ខេត្តក្រចេះ ៖ បុរសជនជាតិដើមភាគតិចព្នងម្នាក់ដែលបានប្រើហិង្សាលើស្ត្រីជាប្រពន្ធ មានសរសៃខ្ចីឲ្យរងរបួសធ្ងន់ រហូតទាស់សរសៃបណ្តាលឲ្យស្លាប់ ត្រូវបាននគរបាលស្រុកចិត្របុរីចាប់ខ្លួន បន្ទាប់ពីបានបង្កហេតុបានរយៈពេល១ថ្ងៃ ។
ដែលអំពើហិង្សាក្នុងគ្រួសារផ្តើមឡើងពីរឿងទំនាស់ពាក្យសម្តីតិចតួចឈានឲ្យ មានការវាយសម្លាប់ពីប្តីដៃដល់ទៅលើស្ត្រីជាប្រពន្ធដែលជាជនជាតិភាគតិចព្នងដូចគ្នា មានទីលំនៅភូមិអាលច ឃុំកន្ទួត ស្រុកចិត្របុរី ក្នុងនោះបានបន្សល់ទុកនូវភាពសោកសៅជាខ្លាំង ខណៈដែល គ្រួសារនេះនៅមានកូនតូចរញ៉ងប្រុស ស្រីចំនួន៥នាក់ នៅពេលដែលស្ត្រីជាម្តាយបានស្លាប់ ។ ចំណែកឯឱពុកក៏ក្លាយខ្លួនទៅជាអ្នកទោស ។
បើតាមការនគរបាលស្រុកចិត្របុរីបានឲ្យដឹងថា អំពើហិង្សាដោយចេតនានេះបានកើត ឡើងនៅថ្ងៃទី២៥ ខែមេសានេះ ដោយបុរសជាប្តីឈ្មោះ ធុច សុខា អាយុ៣៧ឆ្នាំ បានវាយសំពងមកលើស្ត្រីជាប្រពន្ធឈ្មោះ ក្រាញ់ នញ អាយុ៣៩ឆ្នាំ ដែលទើបតែសម្រាលកូន និងមានសរសៃខ្ចី បណ្តាលឲ្យទាស់សរសៃរហូតស្លាប់ ក្រោយរងការវាយដំបានមួយថ្ងៃ ។
អធិការនគរបាលស្រុកចិត្របុរីលោកវរសេនីយ៍ឯក យ៉ាន់ ហ៊ាង បានប្រាប់ឲ្យដឹងថា មូលហេតុដែលឈានឲ្យមានអំពើហិង្សានេះ គឺផ្តើមចេញដោយសារទំនាស់ពាក្យសម្តី គឺនៅថ្ងៃ កើតហេតុពេលបុរសជាប្តីបានបើកគោយន្តកន្ត្រៃចេញទៅក្រៅក៏មានកូនតូចម្នាក់ទាយំទៅ តាម តែប្រពន្ធហាមមិនឲ្យទៅក៏កើតជាទំនាស់ ។ ក្រោយទំនាស់យ៉ាងតឹងសរសៃ.ក បុរសជាប្តី បានស្ទុះវាយទាត់ធាក់មកលើស្ត្រីជាប្រពន្ធ ។ មិនតែប៉ុណ្ណោះពេលមកដល់លើផ្ទះបុរសដៃដល់ជាប្តី ថែមទាំងយករនាប ឬស្សីមកវាយលើស្ត្រីជាប្រពន្ធយ៉ាងចាស់ដៃថែមទៀត បណ្តាលឲ្យជាំសុះសាច់លើរាងកាយ ។
ក្រោយវាយបានមួយថ្ងៃស្ត្រីរងគ្រោះជាប្រពន្ធដែលមានសរសៃខ្ចីទើបសម្រាលកូន បានកើតមានអការៈរឹងថ្គាម និងបានស្លាប់ ។
នៅនឹងមុខនគរបាលស្រុកចិត្របុរីបុរសជាប្តីដៃដល់បានឆ្លើយថា កន្លងមករូបគេមិន ដែលបង្កហិង្សាទៅលើស្ត្រីជាប្រពន្ធបែបនះនោះទេ ។ ហើយថ្ងៃកើតហេតុដោយសារ តែខ្លួន ខឹង នឹងស្ត្រីជាប្រពន្ធជេរប្រមាថពេកក៏ជ្រុលដៃវាយដោយមិនដឹងថា បណ្តាលឲ្យស្លាប់បែបនេះ នោះទេ ៕
ចែករំលែកព័តមាននេះ