណុំរឿងតាមនីតិវិធីច្បាប់ ។
សេចក្តីរាយការណ៍ដាច់ដោយឡែកមួយបានឲ្យដឹងថា រថយន្តទាំងនេះបានឆ្លងចូលមកពីរក្រុមហ៊ុនប៉ាស៊ីភិច ហ្គ្រេន ហៅឡូ០៤ ដែលអភិវឌ្ឍន៍លើដំណាំកសិឧស្សាហកម្មកៅស៊ូ ហើយមានក្រុមឈ្មួញមានងារជា ឧកញ៉ា បានកែនប្រជាពលរដ្ឋឲ្យចូលព្រៃដែនជម្រកលំផាត់ ស្រុកកោះញែក ដើម្បីកាប់ឈើក្នុងព្រៃហាមឃាត់ដឹកចូលទៅឃ្លាំងក្រុមហ៊ុន ដើម្បីបន្លំជាឈើមានច្បាប់ តាមរូបមន្តកន្លេលធំបន្លំដេក ដែលព័ត៌មាន ខ្លះនិយាយថា ឧកញ៉ាឈ្មួញឈើល្បីម្នាក់នេះ មានទីតាំងនៅស្រុកអូរាំងឪ ខេត្តត្បូងឃ្មុំ ។
ចំណែកព័ត៌មានពិស្តារនឹងផ្សាយជូននៅលើកាសែតកោះសន្តិភាព ៕
ចែករំលែកព័តមាននេះ