ទីក្រុងសិង្ហបុរី ៖ ប្រទេសសិង្ហបុរីនឹងបង្កើនជំនួយអភិវឌ្ឍន៍ផ្នែកសមុទ្រដល់ប្រទេសដទៃទៀត ដោយចាប់ផ្តើមធ្វើកិច្ចសហប្រតិបត្តិការផ្នែកបច្ចេកទេសរយៈពេល៥ឆ្នាំ និងវគ្គហ្វឹកហាត់សម្រាប់អង្គការសមុទ្រអន្តរជាតិ (IMO) ជាមួយប្រទេសជាសមាជិក ។
កម្មវិធីនេះបានចាប់ផ្តើមដោយរដ្ឋមន្ត្រីដឹកជញ្ជូនសិង្ហបុរី លោក Khaw Boon Wan កាលពីថ្ងៃពុធ កន្លងមកនេះ ។ វាមានតម្លៃប្រមាណ៤,៩លានដុល្លារ ហើយនឹងអនុញ្ញាតឲ្យប្រទេសសិង្ហបុរីអាចបង្កើនការអភិវឌ្ឍសមត្ថភាព និងធនធានមនុស្សសម្រាប់ផ្នែកនេះ ។
កម្មវិធីនេះមានផ្តល់ជាអាហារូបករណ៍ សិក្ខាសាលា និងម៉ោងសិក្សាបន្ថែមពីលើគោលការណ៍កម្មវិធីហ្វឹកហាត់ទី៣របស់ប្រទេស ដែលបានអនុម័តកាលពីឆ្នាំ១៩៩៨ ។
គោលការណ៍នេះអនុញ្ញាតឲ្យប្រទេសសិង្ហបុរី និងអង្គការសមុទ្រអន្តរជាតិ សហការផ្តល់ជំនួយបច្ចេកទេស ដើម្បីជួយដល់សមាជិកជាប្រទេសកំពុងអភិវឌ្ឍន៍មានជំនាញអនុម័តវិធានការ និងស្តង់ដាផ្សេងៗ ។
រដ្ឋមន្ត្រីដឹកជញ្ជូនសិង្ហបុរី លោក Khaw បានថ្លែងថា ៖« ពួកយើងជឿជាក់លើការតបស្នងទៅថ្ងៃមុខ និងការចែករំលែកបទពិសោធន៍ជាមួយអ្នកដទៃ » ។
លើសពីនេះ ប្រទេសសិង្ហបុរីនឹងផ្តល់ម៉ោងហ្វឹកហាត់បន្ថែម និងបើកទូលាយដល់អ្នកចូលរួមបន្ថែមទៀតផងដែរ ។
ប្រទេសនេះក៏នឹងផ្តល់អាហារូបករណ៍ដល់មន្ត្រីក្នុងផ្នែកសមុទ្រ ឲ្យមកសិក្សានៅមហាវិទ្យាល័យ World Maritime និងវិទ្យាស្ថានជើងទឹកសមុទ្រ ក្នុងប្រទេសសិង្ហបុរីផងដែរ ។
ក្រៅពីនេះ ប្រទេសសិង្ហបុរីក៏នឹងខិតខំបង្កើនគុណភាពការហ្វឹកហាត់ភាពជាអ្នកដឹកនាំក្នុងផ្នែកសមុទ្រពិភពលោក ព្រមទាំងផ្តល់នូវឱកាសថ្មីៗសម្រាប់មន្ត្រីក្នុងវិស័យដើម្បីចូលរួមកម្មវិធីនេះ ៕
ចែករំលែកព័តមាននេះ