ខេត្ដកណ្ដាល ៖ នៅបន្ទាយក្រាំងចេកឬមជ្ឈមណ្ឌលហ្វឹកហ្វឺនក្រាំងចេក ស្ថិតក្នុងភូមិក្រាំងចេក ឃុំដើមឫស ស្រុកកណ្ដាលស្ទឹង ខេត្ដកណ្ដាល បានរៀបចំបិទវគ្គជំនាញអង្គរក្សពិសេសជំនាន់ទី១៥ និងបើកវគ្គជំនាន់ទី១៦ដល់កងអង្គរក្សសម្ដេចតេជោហ៊ុន សែន ក្រោមកិច្ចសហប្រតិបត្ដិការពីសាធារណរដ្ឋឥណ្ឌូណេស៊ី ។ ពិធីបិទនិងបើកវគ្គជំនាញអង្គរក្សពិសេសនេះធ្វើឡើងនៅព្រឹកថ្ងៃទី៣ មីនា ២០១០ ស្ថិតក្រោមអធិបតីភាពលោក កែប ជុតិមា អភិបាលនៃគណៈអភិបាលរាជធានីភ្នំពេញជាទីប្រឹក្សាផ្ទាល់សម្ដេចតេជោ ហ៊ុន សែន ដោយលោកត្រូវបានការអនុញាតជាតំណាងរបស់សម្ដេចតេជោហ៊ុន សែន នាយករដ្ឋមន្ដ្រី ។ ពិធីនោះមានការចូលរួមពីលោកឧត្ដមសេនីយ៍ឯក ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទមេបញ្ជាការកងអង្គរក្សនិងជាទីប្រឹក្សាផ្ទាល់ សម្ដេចតេជោលោកអេកូ អ៊ីនទ្រី អាតូ លេខាទី១ ស្ថានឯកអគ្គរដ្ឋទូតសាធារណរដ្ឋឥណ្ឌូណេស៊ីប្រចាំនៅកម្ពុជានិងលោកឧត្ដមសេនីយ៍ត្រីអាម៉ា រ៉ូឡោះ មេបញ្ជាការរងបញ្ជាការដ្ឋានអង្គរក្សប្រធានាធិបតីនៃសាធារណរដ្ឋឥណ្ឌូណេស៊ី ។លោកនួន ណារិន នាយកមជ្ឈមណ្ឌលហ្វឹកហ្វឺនមិត្ដភាពកម្ពុជា-ឥណ្ឌូណេស៊ី (ក្រាំង ចេក) បានថ្លែងថាវត្ដមានរបស់គណៈអធិបតីគឺជាកាយវិការដ៏ប្រពៃបំផុតបញ្ជាក់នូវការយកចិត្ដទុកដាក់ដល់នាយនាយទាហានរង និងពលទាហានក្នុងបញ្ជាការដ្ឋានកងអង្គរក្សទាំងអស់គ្នា និងជំរុញស្មារតីឱ្យខិតខំបំពេញភារកិច្ចការងារហ្វឹកហ្វឺនរៀនសូត្រដើម្បី បុព្វហេតុការពារបូរណភាពដែនដីការពារសុខសន្ដិភាពជូនប្រជាពលរដ្ឋក្រោមកិច្ចដឹកនាំដ៏ខ្ពង់ខ្ពស់របស់សម្ដេចតេជោហ៊ុន សែន ។
លោកនាយកមជ្ឈមណ្ឌលហ្វឹកហ្វឺនមិត្ដភាពកម្ពុជា-ឥណ្ឌូណេស៊ីបញ្ជាក់ថា វគ្គជំនាញអង្គរក្សពិសេសនេះមានសិក្ខាកាមចំនួន ១.០៤២នាក់ ក្នុងនោះវគ្គជំនាន់ទី១៥ចំនួន ៣២៤នាក់ វគ្គទី១៦ចំនួន៣០០នាក់ ជំនាញកាំភ្លើងធំ BM ២១ ចំនួន៣៦៨នាក់ និងជំនាញ ប្រឆាំងភេរវកម្ម៥០នាក់ យោធាចារ្យកម្ពុជា ចំនួន៧៤នាក់យោធាចារ្យឥណ្ឌូណេស៊ី៥នាក់ និងយោធាចារ្យកូរ៉េ៥នាក់ ។ មជ្ឈមណ្ឌលហ្វឹកហ្វឺនក្រាំងចេកបានរួមចំណែកក្នុងការបណ្ដុះបណ្ដាលមុខជំនាញអង្គរក្សពិសេសនិងជំនាញទ័ពព្រៃក្នុងគោលដៅអនុវត្ដតាម យុទ្ធសាស្ដ្រការពារជាតិនិងការពារសន្ដិសុខសុវត្ថិភាពជូនសម្ដេចអគ្គមហាសេនាបតី តេជោហ៊ុន សែន និងលោកជំទាវ ព្រមទាំង ក្រុមគ្រួសារ និងឥស្សរជននយោបាយជាន់ខ្ពស់ជាតិនិងអន្ដរជាតិទៀតផង ។វគ្គនេះមានរយៈពេល២៥សបា្ដហ៍ស្មើនឹង១៣៨ថ្ងៃ ដែលក្នុងនោះហ្វឹកហ្វឺនជំនាញការពារផ្ទាល់ជំនាញសន្ដិសុខពិសេស អន្ដរាគមន៍ពិសេស និងជំនាញទ័ពព្រៃហើយក្នុងពិធីនេះ ត្រូវបានអនុវត្ដផ្ដាល់មេរៀនសំខាន់ៗដែលបានសិក្សានាពេលកន្លងមក ។នៅក្នុងឱកាសនោះ លោកកែប ជុតិមា បានថ្លែងកោតសរសើរដល់កងអង្គរក្សដែលបានខិតខំយកចិត្ដទុកដាក់ក្នុងការសិក្សារៀនសូត្រដើម្បីយកជំនាញទៅបំរើប្រទេសជាតិ។ នាពេលនោះលោកបានផ្ដល់អគារសំរាប់ដាក់សំភារមួយខ្នងតបតាមការស្នើសុំ និងផ្ដល់ថវិកាដល់មជ្ឈមណ្ឌលហ្វឹកហ្វឺនមិត្ដភាពកម្ពុជា-ឥណ្ឌូណេស៊ី សិក្ខាកាម និងគ្រូបង្វឹកផងដែរ ។
ចែករំលែកព័តមាននេះ