រាជធានីភ្នំពេញ ៖ បុរសម្នាក់ដែលស្រឡាញ់នារីម្នាក់ជិត១ឆ្នាំមកហើយ បែរជាប្រើអារម្មណ៍ស្រឡាញ់ខុសតម្រា នាំឲ្យរលត់ភ្លើងស្នេហ៍តែមួយប៉ប្រិចភ្នែក ខណៈហៅនាងមកធ្វើម្ហូបឱ្យផឹកស៊ីជាមួយគ្នា លុះពេលស្រវឹង ក៏បិទទ្វារបន្ទប់មិនឲ្យនាងត្រឡប់ទៅវិញ និងបានដេកឱបថើបអស់មួយយប់ តែមិនបានរំលោភសេពសន្ថវៈទេ ។ ទោះបីជាបែបណា កាយវិកាចង់ដើរ «ផ្លូវកាត់» នេះ ក៏ជាការមើលងាយដែរ ហើយត្រូវនាងប្តឹងសមត្ថកិច្ចឲ្យឃាត់ខ្លួនពីបទបៀតបៀនកេរ្តិ៍ខ្មាស ។
ការឃាត់ខ្លួននេះ គឺកាលពីវេលាម៉ោង៦ និង៣០នាទីល្ងាចថ្ងៃទី២៤ មេសា នៅបន្ទប់ជួលក្នុងសង្កាត់ចោមចៅ២ ខណ្ឌពោធិ៍សែនជ័យ ។ ជនជាប់ចោទឈ្មោះ ម៉ម កល្យាណ អាយុ២៦ឆ្នាំ ជាកម្មកររោងចក្រ ស្នាក់នៅបន្ទប់ជួលក្នុងសង្កាត់ខាងលើ និងមានស្រុកកំណើតនៅឃុំត្នោតជំុ ស្រុកបារាយណ៍ ខេត្តកំពង់ធំ ។ ចំណែកនារីរងគ្រោះ អាយុ២៣ឆ្នាំ ជាកម្មការិនីរោងចក្រ ស្នាក់នៅផ្ទះជួលក្នុងសង្កាត់ចោមចៅខាងលើដែរ ។
ក្រោយពីត្រូវចាប់ឃាត់ខ្លួន ជនជាប់ចោទឆ្លើយថា រូបគេពិតជាបានប្រព្រឹត្តដូចការចោទប្រកាន់នោះមែន ព្រោះនាងនិងរូបគេមានទំនាក់ទំនងស្នេហាជាមួយគ្នាជិត១ឆ្នាំមកហើយ និងធ្លាប់ណាត់គ្នាដើរលេងជាច្រើនដងរាប់មិនអស់ ហើយនាងក៏ធ្លាប់មកធ្វើម្ហូបឲ្យសឹងរាល់ថ្ងៃដែរ ព្រោះតែរូបគេមិនចេះធ្វើម្ហូប ។ កាលពីវេលាម៉ោង១១ថ្ងៃត្រង់ថ្ងៃទី២២ មេសា រូបគេបានទូរស័ព្ទហៅនាងមកធ្វើម្ហូបឲ្យ លុះនៅពេលហូបបាយរួចហើយនាងក៏ត្រឡប់ទៅផ្ទះវិញ ។ លុះនៅវេលាម៉ោង៥ល្ងាចថ្ងៃដដែល រូបគេបានហៅនាងមកម្ដងទៀតហើយបានធ្វើម្ហូប និងហូបស្រាបៀរជាមួយមិត្តភក្តិ២នាក់ផ្សេងទៀតសរុបទាំងអស់៤នាក់ គឺស្រី២ ប្រុស
២ ។
ការផឹកស៊ីរហូតដល់ម៉ោង៩យប់ ដោយផឹកអស់ស្រាបៀរជាងកន្លះកេស បន្ទាប់មកមិត្តភក្ដិស្រីប្រុស២នាក់ ក៏បានចេញទៅបាត់ទៅ ។ ពេលនោះ នៅសល់តែរូបគេក៏បានដេកជាមួយនាងដោយឱបថើបស្ទាបអង្អែលសព្វរាងកាយ តែមិនបានរួមរ័កទេ ព្រោះនាងឲ្យតែអង្អែលនិងថើប តែមិនឲ្យរួមរ័កឡើយ ។ ចំណែករូបគេក៏ធ្វើតាម ព្រោះគេស្រឡាញ់ចង់បាននាងជាគូអនាគត ហើយនៅពេលឱបថើបនោះ នាងមិនបានប្រកែកទេ គ្រាន់តមិនឲ្យរួមរ័កប៉ុណ្ណោះ ។ លុះព្រឹកឡើង គេបានប្រាប់នាងថា គេស្រឡាញ់នាង បើទោះជានាងចង់ប្តឹងក៏ប្តឹងទៅ គឺរូបគេមិនរត់ទៅណាឡើយ ។
ចំណែកខាងនារីវិញនិយាយថា នាងនិងជនជាប់ចោទគឺស្រឡាញ់រាប់អានគ្នាដែលនាងទុកដូចជាបងប្រុស ហើយនាងតែងតែទៅធ្វើម្ហូបឲ្យជាញឹកញាប់ ។ មុនពេលកើតហេតុ នាងបានទៅធ្វើម្ហូបឲ្យផឹកស៊ីជាមួយមិត្តភក្តិ២នាក់ទៀត លុះពេលផឹកស៊ីចប់ហើយ មិត្តភក្តិចេញទៅបាត់ ស្រាប់តែជនជាប់ចោទបិទទ្វារ ហើយចាប់ឱបថើបនាងតែម្តង ។ ពេលនោះនាងបាននិយាយថា បើស្រឡាញ់ គេមិនធ្វើអុីចឹងទេ គឺគេចូលស្តីដណ្តឹងតាមប្រពៃណី តែនាងធ្លាប់បានប្រាប់ជាជាច្រើនដងហើយថា សុំរាប់អានចាត់ទុកត្រឹមជាបងប្រុសប៉ុណ្ណោះ ។ លុះដល់ពេលព្រឹក នាងបានប្រាប់ថា ឈប់មកជាន់ទីនេះទៀតហើយ ព្រោះស្អប់អំពើថោកទាបបែបនេះ ។ បន្ទាប់ពីត្រូវជនសង្ស័យបំពានរូបរាងកាយនាងមិនហ៊ានប្រាប់ឪពុកម្ដាយទេ តែបានប្រាប់មិត្តភក្ដិ ហើយមិត្តភក្តិក៏ទូរស័ព្ទប្រាប់ឪពុកម្ដាយនាងឲ្យដឹង ទើបឪពុកម្តាយនាងមកពីស្រុកនិងនាំនាងទៅប្តឹងសមត្ថកិច្ច។
បន្ទាប់ពីទទួលពាក្យបណ្តឹងហើយ នគរបាលប៉ុស្តិ៍ចោមចៅ២ក៏បានទៅឃាត់ខ្លួនជនសង្ស័យយកមកសាកសួរ និងកសាងសំណុំរឿងបញ្ជូនបន្តទៅផ្នែកព្រហ្មទណ្ឌខណ្ឌពោធិ៍សែនជ័យទៀត ៕
ចែករំលែកព័តមាននេះ