រាជធានីភ្នំពេញ ៖ ប្រធានសារមន្ទីរឧក្រិដ្ឋកម្មប្រល័យពូជសាសន៍ទួលស្លែងបានថ្លែងកាលពីពេល ថ្មីៗកន្លងថា លោកគ្រោងនឹងរៀបចំឲ្យភ្ញៀវទេសចរជាតិអន្តរជាតិស្លៀកពាក់ឲ្យបានសមរម្យ ពេលចូលទស្សនាព្រោះបើអ្នកចូលទស្សនាស្លៀកពាក់មិនសមរម្យនោះ វានឹងមិនគប្បីនោះឡើយសម្រាប់កន្លែងប្រវត្តិសាស្ត្រនៃអំពើកាប់សម្លាប់យ៉ាងព្រៃផ្សៃក្នុងរបបប៉ុលពត ។ ការមិនអនុញ្ញាតឲ្យភ្ញៀវទេសចរជាតិ និងអន្តរជាតិស្លៀកពាក់មិនសមរម្យចូលទស្សនាតំបន់ប្រវតិ្តសាស្ត្រនេះបាន និងកំពុងអនុវត្តយ៉ាងជោគជ័យនៅមជ្ឈមណ្ឌលប្រល័យពូជសាសន៍ជើងឯកអស់រយៈពេលប្រមាណជា៥ឆ្នាំមកហើយ ។
លោកឆាយ វិសុទ្ធ សារមន្ទីរឧក្រិដ្ឋកម្មប្រល័យពូជសាសន៍ទួលស្លែងថា៖ «គម្រោងរៀបចំការស្លៀកពាក់ឲ្យសមរម្យសម្រាប់ភ្ញៀវជាតិ និងអន្តរជាតិនោះ គឺគ្រោងនឹងអនុវត្តក្នុងពេល ឆាប់ៗនេះ បន្ទាប់ពីយើងបានធ្វើសេចក្តីណែនាំ ឬជូនដំណឹងមួយទាក់ទងការស្លៀកពាក់ឲ្យបានសមសម្យនេះទៅទីភ្នាក់ងារសមាគមទេសចរណ៍ រួមទាំងស្ថាប័នពាក់ព័ន្ធនានា» ។ យ៉ាងណាក៏ដោយលោកបានសង្កេតឃើញថា កន្លងមកបើទោះបីជាមិនបានរៀបចំការស្លៀកពាក់នេះ ប៉ុន្តែភាគច្រើននៃភ្ញៀវជាតិនិងអន្តរជាតិដែលបានចូលទស្សនាមជ្ឈមណ្ឌលប្រល័យពូជសាសន៍ទួលស្លែងគឺសុទ្ធតែបានបង្ហាញឥរិយាបថស្រគតស្រគំ ទឹកមុខស្រងូតស្រងាត់ រហូតមានការបង្ហូរទឹកភ្នែកថែមទៀត ដែលអ្វីទាំងអស់នោះបញ្ជាក់ថាពួកគាត់បានយល់ដឹងរួចហើយនូវអ្វីទាំងអស់ដែលមាននៅក្នុងមជ្ឈមណ្ឌលមួយនេះ ។
លោកឆាយ វិសុទ្ធ រំលឹកថា ក្នុង មួយឆ្នាំៗភ្ញៀវអន្តរជាតិពីបណ្តាប្រទេសមិនតិចជាង៥០ទេ បានចូលទស្សនាសារមន្ទីរប្រល័យពូជសាសន៍ទួលស្លែង ហើយភាគច្រើនភ្ញៀវពីបណ្តាប្រទេសអឺរ៉ុប ។ ជាក់ស្តែងពេញមួយឆ្នាំ២០១៧កន្លងទៅនេះ ភ្ញៀវអន្តរជាតិដែលចូលទស្សនាសារមន្ទីរឧក្រិដ្ឋកម្មមួយនេះមានប្រមាណជាង៤០ម៉ឺននាក់ ចំនួននេះកើនឡើងតិចតួចប៉ុណ្ណោះបើប្រៀបធៀបនឹងឆ្នាំ២០១៦ ។ ប៉ុន្តែសម្រាប់ភ្ញៀវជាតិមានចំនួនតិចតួចនៅឡើយ។
លោកឆាយ វិសុទ្ធ អះអាងថា៖ «យើងកំពុងរៀបចំផែនការ៥ឆ្នាំដើម្បីលើកទឹកចិត្ត ឬជំរុញឲ្យប្រជាពលរដ្ឋខ្មែរចូលទស្សនាសារមន្ទីរប្រល័យពូជសាសន៍ទួលស្លែងឲ្យបានយ៉ាងតិចមួយម៉ឺននាក់ក្នុង មួយឆ្នាំៗ ។ ផែនការនោះចាំបាច់ត្រូវមានការសហការជាមួយស្ថាប័នពាក់ព័ន្ធ អាជ្ញាធរមូលដ្ឋាន សំខាន់ផ្នែកអប់រំសិក្សាធិការទាំងរដ្ឋ និងឯកជន ដើម្បីរៀបចំជាកម្មវិធីចូលទស្សនាដើម្បីសិក្សាឈ្វេងយល់អំពីប្រវត្តិសាស្ត្រពិតនៅកម្ពុជា ។
នៅមជ្ឈមណ្ឌលប្រល័យពូជសាសន៍ជើងឯកបាន និងកំពុងអនុវត្តវិធានការមួយដែលតម្រូវឲ្យភ្ញៀវទេសចរជាតិ និងអន្តរជាតិដែលចូលទស្សនាតំបន់នេះ «មិនឲ្យស្លៀកពាក់មិនសមរម្យដូចជាស្លៀកខោ សំពត់ខ្លី ឬអាវលេចលើលេចក្រោមនោះទេ ព្រោះថាការស្លៀកពាក់បែបនោះនឹងមិនសមរម្យទៅនឹងទិដ្ឋភាពក៏ដូចជាបទបញ្ជាផ្ទៃក្នុងរបស់មជ្ឈមណ្ឌលប្រល័យពូជសាសន៍ជើងឯក ខណៈដែលមជ្ឈមណ្ឌលនេះជាកន្លែងបង្ហាញនូវការឈឺចាប់និងសោកនាដកម្មក្នុងរបបប្រល័យពូជសាសន៍ប៉ុល ពត» ។
លោកស្រីរស់ សុភារ៉ាវី អនុប្រធានមជ្ឈមណ្ឌលប្រល័យពូជសាសន៍ជើងឯកបានបញ្ជាក់ថា៖ «ចំពោះភ្ញៀវដែលស្លៀកពាក់មិនសមរម្យ ហើយចង់ចូលទស្សនាតំបន់នោះ យើងក៏មានសម្លៀកបំពាក់សមរម្យសម្រាប់ជូនពួកគាត់ផ្លាស់ប្តូរផងដែរ ឬក៏ឲ្យគាត់ពាក់ពីខាងក្រៅបន្ថែម ធ្វើយ៉ាងម៉េចឲ្យសមរម្យទៅតាមទិដ្ឋភាព ឬការណែនាំរបស់មជ្ឈមណ្ឌលប្រល័យពូជសាសន៍ជើងឯកនេះ ។ ប៉ុន្តែយើងក៏មិនដែលទទួលបាននូវការរិះគន់ណាមួយពីភ្ញៀវដែលចូលទស្សនាតំបន់នេះទាក់ទងការតម្រូវឲ្យមានការស្លៀកពាក់សមរម្យនោះទេ ។ ផ្ទុយទៅវិញពួកគាត់រីករាយ ទទួលយកការណែនាំ ហើយធ្វើតាមពួកយើង»។
ប្រភពដដែលបន្តថាក្រុមការងាររបស់មជ្ឈមណ្ឌលប្រល័យពូជសាសន៍ជើងឯកបានរៀបចំឲ្យភ្ញៀវបរទេសដែលចង់ចូលទស្សនា ជួលសម្លៀកបំពាក់ចូលទស្សនា បើសិនជាពួកគេស្លៀកពាក់មិនសមរម្យ លេចលើ លេចក្រោមខ្លាំង តែភ្ញៀវអន្តរជាតិមួយចំនួនធំបានជាវសម្លៀកបំពាក់តែម្តង ។
មជ្ឈមណ្ឌលប្រល័យពូជសាសន៍ជើងឯកដែលជាទីតាំងបង្ហាញភស្តុតាង និងឯកសារប្រវត្តិសាស្ត្រពាក់ព័ន្ធរបបប្រល័យពូជសាសន៍ប៉ុល ពត កំពុងស្រូបយកភ្ញៀវទេសចរអន្តរជាតិគួរឲ្យកត់សម្គាល់ សំខាន់ភ្ញៀវមកពីតំបន់អឺរ៉ុប ។ សម្រាប់ភ្ញៀវជាតិ ឬប្រជាពលរដ្ឋកម្ពុជាដែលចូលទស្សនាមជ្ឈមណ្ឌលប្រវត្តិសាស្ត្រ មួយនេះនៅមានកម្រិតទាបនៅឡើយ ។
អនុប្រធានមជ្ឈមណ្ឌលប្រល័យពូជសាសន៍ជើងឯកឲ្យដឹងថា សម្រាប់ឆ្នាំ២០១៧ កន្លងទៅនេះ ភ្ញៀវអន្តរជាតិដែលចូលទស្សនាមជ្ឈមណ្ឌលប្រវត្តិសាស្ត្រមួយនេះមានជាង២៣៣.៩៦៤នាក់ ។ ចំណែកភ្ញៀវជាតិមានប្រមាណតែ៦ម៉ឺននាក់ប៉ុណ្ណោះ ។ ក្នុងចំណោមភ្ញៀវអន្តរជាតិដែលចូលទស្សនាមជ្ឈមណ្ឌលប្រល័យពូជសាសន៍ជើងឯកនេះសង្កេតឃើញថាភ្ញៀវពីតំបន់អឺរ៉ុបមានអត្រាខ្ពស់ជាងគេ បើប្រៀបធៀបទីផ្សារភ្ញៀវទេសចរទាំង១០ប្រទេសទៅកាន់ទីនោះ ។
លោកស្រីរស់ សុភារ៉ាវី ឲ្យដឹងថា ទីតាំងចំនួន៤ដែលភ្ញៀវបរទេសចាប់អារម្មណ៍បំផុតនៅក្នុងមជ្ឈមណ្ឌលប្រល័យពូជសាសន៍ជើងឯក ក្នុងនោះរួមមានទី១-ស្តូបដាក់លលាដ៍ក្បាលសាកសពជិត១០០០លលាដ ។
ទី២-រណ្តៅសាកសព៤៥០នាក់ក្នុងមួយរណ្តៅ ។
ទី៣- រណ្តៅសាកសព អត់ក្បាល១៦៦សាកសពក្នុងមួយរណ្តៅ ។
ទី៤-រណ្តៅសាកសពស្ត្រី និងកុមារជាង១០០សាកសពក្នុងមួយរណ្តៅ ៕
ចែករំលែកព័តមាននេះ