រាជធានីភ្នំពេញ ៖ កម្លាំងសមត្ថកិច្ចកងរាជអាវុធហត្ថរាជធានីភ្នំពេញ កាលពីរសៀលថ្ងៃទី២៤ មេសា ២០១៨ បានធ្វើការឃាត់ខ្លួនយុវជនម្នាក់អាយុ២៦ឆ្នាំ ដែលត្រូវបាននារីម្នាក់អាយុ២៥ឆ្នាំ ប្តឹងចោទប្រកាន់ថា យុវជនរូបនោះបានប្រព្រឹត្តអំពើគំរាមបង្ហោះរូបភាពវីដេអូរួមភេទជាមួយនាង។ តាមបណ្តឹងរបស់នារីរងគ្រោះ បានបញ្ជាក់ប្រាប់សមត្ថកិច្ចថានាងមានប្តីរួចទៅហើយ តែដោយការងារតម្រូវឱ្យត្រូវបានអង្គភាពចាត់ឲ្យនាងផ្លាស់ទៅធ្វើការឆ្ងាយពីប្តី ក្រោយមករូបនាងក៏មានទំនាក់ទំនងផ្លូវភេទជាមួយនឹងបុរសម្នាក់ធ្វើការជាមួយគ្នា ដែលបុរសនោះក៏មានប្រពន្ធរួចហើយដែរ។ មួយរយៈក្រោយមកនាងដឹងខ្លួនថា ប្រព្រឹត្តខុសប្រពៃណី ក៏សម្រេចចិត្តផ្តាច់ទំនាក់ទំនងជាមួយបុរសនោះ តែដោយកន្លងមកនាង និងបុរសនោះធ្លាប់បាន ថតរូបអាក្រាតរួមភេទជាមួយគ្នាដាក់ចូលទូរស័ព្ទដៃទើបធ្វើឲ្យបុរសនោះយករូបភាពវីដេអូមកគំរាមនាង ឲ្យរួមភេទជាមួយគ្នាជាបន្តបន្ទាប់។
តែមួយខែចុងក្រោយនេះនាង បានព្យាយាមគេចមិនជួបមុខ និងផ្តាច់ទំនាក់ទំនងផ្លូវភេទជាមួយគេ ទើបបានជាថ្ងៃទី២២ មេសា ២០១៨ ជនសង្ស័យបានផ្ញើសារមកគំរាមបង្ខំឲ្យនាងត្រូវតែទៅរួមភេទជាមួយគេទៀត បើមិនដូច្នោះទេ គេនឹងបង្ហោះរូបភាពវីដេអូរួមភេទនោះ ចូលក្នុងបណ្តាញសង្គមហ្វេសប៊ុក ឱ្យមហាជនបានឃើញ និង បានដឹងពីសកម្មភាពនោះ។ បន្ទាប់មកជនសង្ស័យបានណាត់នាងឲ្យទៅជួបក្នុងថ្ងៃទី២៣ មេសា ឆ្នាំ២០១៨ ជាកំហិត ដូច្នោះហើយបានជានាងសម្រេចចិត្តទៅប្តឹងសមត្ថកិច្ចកងរាជអាវុធហត្ថរាជធានី ភ្នំពេញឲ្យជួយអន្តរាគមន៍តែម្តងទៅ។
ឆ្លងតាមវិធានការជំនាញរបស់កម្លាំងកងរាជអាវុធហត្ថ ជនសង្ស័យត្រូវបានឃាត់ខ្លួន និងបានឆ្លើយសារភាពថា រូបគេពិតជាមានទំនាក់ទំនងផ្លូវភេទ ជាមួយនារីរងគ្រោះប្រាកដមែន ហើយថែមទាំងមានរូបភាពអាក្រាត និងវីដេអូរួមភេទជាមួយគ្នា ក្នុងទូរស័ព្ទដៃផងដែរ។ តែដោយរូបគេមានចិត្តស្រឡាញ់នារីរងគ្រោះខ្លាំងពេក មិនអាចបាត់មុខបាន ហើយនាងចេះតែឆ្លើយតបថារវល់មិនព្រមមកជួបខ្លួននោះទើបខ្លួនសម្រេចចិត្តផ្ញើសារជាអក្សរ និងសំឡេងសុំនាងរួមភេទ ដោយគំរាមថា បើនាងមិនព្រមមកទេ ខ្លួននឹងបង្ហោះរូបភាពវីដេអូ រួមភេទជាមួយគ្នា ជាសាធារណៈតាមបណ្តាញសង្គមហ្វេសប៊ុក។ ក្រោយមកនាងក៏បានយល់ព្រម និង បានណាត់ខ្លួនឲ្យទៅជួបនៅកន្លែងមួយ ក៏ត្រូវសមត្ថកិច្ចចាប់ខ្លួនតែម្តងទៅ និងក្រោយពីសមត្ថកិច្ចចាប់ខ្លួន សំណុំរឿង និងជនសង្ស័យ ត្រូវបានបញ្ជូនទៅកាន់សាលាដំបូងរាជធានីភ្នំពេញតាមនីតិវិធី៕
ចែករំលែកព័តមាននេះ