រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសថា លោក មឿន តុលា នាយកប្រតិបត្តិអង្គការសង់ត្រាល់ ត្រូវបានរាជរដ្ឋាភិបាលកម្ពុជាចាត់វិធានការតាមនីតិវិធីតុលាការ…
រាជធានីភ្នំពេញ ៖ ក្រសួងការងារ និងបណ្តុះបណ្តាលវិជ្ជាជីវៈ បានប្រកាសថា លោក មឿន តុលា នាយកប្រតិបត្តិអង្គការសង់ត្រាល់ ត្រូវបានរាជរដ្ឋាភិបាលកម្ពុជាចាត់វិធានការតាមនីតិវិធីតុលាការ ក្នុងការលើកលែងការចោទប្រកាន់ហើយ ក្នុងសំណុំរឿងព្រហ្មទណ្ឌឆ្នាំ២០១៦ ពាក់ព័ន្ធរឿងបាត់លុយ បច្ច័យបុណ្យសពលោក កែម ឡី។ នេះបើយោងតាមសេចក្តីប្រកាសព័ត៌មានរបស់ក្រសួងការងារ។
លិខិតដដែលបានបញ្ជាក់ថាលោក មឿន តុលា ជាប្រធានអង្គការដែលធ្វើការជាមួយកម្មករកាត់ដេរ ត្រូវបានចោទប្រកាន់ពីបទរំលោភលើសេចក្តីទុកចិត្ត ប្រព្រឹត្តនៅចំណុច រាជធានីភ្នំពេញ កាលពីអំឡុងឆ្នាំ២០១៦ តាមបញ្ញត្តមាត្រា៣៩១ និងមាត្រា៣៩២ នៃក្រមព្រហ្មទណ្ឌ នៃព្រះរាជណាចក្រកម្ពុជា។ ជាមួយគ្នានោះ ក្រសួងការងារ និងបណ្តុះបណ្តាលវិជ្ជាជីវៈ បានគូសបញ្ជាក់ថា រាជរដ្ឋាភិបាលកម្ពុជានៅតែបន្តការប្តេជ្ញាចិត្តខ្ពស់ ក្នុងការលើកកម្ពស់សិទ្ធិសេរីភាពរបស់អង្គការវិជ្ជាជីវៈ ស្របតាមច្បាប់នៃព្រះរាជណាចក្រកម្ពុជា ជាធរមាន។
សូមបញ្ជាក់ថា លោក មឿន តុលា និងប្រធានអង្គការ២រូបផ្សេងទៀត គឺព្រះតេជគុណ ប៊ុត ប៊ុនតិញ និងលោក ប៉ា ងួនទៀង ជាអតីតសមាជិកក្នុងគណៈកម្មការរៀបចំពិធីបុណ្យសពលោក កែម ឡី បន្ទាប់ពីអ្នកវិភាគសង្គមរូបនេះត្រូវបានឃាតកបាញ់សម្លាប់ទាំងព្រឹកកាលពីថ្ងៃទី១០ ខែកក្កដា ឆ្នាំ២០១៦ កន្លងទៅ។ តែក្រោយពិធីបុណ្យបានចប់សព្វគ្រប់ លោក ពេជ្រ ស្រស់ ប្រធានគណបក្សយុវជនកម្ពុជា បានដាក់ពាក្យប្តឹងទៅកាន់តុលាការសាលាដំបូងរាជធានីភ្នំពេញ ចោទប្រកាន់ប្រធានអង្គការសមាគមទាំង៣ថា បានធ្វើឲ្យបាត់លុយក្នុងពិធីបុណ្យសពរបស់បណ្ឌិត កែម ឡី រាប់ម៉ឺនដុល្លារ៕
ចែករំលែកព័តមាននេះ