ខេត្តកំពង់ឆ្នាំង ៖ ប្រជាពលរដ្ឋប្រមាណជិត១០០នាក់តំណាងឱ្យប្រជាពលរដ្ឋចំនួន៤៤៣គ្រួសាររស់នៅភូមិតាសាំ ឃុំក្រាំងស្គា ស្រុកទឹកផុស កាលពីថ្ងៃសៅរ៍ចុងសប្តាហ៍នេះបាននាំគ្នាជួបជុំតវ៉ាដើម្បីទាមទារដីចំនួន២១ហិកតានៅចំណុចអូរក្រសារពីប្រជាពលរដ្ឋចំនួន១១គ្រួសារដែលបានលក់ទៅឱ្យក្រុមហ៊ុនចិន ។
លោក ចាន់ ក្រេត តំណាងឱ្យប្រជាពលរដ្ឋទាំង៤៤៣គ្រួសារបានរៀបរាប់ថា ដីនៅចំណុចខាងលើកាលដើមឡើយជាដីរបស់សហគមន៍មានចំនួនសរុបដល់ទៅ៧៣០,៣៨ហិកតា ។ ក្រោយមកដីនោះបានប្រគល់ជូនប្រជាពលរដ្ឋកាន់កាប់វិញ ហើយក្នុងអំឡុងខែតុលា ឆ្នាំ២០១៧ ពួកគាត់ជាប្រជាពលរដ្ឋបានចាប់ផ្តើមវាស់ដីនោះឃើញនៅសល់តែចំនួន១៤២ហិកតាប៉ុណ្ណោះ ។ ជាមួយគ្នានេះដែរដីទំហំ២១ហិកតាដែលប្រជាពលរដ្ឋចំនួន១១គ្រួសារបានអះអាងថា ជាដីរបស់ខ្លួនពួកគាត់ក៏បានសុំទាមទារមកដាក់ជាដីរួមក្នុងភូមិវិញដែរ ។
ក្រោយមកនៅថ្ងៃទី១៤ ខែមីនា ឆ្នាំ២០១៨ ប្រជាពលរដ្ឋទាំង១១គ្រួសារបានព្រមប្រគល់ដីនោះមកដាក់រួមវិញ ដោយមានលាយលក្ខអក្សត្រឹមត្រូវ ប៉ុន្តែនៅថ្ងៃដដែលនេះដែរអ្នកទាំង១១គ្រួសារដែលបានឱ្យលោក គង់ សំអ៊ីម អតីតមេឃុំក្រាំងស្គា បច្ចុប្បន្នជាជំទប់ទី២ ឃុំក្រាំស្គា ធ្វើជាតំណាងរបស់ខ្លួនបានលក់ដី២១ហិកតានោះទៅឱ្យក្រុមហ៊ុនចិនទៅវិញ ធ្វើឱ្យពួកគាត់កើតទុក្ខមិនសុខចិត្ត សុំទាមទារយកដីនោះមកដាក់ជាសម្បត្តិរូមភូមិវិញដើម្បីឱ្យប្រជាពលរដ្ឋគ្រប់គ្រងអាស្រ័យផលបន្ត ។ ព័ត៌មានពិស្តារនឹងមានផ្សាយជូននៅកាសែត កោះសន្តិភាព ៕
ចែករំលែកព័តមាននេះ