រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងការបង្កើតគណបក្សឆន្ទៈខ្មែររបស់ក្រុមគ្រួសារលោកគង់ គាំនេះដោយសារ តែក្រុមគ្រួសារលោកអស់ជំនឿលើកអតីតបក្សសង្គ្រោះជាតិ ដែលតែងតែបរាជ័យក្នុងការបោះឆ្នោតកន្លងមកនេះ ។ ការអះអាងនេះស្របទៅនឹងគំនិតរបស់កូនប្រុសលោកគង់…
រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជាលោកសុខ ឥសាន បានអះអាងការបង្កើតគណបក្សឆន្ទៈខ្មែររបស់ក្រុមគ្រួសារលោកគង់ គាំនេះដោយសារ តែក្រុមគ្រួសារលោកអស់ជំនឿលើកអតីតបក្សសង្គ្រោះជាតិ ដែលតែងតែបរាជ័យក្នុងការបោះឆ្នោតកន្លងមកនេះ ។
ការអះអាងនេះស្របទៅនឹងគំនិតរបស់កូនប្រុសលោកគង់ គាំ ដែលអះអាងថា ការបង្កើតគណបក្សថ្មី « ឆន្ទៈខ្មែរ» មកពីអស់ជំនឿងលើគណបក្សសង្គ្រោះជាតិដែលត្រូវបានតុលាការរំលាយកន្លងមកនេះ ។
លោកសុខឥសាន បានឲ្យដឹងនៅថ្ងៃទី២៧ ខែមេសាតាមប្រព័ន្ធសារតេឡេក្រាមប្រាប់កោះសន្តិភាពឲ្យដឹងថា ជម្រៅចិត្តមនុស្សមិនអាចវាស់បានមែន ។ នៅក្រោយពេលដែលលោក គង់ មុនីកាបង្កើតគណបក្សឈ្មោះថា គណបក្សឆន្ទៈខ្មែរ ដើម្បីចូលរួមប្រកួតប្រជែងក្នុងការបោះឆ្នោតនាពេលឆាប់ៗខាងមុខនេះ មានអតីតមន្ត្រីអតីតបក្សប្រឆាំងមួយរូបបានសម្តែងការខកចិត្តយ៉ាងខ្លាំង ហាក់មិនចង់ឲ្យមានការបង្កើតបក្សថ្មី ។ ការលើករបស់លោកសុខ ឥសានសំដៅទៅរកលោកអេង ឆៃអ៊ាង ដែលបានចំអកទៅកាន់ក្រុមគ្រួសារលោកគង់ គាំ ថា ការបង្កើតគណបក្សឆន្ទៈខ្មែរ ដើម្បីគ្រួសារ និងទ្រព្យសម្បត្តិ ។
យ៉ាងណាក្តីលោកសុខ ឥសានបានអះអាងថា លើកឡើងរបស់អតីតមន្ត្រីបក្សប្រឆាំងនេះបានបោះសម្តីថា ជម្រៅទឹកសមុទ្រគេអាចវាស់បាន តែជម្រៅចិត្តមនុស្សគេមិនអាចវាស់បានឡើយ ។ ការបង្កើតបក្សថ្មីនេះ និងបក្សផ្សេងៗទៀត ដើម្បីប្រកួតប្រជែងការបោះឆ្នោត បញ្ជាក់ច្បាស់ថា កុំយល់ច្រឡំឲ្យសោះ នៅក្នុងប្រទេសកម្ពុជា មិនមែនមានតែអតីតបក្សប្រឆាំងមួយផ្តាច់មុខទេ នៅមានបក្សជាច្រើនទៀត អាចថា ជាបក្សប្រឆាំងដែរ ។ ម្យ៉ាងទៀត ឃើញគេនៅស្ងៀមមិនមែនគេចេះតែដើរតាមខ្លួនដែលដឹកនាំបរាជ័យរហូតនោះទេ ។
លោកបញ្ជាក់ថា «ការបង្កើតបក្សថ្មីក៏ជាការទាញពញ្ញាក់ស្មារតី ក្រុមអតីត មេដឹកនាំអតីតបក្សប្រឆាំងកុំឲ្យមានមោទនភាពបុគ្គលខ្លាំងពេក បើក្រៅពីខ្លួនគ្មានអ្នកណាអាចបង្កើតបក្សថ្មីបាននោះ ។ ក្រុមអស់លោកមិនអាចបិទសិទ្ធិពលរដ្ឋខាងនយោបាយបានជាដាច់ខាត » ។
ការលើកឡើងរបស់អ្នកនាំពាក្យបក្សកាន់អំណាចនេះស្របពេលដែលអគ្គលេខាធិការរងនៃគណបក្សឆន្ទៈខ្មែរ លោកហ៊ីង យឿន ត្រូវបានវិទ្យុអាស៊ីសេរី ស្រង់សម្តីយ៉ាងដូច្នេះថា ការបង្កើតបក្សថ្មីនេះ ដោយសារមិនសង្ឃឹមទៅលើការរស់ឡើងវិញនៃគណបក្សសង្គ្រោះជាតិ ខណៈដែលការបោះឆ្នោតខិត ជិតមកដល់ ។
លោកបន្តថា បក្សថ្មីនេះមិនទាន់បានគិតអំពីប្រភពធនធានថវិកាសម្រាប់ទ្រទ្រង់បក្សនោះទេ ប៉ុន្តែមានការគាំទ្រយ៉ាងពេញទំហឹងពីលោកគង់ គាំ ជាឪពុក ។ លើសពីនេះការបង្កើតបក្សថ្មីនេះ គឺជានិមិត្តរូបនៃ គណបក្សសង្គ្រោះជាតិ ដូច្នេះលោកសង្ឃឹមថា នឹងមានសំឡេងគាំទ្រចាស់ ដើម្បីផ្លាស់ប្ដូររបបសម្តេ តេជោហ៊ុន សែន និងស្ដារលទ្ធិប្រជាធិបតេយ្យឡើងវិញ ។ ទន្ទឹមគ្នានេះលោកហ៊ីង យឿនបន្តថា លោកមិនខ្វល់អំពីការរិះគន់យ៉ាងណានោះទេ ។ ចំណែកអតីតតំណាងរាស្ត្រគណបក្សសង្គ្រោះជាតិ លោក គង់ បូរ៉ា ដែលជាបងប្រុសបង្កើតលោក គង់ មុនីកា ក៏ប្រកាសគាំទ្រ ការបង្កើតគណបក្សថ្មីរបស់ប្អូន របស់លោក ។
លោក គង់ បូរ៉ា មានប្រសាសន៍ថា នៅក្នុងដំណាក់កាលនេះ គឺគណបក្សអស់សង្ឃឹមថា គណបក្សសង្គ្រោះជាតិនឹងអាចចូលប្រកួតប្រជែងបោះឆ្នោតបាន ដូច្នេះប្អូនប្រុសរបស់លោកបង្កើតបក្សថ្មីនេះ ដើម្បី ប្រមូលអ្នកប្រជាធិបតេយ្យមកវិញ ។
ទាក់ទិននឹងការបង្កើតគណបក្សឆន្ទៈខ្មែរនេះដែរលោក គង់ មុនីកាបានឲ្យដឹង ថាកាលពីរសៀលថ្ងៃទី២៦ខែមេសា កន្លងមកនេះលោកបានយកលិខិតស្នើចុះបញ្ជីគណបក្សនយោបាយដាក់នៅក្រសួងមហាផ្ទៃរួចហើយ ប៉ុន្តែនៅស្នាមមេដាយមិនទាន់បាននៅឡើយទេ ។
ចំណែកលោក ខៀវ សុភ័កអ្នកនាំពាក្យក្រសួងមហាផ្ទៃបានឲ្យដឹងថា ក្រសួងមហាផ្ទៃបានទទួលសំណើររបស់លោកគង់ មុនីការួចហើយ កាលពីរសៀលថ្ងៃទី២៦ មេសា សំណើរចុះបញ្ជីឈ្មោះគណបក្សនយោបាយរួចកាលថ្ងៃទី២៦ មេសា ឆ្នាំ២០១៨ ។
អ្នកនាំពាក្យក្រសួងមហាផ្ទៃបានបញ្ជាក់ថា «យើងបានទទួលលិខិតស្នើសុំរួចហើយ កាលពីម្សិល យើងចាត់ចែងហើយ ។ ប៉ុន្តែមិនទាន់ទទួលបានស្នាមមេដាយនោះទេ ។ យើងទទួលបានអស់ហើយ ប៉ុន្តែនៅស្នាមមេដាយដោយតម្រូវឲ្យចាប់ពី៤ពាន់ឡើងទៅ ។ ពេលវេលានៅយូរជាងកន្លះខែទៀត » ។
សូមជម្រាបថា បើតាមមន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោតធ្លាប់បានឲ្យដឹងថា បច្ចុប្បន្នគណបក្សនយោបាយដែលចុះបញ្ជីផ្លូវការនៅក្រសួងមហាផ្ទៃមានចំនួន៣៧ គណបក្ស ។ គណបក្សខ្លះបានត្រៀមខ្លួនសម្រាប់ចូលរួមបោះឆ្នោតជ្រើសតាំងអ្នកតំណាងរាស្ត្រនៅក្នុងខែកក្កដា ឆ្នាំ២០១៨ នេះរួចហើយផងដែរ ៕
ចែករំលែកព័តមាននេះ