ធនាគារ FTB និងគ្រឹះស្ថានមីក្រូហិរញ្ញវត្ថុ អេ អឹម ខេ ចុះ MoU លើសេវាផ្ទេរប្រាក់ក្រៅប្រទេស
- ភ្នំពេញ
រាជធានីភ្នំពេញ៖ ថ្ងៃទី២៦ ខែមេសា ឆ្នាំ២០១៨ ធនាគារពាណិជ្ជកម្មក្រៅប្រទេសនៃកម្ពុជា (FTB) និង គ្រឹះស្ថានមីក្រូហិរញ្ញវត្ថុ អេ អឹម…
រាជធានីភ្នំពេញ៖ ថ្ងៃទី២៦ ខែមេសា ឆ្នាំ២០១៨ ធនាគារពាណិជ្ជកម្មក្រៅប្រទេសនៃកម្ពុជា (FTB) និង គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី (AMK) បានចុះអនុស្សរណៈយោគយល់គ្នាមួយ ដើម្បីសហប្រតិបតិ្តការ លើសេវាផ្ទេរប្រាក់ក្រៅប្រទេស ជូនអតិថិជនរបស់គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ក្រោមការអនុញ្ញាតពីធនាគារជាតិនៃកម្ពុជា ។ ឥឡូវនេះ អតិថិជនអាចរីករាយទទួលប្រាក់ពីបង ប្អូន សាច់ញាតិ ឬដៃគូអាជីវកម្មនៅក្រៅប្រទេសដែលមានសុវត្ថិភាពខ្ពស់ សេវាលឿនរហ័ស និងតម្លៃសមរម្យ។
កិច្ចសហប្រតិបតិ្តការរវាងស្ថាប័នទាំងពីរនេះ ជាសញ្ញាវិជ្ជមានមួយបន្ថែមទៀតក្នុងវិស័យធនាគារ ដើម្បីបំពេញតម្រូវការរបស់អតិថិជនជិត ៧០ ម៉ឺននាក់ របស់គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី ដែលជាអតិថិជនសក្តានុពលក្នុងការប្រើប្រាស់សេវាផ្ទេរប្រាក់ពីក្រៅប្រទេស។ គ្រឹះស្ថានមីក្រូហិរញ្ញវត្ថុ អេ អឹម ខេ ភីអិលស៊ី មានការិយាល័យប្រតិបត្តិការចំនួន ១៥០កន្លែង និងមានភ្នាក់ងារផ្ទេរប្រាក់ ជាង៣.០០០កន្លែងនៅទូទាំងប្រទេស។
ធនាគារពាណិជ្ជកម្មក្រៅប្រទេសនៃកម្ពុជា ជាធនាគារពាណិជ្ជដំបូងគេ និងមានទំនុកចិត្តខ្ពស់ពីអតិថិជន ជាពិសេសភាពខ្លាំងរបស់ធនាគារក្នុងការវិនិយោគលើបច្ចេកវិទ្យាថ្មីៗនៅពេលបច្ចុប្បន្ន។ ដោយឡែក អេ អឹម ខេ ភីអិលស៊ី ជាគ្រឹះស្ថានមីក្រូហិរញ្ញវត្ថុ ឈានមុខគេមួយ មានបណ្តាញទូលំទូលាយទូទាំងប្រទេស។ ការចាប់ដៃគូនេះ នឹងផ្តល់ភាពងាយស្រួល និងអត្ថប្រយោជន៍ជូនប្រជា ពលរដ្ឋខ្មែរយើងដែលមានអាជីវកម្ម ឬធ្វើការនៅក្រៅប្រទេស ហើយចង់ផ្ញើប្រាក់មកឲ្យឱពុកម្តាយ ឬបងប្អូន ឫដៃគូនៅស្រុកខ្មែរដែលភាគច្រើននៅតាមទីជនបទ។ សេវានេះផ្តល់ភាពងាយស្រួល មានសុវត្ថិភាព ចំណេញពេលវេលា និងមិនចំណាយសោហ៊ុយធ្វើដំណើរ ដោយពួកគាត់អាចទៅដកប្រាក់នៅជិតផ្ទះគាត់បាន។ សេវាផ្ទេរប្រាក់នេះក៏អាចឲ្យប្រជាពលរដ្ឋទទួលប្រាក់ និងផ្ទេរប្រាក់ទៅមកគ្រប់ប្រទេស ដោយសារធនាគារ FTB មានដៃគូជាមួយធនាគារធំៗនៅជុំវិញពិភពលោក។
អេ អឹម ខេ មានផលិតផល និងសេវាកម្មជាច្រើន កំពុងផ្តល់ជូនអតិថិជនដូចជា ៖ សេវាប្រាក់កម្ចី ប្រាក់សន្សំ ផ្ទេរប្រាក់ សេវាទូទាត់វិក្កយបត្រ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDMs)។
ធនាគារពាណិជ្ជ FTB ដែលផ្តោតសំខាន់លើផលិតផល និងសេវាកម្មខ្នាតមធ្យម និងធំ មានទីតាំងភាគច្រើននៅខេត្តក្រុងធំៗ មានផលិតផល និងសេវាដូចជា ៖ ប្រាក់កម្ចី ប្រាក់សន្សំ សេវាផ្ទេរប្រាក់ក្រៅប្រទេស សេវាហិរញ្ញប្បទានពាណិជ្ជកម្ម សេវាធនាគារតាមអ៊ីនធឺណែត សេវាធនាគារតាមទូរស័ព្ទចល័ត សេវាគ្រប់គ្រងសាច់ប្រាក់ និងសេវាធនាគារផ្សេងៗជាច្រើនទៀត៕
ចែករំលែកព័តមាននេះ