រាជធានីភ្នំពេញ ៖ ការផ្តល់ការអនុគ្រោះពន្ធនាំចូលទំនិញទៅសហរដ្ឋអាមេរិកជាថ្មីសម្រាប់កម្ពុជា ស្ថិតក្នុងក្របខ័ណ្ឌប្រទេសកំពុងអភិវឌ្ឍន៍តិចតួច ជាកាលានុវត្តភាពថ្មីមួយសម្រាប់កម្ពុជាអភិវឌ្ឍន៍សេដ្ឋកិច្ចរបស់ខ្លួន ។ លោក ប៉ែន សុវិជាតិ អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេសនៃក្រសួងពាណិជ្ជកម្ម…
រាជធានីភ្នំពេញ ៖ ការផ្តល់ការអនុគ្រោះពន្ធនាំចូលទំនិញទៅសហរដ្ឋអាមេរិកជាថ្មីសម្រាប់កម្ពុជា ស្ថិតក្នុងក្របខ័ណ្ឌប្រទេសកំពុងអភិវឌ្ឍន៍តិចតួច ជាកាលានុវត្តភាពថ្មីមួយសម្រាប់កម្ពុជាអភិវឌ្ឍន៍សេដ្ឋកិច្ចរបស់ខ្លួន ។
លោក ប៉ែន សុវិជាតិ អគ្គនាយកនៃអគ្គនាយកដ្ឋានពាណិជ្ជកម្មក្នុងប្រទេសនៃក្រសួងពាណិជ្ជកម្ម បានថ្លែងតាមទូរស័ព្ទនាព្រឹកថ្ងៃទី២៦ មេសា ម្សិលមិញថា ប្រព័ន្ធអនុគ្រោះពន្ធនេះ សហរដ្ឋអាមេរិកបានផ្តល់ជូនកម្ពុជា ចាប់តាំងពីដើមទសវត្សរ៍ទី៩០ ហើយប្រព័ន្ធបែបនេះ សហរដ្ឋអាមេរិកតែងតែធ្វើរៀងរាល់២ឆ្នាំម្តង ដើម្បីពិនិត្យលើមុខទំនិញផ្តល់ការអនុគ្រោះពន្ធដល់ប្រទេសនីមួយៗដែលស្ថិតក្នុងប្រទេសអភិវឌ្ឍន៍តិចតួច ដើម្បីនាំទំនិញចូលសហរដ្ឋអាមេរិក ។
លោកបន្តថា ៖« ក្នុងចំណោមទំនិញទាំងនោះ កម្ពុជាផលិតបានខ្លះ និងទំនិញខ្លះកម្ពុជាមិនទាន់មានលទ្ធភាពផលិតបានខ្លួនឯងទេ ប៉ុន្តែជារួម ការផ្តល់ការអនុគ្រោះបែបនេះ ជាការផ្តល់ផលចំណេញដល់កម្ពុជា ដើម្បីទាក់ទាញអ្នកវិនិយោគមកវិនិយោគលើមុខទំនិញទាំងនោះ ដើម្បីនាំចេញទៅសហរដ្ឋអាមេរិក » ។
លោកសុវិជាតិ បានបន្តថា ៖« កន្លងមកសហរដ្ឋអាមេរិកបានផ្តល់ការអនុគ្រោះលើមុខទំនិញប្រមាណ៥.០០០មុខដល់កម្ពុជា ប៉ុន្តែមិនមែនរាល់មុខទំនិញទាំងនោះ សុទ្ធតែអនុគ្រោះពន្ធទាំងអស់ទេ គឺមានទំនិញមួយចំនួនក៏បានគិតពន្ធក្នុងកម្រិតតិចតួចផងដែរ » ។
សហរដ្ឋអាមេរិកបានផ្តល់ជូនកម្ពុជានូវប្រព័ន្ធអនុគ្រោះលើមុខទំនិញនាំចេញនេះ បានធ្វើឡើងតាំងពីដើមទសវត្សរ៍ទី៩០ មុនពេលកម្ពុជាបានចូលជាសមាជិកអង្គការពាណិជ្ជកម្មពិភពលោក ។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានថ្លែងថា ការផ្តល់កូតាពីសហរដ្ឋអាមេរិក ដើម្បីប្រទេសអភិវឌ្ឍន៍តិចតួច រួមទាំងកម្ពុជានេះ ពិតជាផ្តល់នូវផលចំណេញដល់កម្ពុជា ដើម្បីទាក់ទាញអ្នកវិនិយោគមកផលិតទំនិញទាំងនោះនាំចេញទៅកាន់សហរដ្ឋអាមេរិក ។
លោកបន្តថា ការដំឡើងពន្ធទំនិញរបស់សហរដ្ឋអាមេរិកជាមួយប្រទេសចិន និងប្រទេសដទៃទៀតលើមុខទំនិញមួយចំនួនដូចជា ដែកថែប និងអាលុយមីញ៉ូម ជាដើម សុទ្ធតែផ្តល់ផលចំណេញដល់កម្ពុជា ទាក់ទាញអ្នកវិនិយោគចិន និងអ្នកវិនិយោគដទៃទៀតមកផលិតនៅកម្ពុជា ដើម្បីនាំចេញ ។
យោងតាមសេចក្តីជូនដំណឹងរបស់ក្រសួងពាណិជ្ជកម្មបានឲ្យដឹងថា រដ្ឋបាលលោក ដូណាល់ ត្រាំ ប្រធានាធិបតីអាមេរិក បានចុះហត្ថលេខាលើច្បាប់ស្តីពី H R 1625 The consolidated Appropriations Act 2018 ដើម្បីបន្តឡើងវិញនៃប្រព័ន្ធអនុគ្រោះពន្ធទូទៅ ដោយភ្ជាប់ជាមួយការធ្វើប្រតិសកម្ម ។ ការបន្តឡើងវិញនៃប្រព័ន្ធអនុគ្រោះទូទៅនេះ នឹងចូលជាធរមានពីថ្ងៃទី១ មករា ដល់ថ្ងៃទី៣១ ធ្នូ ឆ្នាំ២០២០ ។ អ្នកនាំចូលទៅសហរដ្ឋអាមេរិក គិតចាប់ពីថ្ងៃទី១ មេសា អាចមកស្នើសុំដកប្រាក់ពន្ធ ដែលបានបង់ពន្ធរួចវិញបាន តាមការជូនដំណឹងរបស់តំណាងពាណិជ្ជកម្មសហរដ្ឋអាមេរិក ។
ទាក់ទងនឹងការបន្ដអនុគ្រោះពន្ធទូទៅរបស់សហរដ្ឋអាមេរិកដល់កម្ពុជានេះ បើតាមលោក ឡុង កែមវិចិត្រ មន្ត្រីអ្នកនាំពាក្យក្រសួងពាណិជ្ជកម្ម បានឱ្យដឹងថា ប្រព័ន្ធអនុគ្រោះពន្ធទូទៅ(GSP) របស់សហរដ្ឋអាមេរិក កន្លងមកមានសុពលភាព៣ឆ្នាំ ។ ហេតុនេះ បន្ទាប់ពី២ឆ្នាំហើយ សហរដ្ឋអាមេរិកត្រូវការរយៈពេលដើម្បីពិភាក្សាពិនិត្យឡើងវិញ និងអនុម័តលើGSPថ្មី ដែលកន្លងមកមិនដែលផ្អាក តែជាការអស់សុពលភាព ដែលបន្ទាប់ពីការចូលជាធរមាននូវGSPថ្មី នឹងមានប្រតិសកម្មទៅលើការនាំចេញក្នុងកំឡុងពេលផុតសុពលភាពនោះ ។
បញ្ជាក់ថា ៖« កម្ពុជាទទួលបានការអនុគ្រោះពន្ធពីសហរដ្ឋអាមេរិកប្រមាណ៨២,៦%នៃបន្ទាត់ពន្ធរបស់ខ្លួន ដែលសុទ្ធតែជាផលិតផលដែលកម្ពុជាមិននាំចេញ ឬនាំចេញតិចតួច ។ ក្នុងនោះមានតែទំនិញសម្រាប់ធ្វើដំណើរ (Travelling Goods) ដែលកម្ពុជាបាននាំចេញច្រើន ហើយGSPរបស់សហរដ្ឋអាមេរិកនេះ មានរយៈពេល៣ឆ្នាំ ចាប់ពីថ្ងៃទី១ មករា ២០១៨ ដល់៣១ ធ្នូ ២០២០» ។
តាមប្រភពទិន្នន័យរបស់សហរដ្ឋអាមេរិក ផ្តល់ដោយក្រសួងពាណិជ្ជកម្ម បានឱ្យដឹងថា ទំហំពាណិជ្ជកម្មរវាងកម្ពុជា និងសហរដ្ឋអាមេរិក នៅឆ្នាំ២០១៧ មានប្រមាណ៣.៤៦៤លានដុល្លារ ក្នុងនោះកម្ពុជានាំចេញមានទឹកប្រាក់ ៣.០៦៤លានដុល្លារ ហើយសហរដ្ឋអាមេរិកនាំចេញមកវិញមានតែ៤០០លានដុល្លារប៉ុណ្ណោះ ៕
ចែករំលែកព័តមាននេះ