រាជធានីភ្នំពេញ ៖ យុវជនសង្ស័យម្នាក់បានធ្វើសកម្មភាពលួចកាច់សោកម៉ូតូម៉ាកហុងដាស្កូពីមួយគ្រឿង ពីក្នុងភូមិសាស្ត្រស្រុកបាទីខេត្តតាកែវបានសម្រេច។ បន្ទាប់មកបានជិះម៉ូតូនោះគេចខ្លួនចូលមក រាជធានីភ្នំពេញ ដើម្បីយកមកលក់នៅផ្សារឃ្លាំងរំសេវ សង្កាត់ទឹកល្អក់ទី៣ ខណ្ឌទួលគោក។ ប៉ុន្តែអំពើអាក្រក់នោះព្រះមិនជួយទេ ពោលគឺបានជួបកម្លាំងនគរបាលខណ្ឌដង្កោ កំពុងដាក់គោលដៅ អនុវត្តន៍ច្បាប់ចរាចរណ៍តាមផ្លូវ ឃើញម៉ូតូអត់មានស្លាកលេខ ហើយមើលទៅយុវជននោះស្ថិតនៅ ក្នុងស្ថានភាពគួរឲ្យសង្ស័យផងនោះ ក៏បានឃាត់ធ្វើការត្រួតពិនិត្យ រកឃើញឧបករណ៍សម្រាប់ កាច់សោម៉ូតូនៅជាប់ចង្កេះ ខណៈនោះនគរបាលក៏ចាប់ខ្លួននាំទៅសាកសួរទើបដឹងថាម៉ូតូនោះលួចគេ។ ការចាប់ខ្លួនខាងលើនោះបានធ្វើឡើងកាលពីវេលាម៉ោង៤ និង៣០នាទីល្ងាច ថ្ងៃទី២៦ ខែមេសា ឆ្នាំ២០១៨ នៅតាមផ្លូវ២១៧ ហៅផ្លូវចម្ការដូង ត្រង់ចំណុចមុខសាលាអគ្គីសនីកម្ពុជា ស្ថិតនៅក្នុងភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ។
នគរបាលបានឲ្យដឹងថា យុវជនសង្ស័យខាងម្នាក់នោះឈ្មោះ ងី ធារិទ្ធ អាយុ២២ឆ្នាំ មានទីលំនៅក្នុងភូមិត្រពាំងរោង ឃុំចំបក់ ស្រុកបាទី ខេត្តតាកែវ។ ចំណែកម៉ូតូដែល រូបគេធ្វើសកម្មភាពលួចបានហើយជិះយកទៅលក់នោះ ម៉ាកហុងដាស្កូពីពណ៌ស គ្មានស្លាកលេខ ហើយប្រសិនបើកម្លាំងឃាត់ខ្លួនមិនបានទេ ជននេះយកទៅលក់បានសម្រេចបាត់ទៅហើយ។ ប្រភពដដែលបានបន្តឲ្យដឹងទៀតថា នៅមុនពេលឈានដល់ការចាប់ខ្លួននោះ កម្លាំងបានដាក់គោលដៅ អនុវត្តន៍ច្បាប់ចរាចរណ៍ផ្លូវគោក និងត្រួតពិនិត្យអាវុធជាតិផ្ទុះនៅតាមផ្លូវលេខ២១៧ ហៅផ្លូវចម្ការដូង ត្រង់ចំណុចមុខសាលាអគ្គីសនី។ លុះក្រោយមកស្រាប់តែឃើញជនសង្ស័យខាងលើជិះម៉ូតូ១គ្រឿងនោះ ក្នុងទិសដៅពីត្បូងទៅជើងទៅដល់ ហើយដោយសារតែម៉ូតូអត់ស្លាកលេខ និងជិះក្នុងល្បឿនលឿន ហើយងាកឆ្វេងងាកស្ដាំឡេមឡាម គួរឲ្យសង្ស័យនោះទើបកម្លាំងនគរបាលឃាត់ដើម្បីត្រួតពិនិត្យ។
នគរបាលបានបន្តថា ពេលនោះបានប្រទះឃើញមានឧបករណ៍សម្រាប់កាច់សោកម៉ូតូ១កំប្លេ ដែលជននេះសៀតនៅចង្កេះទើបធ្វើការចាប់ខ្លួនយកទៅសួរនាំនៅអធិការដ្ឋាននគរបាលខណ្ឌដង្កោតែម្ដង។ ពេលនោះជនសង្ស័យបានសារភាពថា ខ្លួនពិតជាបានធ្វើសកម្មភាពកាច់សោម៉ូតូ១គ្រឿងនោះមែន ដោយលួចចេញពីម្ដុំខាងកើតផ្សារចំបក់ ស្រុកបាទី ខេត្តតាកែវ។ បន្ទាប់មកបានជិះចូលរាជធានីភ្នំពេញ ដើម្បីយកមកលក់នៅម្ដុំផ្សារឃ្លាំងរំសេវ សង្កាត់ទឹកល្អក់៣ ខណ្ឌទួលគោក ប៉ុន្តែអស់លក្ខណ៍ត្រូវនគរបាលខណ្ឌដង្កោធ្វើការចាប់ខ្លួនបានបែបនេះតែម្ដង។ ពេលនេះនគរបាល បានកំពុងកសាងសំណុំរឿងបញ្ជូនជនសង្ស័យខាងលើទៅកាន់តុលាការចាត់ការតាមច្បាប់ហើយ៕
https://youtu.be/MAVcQY_Sauc
ចែករំលែកព័តមាននេះ