រាជធានីភ្នំពេញ ៖ ស្របពេលរបាំងពន្ធគយរវាងប្រទេសក្នុងតំបន់លែងជាឧបសគ្គសម្រាប់ការនាំចេញ, ភូតគាមអនាម័យបានក្លាយជាបញ្ហាចម្បងវិញម្ដងសម្រាប់ការនាំចេញទៅវិញទៅមកជាមួយបណ្ដាប្រទេសក្នុងតំបន់។ ដោយសារតែបញ្ហានេះ ទីភ្នាក់ងារកិច្ចសហប្រតិបត្តិការអន្តរជាតិ អាល្លឺម៉ង់ ហៅកាត់ថាGIZ ដែលតែងតែធ្វើកិច្ចការលើសុវត្ថិភាពចំណីអាហារក្នុងតំបន់អាស៊ាន បានរៀបចំឲ្យមានកិច្ចពិភាក្សាមួយរវាងប្រទេសកម្ពុជា ថៃ និងវៀតណាម ដើម្បីស្វែងរកដំណោះស្រាយលើបញ្ហារួម ។
ថ្លែងនៅក្នុងកិច្ចពិភាក្សាថ្នាក់តំបន់នៅសណ្ឋាគារសាន់វ៉េ កាលពីព្រឹកថ្ងៃទី២៦ មេសា ម្សិលមិញ លោកស្រីបណ្ឌិត ចាន់ ផលលឿន អគ្គនាយិការងនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ថា កិច្ចពិភាក្សានេះ ក្នុងគោលបំណងធ្វើឲ្យមានភាពបន្ស៊ីគ្នាសម្រាប់ពាណិជ្ជកម្មរវាងប្រទេសកម្ពុជា ថៃ និងវៀតណាម ។
លោកស្រីបន្តថា ៖« ជាជំហានដំបូង យើងជួបពិភាក្សាជាមួយប្រទេសបី ហើយនៅពេលដែលយើងដោះស្រាយបានហើយ យើងនឹងបន្តទៅពិភាក្សាជាមួយប្រទេសផ្សេងទៀតក្នុងតំបន់អាស៊ាន ដើម្បីជំរុញឲ្យការនាំចេញ-នាំចូលទៅវិញទៅមក កាន់តែងាយស្រួល » ។
លោកស្រីបន្តថា នៅក្នុងកិច្ចពិភាក្សាជំហានដំបូងនេះដែរ ក្រុមការងារនឹងលើកយកផ្លែឈើចំនួន៦មុខប៉ុណ្ណោះមកពិភាក្សា និងដោះស្រាយ ហើយត្រូវរកដំណោះស្រាយយ៉ាងណាពីភូតគាមអនាម័យ ដើម្បីធានាពីសុវត្ថិភាពតាមប្រទេសនីមួយៗ ។ ផ្លែឈើ៦មុខដែលកម្ពុជា ថៃ និងវៀតណាមលើកយកមកពិភាក្សារួមមាន ផ្លែស្វាយ ចេក គូលេន ម្ទេស ផ្លែស្រកានាគ និងមៀន ។
លោកស្រីបន្ថែមថា ភូតគាមអនាម័យ សម្រាប់ប្រទេសនីមួយៗ ពិតជាមានសារសំខាន់ណាស់ ដោយមិនអាចខ្វះបានឡើយ ដូចនេះហើយប្រទេសនីមួយៗត្រូវតែពិនិត្យមើលពីផលិតផលមុននឹងនាំចេញ-នាំចូល ។ ជាឧទាហរណ៍ ប្រទេសកម្ពុជាមានភូតគាមអនាម័យល្អហើយ តែយើងនាំចូលផ្លែឈើពីប្រទេសជិតខាងមកផ្គត់ផ្គង់ដោយមិនពិនិត្យត្រឹមត្រូវ ជំងឺនៅក្នុងផ្លែឈើទាំងនោះ អាចនឹងឆ្លងរាលដាលទៅផ្លែឈើក្នុងស្រុក និងធ្វើឲ្យទិន្នផលធ្លាក់ចុះ ។
លោកស្រីបញ្ជាក់ថា ការនាំចេញផលិតផលកសិកម្ម មាននិន្នាការកើនឡើងជាលំដាប់ ហើយមានសន្ទុះខ្លាំងក្នុងរយៈពេល៥ឆ្នាំចុងក្រោយនេះ ។ ជាក់ស្ដែង ក្នុងឆ្នាំ២០១៦ ការនាំចេញផលិតផលកសិកម្មមានចំនួនជាង៣,៦លានតោន ហើយក្នុងឆ្នាំ២០១៧ សម្រេចបានចំនួន៥,១លានតោន ។
លោកស្រីបញ្ជាក់បន្ថែមថា ៖« ក្នុងឆ្នាំ២០១៧ កម្ពុជាបាននាំចេញផលិតផលកសិកម្ម ១៧ប្រភេទទៅកាន់ប្រទេសថៃ ដែលមានបរិមាណ៣លានតោន ។ ចំណែកប្រទេសវៀតណាម ផលិតផលកសិកម្មកម្ពុជាចំនួន២៧ប្រភេទ បាននាំចេញទៅ និងមានបរិមាណសរុបជាង១លានតោន » ។
លោកស្រី Ute Dannenmann អ្នកគ្រប់គ្រងមូលនិធិGIZ បានមានប្រសាសន៍ផងដែរថា អ្វីដែលត្រូវពិភាក្សារួមក្នុងកិច្ចប្រជុំនាពេលនេះ គឺត្រូវឈ្វេងយល់ពីបរិមាណជាតិពុល ជាតិគីមីនៅក្នុងផ្លែឈើដែលបម្រុងនឹងនាំចេញទៅកាន់ប្រទេសណាមួយ ហើយក៏ត្រូវដឹងថា ប្រទេសទាំងនោះកំណត់យកបរិមាណសារធាតុគីមីនោះកម្រិតណា ដើម្បីឲ្យការនាំចេញរបស់ប្រទេសនីមួយៗមិនមានបញ្ហា និងឧបសគ្គ ។
លោកស្រីនិយាយថា ៖« ប្រទេសទាំងបីជាប្រទេសដែលមានសក្ដានុពលសម្រាប់នាំចេញបន្លែ និងផ្លែឈើទៅវិញទៅមក ក៏ដូចជានាំចេញទៅកាន់ទីផ្សារអន្តរជាតិដទៃទៀត ដូចនេះ ពួកគេត្រូវតែដឹងឲ្យបានច្បាស់ មុននឹងផលិតហើយនាំចេញ ដើម្បីកុំឲ្យខាតពេលវេលា ក្រោយពេលប្រទេសមួយទៀតបដិសេធផលិតផលដែលបាននាំចេញទៅ » ។
គួរបញ្ជាក់ថា តាមសេចក្តីប្រកាសរបស់ GIZ បានបង្ហាញថា ប្រទេសកម្ពុជា ថៃ និងវៀតណាម អាចនឹងមិនទាន់ប្រើប្រាស់សក្ដានុពលអស់ឲ្យពីលទ្ធភាព ដើម្បីបង្កើនទំហំពាណិជ្ជកម្មរបស់ពួកគេនៅឡើយ ។ ការសម្របសម្រួលពាណិជ្ជកម្ម ដោយឆ្លងកាត់នីតិវិធីពាណិជ្ជកម្មត្រឹមត្រូវ អាចកាត់បន្ថយពេលវេលា និងតម្លៃក្នុងការដឹកជញ្ជូនឆ្លងកាត់ព្រំដែន ដល់អ្នកផលិត ពាណិជ្ជករ ក៏ដូចជាអតិថិជន ជាពិសេស អ្នកក្រីក្រ ដែលអាចរកចំណូលបានបន្ថែមទៀត ដោយមានទីផ្សារថ្មីៗបន្ថែមសម្រាប់ផលិតផលកសិកម្ម ។ ម្យ៉ាងវិញទៀត គោលនយោបាយពង្រឹងសុវត្ថិភាពចំណីអាហារ ក៏អាចធ្វើឲ្យអ្នកប្រើប្រាស់ទទួលបានអារម្មណ៍សុវត្ថិភាព និងទទួលបានទំនិញដែលមានគុណភាពសម្រាប់ប្រើប្រាស់រាល់ថ្ងៃ ៕
ចែករំលែកព័តមាននេះ