ខេត្តបាត់ដំបង ៖ សេចក្ដីរាយការណ៍បឋមបានឱ្យដឹងថា កម្មករបេះផ្លែស្វាយម្នាក់បានធ្លាក់ពីលើរថយន្ត ហើយត្រូវរថយន្តកិន បណ្ដាលឱ្យរងរបួសធ្ងន់ តែបានស្លាប់ពេលបញ្ជូនដល់មន្ទីរពេទ្យ ។ ហេតុការណ៍នេះបានកើតឡើងនៅវេលាម៉ោង០៦ និង៤៥នាទីព្រឹកថ្ងៃទី២៧ មេសា ស្ថិតត្រង់ចំណុចផ្លូវកោងមួយកន្លែង នៅក្នុងភូមិដង្គត់ ឃុំស្តៅ ស្រុករតន:មណ្ឌល ។
រថយន្តនោះម៉ាកហុីយ៉ាន់ដាយពណ៌.ស ពាក់ស្លាកលេខ ព្រះសីហនុ 3A-4972 អ្នកបើកបរឈ្មោះស្រិន គ្រុយ អាយុ៣៥ឆ្នាំ រស់នៅភូមិបឹងព្រីង ឃុំអង្កាញ់ ស្រុកព្រៃកប្បាស់ ខេត្តតាកែវ ។ រីឯជនរងគ្រោះខាងលើ ឈ្មោះ យ៉ែម រត្ថ័ អាយុ១៨ឆ្នាំ រស់នៅភូមិស្វាយស្រណោះ ឃុំរការគរ ស្រុកកងមាស ខេត្តកំពង់ចាម។
សមត្ថកិច្ចបានឱ្យដឹងថា រថយន្តនេះបានដឹកកម្មករបេះផ្លែស្វាយ ដែលទំនងបើកលឿនគួរសម លុះដល់ចំណុចដែលមានផ្លូវកោង ក៏ធ្លាក់កម្មករពីលើរថយន្ត ហើយត្រូវរថយន្តកិនតែម្ដង។ ប៉ុន្តែដំបូងជនរងគ្រោះរងរបួសធ្ងន់ តែពេលបញ្ជូនដល់មណ្ឌលសុខភាពស្រុក ដើម្បីសង្គ្រោះបន្ទាន់អកុសលជនរងគ្រោះបានដាច់ខ្យល់ស្លាប់តែម្ដងទៅ។
បច្ចុប្បន្ន ទាំងរថយន្តដឹកកម្មករទាំងអ្នកបើកបរ ត្រូវបានឃាត់ទុកនៅអធិការនគរបាលស្រុករតន:មណ្ឌលបណ្ដោះអាសន្ន ដើម្បីដោះស្រាយតាមនីតិវិធីច្បាប់ ៕
ចែករំលែកព័តមាននេះ