រាជធានីភ្នំពេញ ៖ លោកនាយឧត្តមសេនីយខៀវ សុភ៌គ អ្នកនាំពាក្យក្រសួងមហាផ្ទៃបានថ្លែងប្រាប់កោះសន្តិភាពតាមទូរស័ព្ទកាលពីល្ងាចថ្ងៃទី២៦ ខែមេសា ឆ្នាំ២០១៨ថា លោកនាយឧត្តមសេនីយ៍នេត សារឿន អគ្គស្នងការនគរបាលជាតិបានសរសេរលិខិតទៅកាន់ភាគីថៃផ្លូវការហើយ ដើម្បីឲ្យបញ្ជូនជនជាប់ចោទឈ្មោះ សម សេរីមកទទួលទោសនៅកម្ពុជា បន្ទាប់ការអនុវត្តទោសនៅថៃ ។
ការលើកឡើងរបស់អ្នកនាំពាក្យក្រសួងមហាផ្ទៃបានធ្វើឡើង ក្រោយពីសមត្ថកិច្ចថៃបានឃាត់ខ្លួនជនសង្ស័យឈ្មោះ សម សេរីកាលពីថ្ងៃទី២៥ ខែមេសា ឆ្នាំ២០១៨នេះ ក្នុងប្រទេសថៃ។ លោកថា៖«លោកសម សេរីត្រូវបានតុលាការកម្ពុជាកាត់ទោសកំបាំងមុខ ដាក់ពន្ធនាគារចំនួន៩ឆ្នាំ ពីបទភេរវកម្មកាលពីឆ្នាំ២០១៣» ។ តែការបញ្ជូនមកកម្ពុជានៅពេលណានោះសម្រេចលើភាគីថៃ ។
ប្រភពព័ត៌មានពីនគរបាលក្រសួងមហាផ្ទៃថា នៅវេលាម៉ោងប្រមាណ៩-១០ព្រឹក ថ្ងៃទី២៥ ខែមេសា ឆ្នាំ២០១៨ សមត្ថកិច្ចរបស់ថៃបានចាប់ឃាត់ខ្លួនលោក សម សេរី ប្រធានចលនារណសិរ្សរំដោះជាតិខ្មែរ ដែលកំពុងមានវត្តមាននៅក្នុងទឹកដីថៃនេះ ។ មន្ត្រីជាន់ខ្ពស់នគរបាលកម្ពុជារូបនោះបានបញ្ជាក់ថា រដ្ឋាភិបាលកម្ពុជាកំពុងទំនាក់ទំនងទៅកាន់អាជ្ញាធរថៃ ដើម្បីនាំខ្លួនលោក សម សេរី មកទទួលទោសកម្ពជាដែរ ។ តាមរយៈវិទ្យុអាស៊ីសេរីនៅថ្ងៃទី២៥ ខែមេសា ឆ្នាំ២០១៨នេះ បានឲ្យដឹងថា «លោក សម សេរី បានផ្ញើសារអ៊ីម៉ែលមកកាន់អាស៊ីសេរីមុនការចាប់ខ្លួនថា សមត្ថកិច្ចថៃបានឃាត់ខ្លួនលោក នៅពេលលោកកំពុងបន្តទិដ្ឋាការស្នាក់នៅក្នុងប្រទេសថៃ ។
មនុស្សជំនិតរបស់លោក សម សេរី ម្នាក់សុំមិនបញ្ចេញឈ្មោះដោយបារម្ភពីសុវត្ថិភាពបានប្រាប់អាស៊ីសេរីតាមទូរស័ព្ទថា លោក សម សេរី ត្រូវបានសមត្ថកិច្ចថៃបញ្ជូនទៅឃុំខ្លួននៅមន្ទីរឃុំឃាំងមួយកន្លែង នៅក្នុងទីក្រុងបាងកកហើយ» ។
គួរកត់សំគាល់ថា កាលពីថ្ងៃទី១០ ខែមេសា ឆ្នាំ២០១៨ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានទម្លាយថា ក្រុមជនធ្វើសកម្មភាពប្រឆាំងរាជរដ្ឋាភិបាលកម្ពុជាដឹកនាំដោយបុគ្គលឈ្មោះ «សម សេរី» ដែលមានមូលដ្ឋាននៅប្រទេសដាណឺម៉ាកបានរៀបចំផែនការបំផ្លាញការសប្បាយរបស់ប្រជាពលរដ្ឋខ្មែរក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនេះ ។
ប៉ុន្តែបញ្ហាទាំងអស់នេះត្រូវបានសម្តេចតេជោ ហ៊ុន សែន ដឹងរួចរាល់ហើយ ព្រមទាំងបានរៀបចំវិធានការរក្សាសន្តិសុខតឹងរឹងបំផុត មិនឲ្យបំណងទុច្ចរិតរបស់ក្រុមជន ដែលសម្តេចហៅថា ជនក្បត់ជាតិនេះធ្វើបានសម្រេចនោះឡើយ ។ មានការកត់សម្គាល់ទៀតថា នៅមុនបុណ្យចូលឆ្នាំខ្មែរមានព័ត៌មានដែលអះអាងថា ក្រុមភេរវករគ្រោងដាក់គ្រាប់ផ្ទុះនៅម្តុំវត្តភ្នំ និងខេត្តសៀមរាបក្នុងប្រទេសកម្ពុជា ។ តែសមត្ថកិច្ចកម្ពុជាបានដាក់ការការពារសន្តិសុខជូនប្រជាពលរដ្ឋបានល្អបំផុត ។ គេបានដាក់ការសង្ស័យលើក្រុមរបស់សម សេរីដែលបានរៀបចំគម្រោងនេះដូចដែលគេធ្លាប់បានដាក់រំសេវនៅស្តូបអនុស្សាវរីយ៍មិត្តភាពកម្ពុជាមុខវត្តបុទុមមិនបានសម្រេច កាលពីកំឡុងឆ្នាំ២០០៧ ។
មុនចូលឆ្នាំខ្មែរឆ្នាំនេះស្ថានទូតសហរដ្ឋអាមេរិកប្រចាំនៅរាជធានីភ្នំពេញនៃព្រះរាជាណាចក្រកម្ពុជា បានចេញសេចក្តីថ្លែងការណ៍មួយថា អាចនឹងមានការបង្កៃគ្រឿងផ្ទុះ នៅអំឡុងពិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខនេះ ។ នេះបើតាមការបង្ហោះសារដោយ Facebook Page ផ្លូវការរបស់ស្ថានទូតអាមេរិកនៅថ្ងៃទី១១ ខែមេសា ឆ្នាំ២០១៨ ។
បើតាមសេចក្តីថ្លែងការណ៍ខាងលើនាពេលពេលកន្លងមកនេះមានសេចក្តីរាយការណ៍ព័ត៌មានថា សកម្មជនមួយក្រុម ប្រហែលជាអាចប៉ុនប៉ងបង្កៃគ្រឿងផ្ទុះនៅក្បែររមណីយដ្ឋានវត្តភ្នំ ក្នុងរាជធានីភ្នំពេញ ឬក៏នៅតាមទីតាំងដែលជាគោលដៅសម្រាប់មនុស្សជួបជុំកម្សាន្តដទៃទៀត របស់ទីក្រុងភ្នំពេញ ឬខេត្តសៀមរាម នៃប្រទេសកម្ពុជា នាអំឡុងឱកាសបុណ្យ ចូលឆ្នាំខ្មែរ ដែលនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០១៨ ។
ជុំវិញដំណឹងដ៏ភ្ញាក់ផ្អើលនេះ បុគ្គលិករដ្ឋាភិបាលអាមេរិកទាំងអស់ដែលបម្រើការនៅក្នុងប្រទេសកម្ពុជាត្រូវបានណែនាំឲ្យបង្កើនការប្រុងប្រយ័ត្នខ្ពស់នៅជុំវិញតំបន់វត្តភ្នំ និងត្រូវប្រយ័ត្នប្រយែងជាប់ជានិច្ច ចំពោះស្ថានភាពជុំវិញខ្លួនរបស់ពួកគេជាទូទៅតែម្តង ។ សេចក្តីថ្លែងការណ៍ដដែលបានបន្ថែមយ៉ាងដូច្នេះថា «សកម្មភាពដែលត្រូវធ្វើនោះ គឺត្រូវមានភាពប្រុងប្រយ័ត្ននៅតាមតំបន់ដែលមានមនុស្សកកកុញច្រើន ប្រសិនបើប្រទះឃើញវត្ថុគេទុកចោលគួរឲ្យសង្ស័យចាកចេញពីទីនោះជាបន្ទាន់ តាមដានការវិវត្តន៍ស្ថានការណ៍ថ្មីៗ ពីប្រព័ន្ធផ្សព្វផ្សាយក្នុងស្រុក និងត្រូវមានការប្រុងប្រយ័ត្នជាប់ជានិច្ច ចំពោះស្ថានភាពនៅជុំវិញខ្លួន» ។
ប្រភពព័ត៌មានស្និទ្ធនឹងក្រសួងមហាផ្ទៃ អះអាងថា កាលពីថ្ងៃទី១១ ខែមេសា បានបញ្ចេញភ័ស្តុតាងជាឯកសារ និងខ្សែអាត់សន្ទនារបស់សមាជិកចលនារំដោះជាតិខ្មែរ ដែលដឹកនាំដោយ លោក សម សេរី ដែលមានគម្រោងដាក់គ្រាប់បែកបំផ្ទុះចំនួន២កន្លែង ក្នុងរាជធានីភ្នំពេញ និងខេត្តសៀមរាប និងបានភ្ជាប់លោក សម រង្ស៊ី អតីតមេដឹកនាំអតីតគណបក្សសង្គ្រោះជាតិទៅនឹងចលនាដែលរដ្ឋាភិបាលចាត់ទុកជា «អង្គការភេរវកម្ម» នេះ ប៉ុន្តែលោក សម រង្ស៊ី និងប្រធានចលនានេះបានច្រានចោល ។ យោងតាមឯកសារដែលត្រូវដកស្រង់ថាផ្តល់ដោយក្រសួងមហាផ្ទៃដែរសរសេរថា លោក សម សេរី បានចូលរួមក្នុងសកម្មភាពជាមួយរណសិរ្សរួបរួមជាតិខ្មែរ ឬចលនាខ្លារំដោះ ដែលដឹកនាំដោយលោក សោម ឯក ចន្លោះពីឆ្នាំ២០០៥ ដល់ឆ្នាំ២០០៩ ដែលមេដឹកនាំរណសិរ្សនេះព្រមទាំងសមាជិកផ្សេងៗទៀត ត្រូវបានរដ្ឋាភិបាលចាប់ខ្លួនពាក់ព័ន្ធការដាក់គ្រឿងផ្ទុះនៅស្ដូបមិត្តភាព កម្ពុជា-វៀតណាមកាលពីឆ្នាំ២០០៧ និងមុខសួនច្បារក្រសួងការពារជាតិ និងអតីតស្ថានីយ៍ទូរទស្សន៍ប៉ុស្តិ៍លេខ៣ កាលពីឆ្នាំ២០០៩ ។
លោក សម សេរី ដែលបានប្រកាសបង្កើត«រណសិរ្សរំដោះជាតិខ្មែរ» កាលពីឆ្នាំ២០១២ បានបន្តសកម្មភាព «ប្រឆាំងរាជរដ្ឋាភិបាលកម្ពុជា ដោយយកប្រទេសថៃ ធ្វើជាមូលដ្ឋានដឹកនាំបញ្ជា» ។ ក្រសួងមហាផ្ទៃអះអាងថា រណ្សសិរ្សរំដោះជាតិខ្មែរមានកម្លាំងនៅកម្ពុជាចំនួន៤៦២នាក់ ហើយនៅថ្ងៃទី១២ ខែធ្នូ ឆ្នាំ២០១៦ លោក សម សេរី បានបង្កើត «រដ្ឋាភិបាលជាតិខ្មែរនិរទេស» ដែលមានមូលដ្ឋាននៅប្រទេសដាណឺម៉ាក ជាមួយសមាជិករដ្ឋាភិបាលស្រមោលចំនួន៥៦នាក់ ។ ដោយបង្ហាញទំនាក់ទំនងជាច្រើនរបស់លោក សម សេរី ជាមួយចលនាផ្សេងៗ រួមទាំងចលនាអំណាចពលរដ្ឋខ្មែររបស់លោក សួន សេរីរដ្ឋា ដែលកំពុងជាប់ពន្ធនាគារ រណសិរ្សរំដោះជាតិខ្មែរកម្ពុជាក្រោម ជាពិសេសជាមួយលោក សម រង្ស៊ី អតីតប្រធានអតីតគណបក្សសង្គ្រោះជាដើម ។ ក្រសួងមហាផ្ទៃអះអាងថា លោក សម រង្ស៊ី និងលោក សម សេរី បានជួបគ្នាចំនួន២ដង គឺនៅឆ្នាំ២០១៥ ក្នុងប្រទេសបារាំង និងឆ្នាំ២០១៨ ក្នុងប្រទេសស្វ៊ីស ។
របាយការណ៍សរសេរថា ៖ « ថ្ងៃទី១២ ខែកុម្ភៈ ឆ្នាំ ២០១៨ លោកសម សេរី ជួបជាមួយលោក សម រង្ស៊ី នៅប្រទេសស្វ៊ីស ដោយក្នុងនោះ សម រង្ស៊ី ស្នើឲ្យ សម សេរី រៀបចំកម្លាំងទ័ព ដើម្បីយកឈ្នះលើគណបក្សប្រជាជនកម្ពុជា ដោយមានប្រទេសចំនួន២ គាំទ្រពីក្រោយ ព្រមទាំងផ្តល់បច្ចេកទេសហ្វឹកហ្វឺន និងហិរញ្ញវត្ថុ » ។ កាលពីយប់ថ្ងៃទី១០ ខែមេសា ឆ្នាំ២០១៨ គេហទំព័រនៃបណ្ដាញសារព័ត៌មានក្នុងស្រុក បានអះអាងថា «សមត្ថកិច្ចជំនាញជាន់ខ្ពស់» បានបញ្ចេញនូវខ្សែអាត់សំឡេងសន្ទនាចំនួន២ ដាច់ដោយឡែកពីគ្នាដែលធ្វើឡើងកាលពីថ្ងៃទី០៧ និងទី០៩ ខែមេសា អំពីគម្រោងរៀបចំការបំផ្ទុះគ្រាប់បែកនៅថ្ងៃទី១២ ខែមេសា ឆ្នាំ២០១៨ នៅរមណីយដ្ឋានវត្តភ្នំ ក្នុងរាជធានីភ្នំពេញ ។
មុនចូលឆ្នាំខ្មែរលោក នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃ ថ្លែងប្រាប់បណ្តាញសារព័ត៌មានក្នុងស្រុកថា អាជ្ញាធរបានក្ដាប់បានពីសកម្មភាពរបស់ក្រុមដែលមានបំណងបង្កការបំផ្ទុះនេះ ដែលនិយាយរួមយើងក្ដាប់បានអស់ហើយ ។ យើងមានអត្តសញ្ញាណអស់ហើយ ។ យើងដឹងពីសកម្មភាពពូកគេទៀត ហើយសមត្ថកិច្ចបានឃ្លាំមើលចំពោះសកម្មភាពរបស់អ្នកមានជាប់ពាក់ព័ន្ធនឹងរណសិរ្សរំដោះជាតិខ្មែរ ៕
ចែករំលែកព័តមាននេះ