រាជធានីភ្នំពេញ ៖ ចៅក្រមជំនុំជម្រះសាលាដំបូងរាជធានីភ្នំ លោក ហេង កេសរោ បានលើកយកសំណុំរឿងចៅប្រុសវាយសម្លាប់យាយបង្កើតរបស់ខ្លួន មកបើកសវនាការផ្តន្ទាទោស។ ប៉ុន្តែក្រោយពេលសាកសួរដេញដោលចប់សព្វគ្រប់ ចៅក្រមជំនុំជម្រះបានលើកពេលប្រកាសសាលក្រម ទៅថ្ងៃទី៩ ខែឧសភា ខាងមុខនេះវិញ។ ជនជាប់ចោទឈ្មោះ ឆាយ ស៊ីនហូ ភេទប្រុស អាយុ២៣ឆ្នាំ ត្រូវបានតំណាងអយ្យការចោទប្រកាន់ពីបទ(ឃាតកម្មគិតទុកជាមុន) លើយាយបង្កើតអាយុ៨៧ឆ្នាំ។
ប្រព្រឹត្តកាលពីយប់ថ្ងៃទី១៣ ខែសីហា ឆ្នាំ២០១៧ នៅចំណុចផ្ទះលេខ២៤ ផ្លូវ៥៩២ សង្កាត់បឹងកក់២ ខណ្ឌទួលគោក រាជធានីភ្នំពេញ តាមមាត្រា២០០ នៃក្រមព្រហ្មទណ្ឌ។ តាមការកត់សម្គាល់ឃើញថា នៅពេលសវនាការ ជនជាប់ចោទបានសារភាព ថានៅយប់ថ្ងៃកើតហេតុ ខ្លួនបានបើកដំបូលផ្ទះ ឡើងទៅអង្គុយលេង ពេលនោះយាយឃើញក៏ហៅឲ្យចុះមកវិញហើយខ្លួនបានខឹងក៏ចុះមកយកដំបងវាយ យាយចំនួន៥ដំបង រហូតដល់ស្លាប់ បន្ទាប់ពីវាយយាយសម្លាប់រួចក៏ត្រូវបងស្រីប្តឹងសមត្ថកិច្ចឲ្យចាប់ខ្លួន ភ្លាមតែម្តងទៅ។
លោក នាង ហៃ មេធាវីការពារជនជាប់ចោទបានសំណូមពរ ឲ្យតុលាការកែប្រែបទ ចោទប្រកាន់លើកូនក្តីលោកពីបទ (ឃាតកម្មគិតទុកជាមុន) ទៅជាបទ ឃាតកម្មវិញ ដោយសារអង្គហេតុនេះបង្ហាញថា កូនក្តីលោកមិនបានគិតទុកជាមុនទេ ពោលគឺខឹងភ្លាម វាយសម្លាប់ជនរងគ្រោះភ្លាម និងដោយសាររូបគេមានជំងឺសរសៃប្រសាទផងដែរ។ មួយទៀតការសារភាពរបស់ជនដៃដល់មិនបង្កភាពស្មុគស្មាញដល់តុលាការឡើយ ដូច្នេះសុំឲ្យតុលាការផ្តល់ភាពយុត្តិដល់ផង៕
ចែករំលែកព័តមាននេះ