ខេត្តកំពង់ធំ ៖ រន្ទះអប្រិយបានឆក់យកជីវិតកសិករម្នាក់ បណ្តាលឲ្យស្លាប់នៅកណ្តាលវាលស្រែយ៉ាងអាណោចអាធ័ម ខណៈដែលជនរងគ្រោះកំពុងតែបាញ់ថ្នាំស្រូវក៏ត្រូវរន្ទះកំណាច់មកផ្តាច់សង្ខារស្លាប់ភ្លាមៗកាលពីវេលាម៉ោង៤និង៣០នាទីរសៀល ថ្ងៃទី២៤ ខែមេសា ។
សមត្ថកិច្ចបានឲ្យដឹងថា ករណីរន្ទះបាញ់នេះ បានកើតឡើងនៅចំណុចត្រពាំងញុង ខាងជើងភូមិឫស្សី ឃុំចុងដូង ស្រុកបារាយណ៍ ។ ប្រភពពីកន្លែងកើតហេតុនិយាយថា នៅមុនពេលកើតហេតុមានភ្លៀងផ្គរមួយមេយ៉ាងខ្លាំងលាយលំនឹងរន្ទះបាញ់លាន់ឮរំពងចំនួនបីគ្រាប់ គ្រាប់ទី១ គ្រាប់ទី២មិនមានអ្វីគួរឲ្យកត់សម្គាល់នោះ ទេ ដល់គ្រាប់ទី៣ក៏ហោះមកត្រូវជនរងគ្រោះឈ្មោះ ញ៉ែម គីម ភេទប្រុស អាយុ៤១ឆ្នាំ រស់នៅភូមិចុងដូង ឃុំចុងដូង ស្រុកបារាយណ៍ បណ្តាលឱ្យស្លាប់ភ្លាមមួយរំពេច ។
លោក កែវ សាលី នាយរងប៉ុស្ត៏រដ្ឋបាល ឃុំចុងដូងបានឲ្យដឹងថា ក្រោយពីកើតហេតុ ត្រូវបានប្រជាពលរដ្ឋរាយការណ៍មកថា មានករណីរន្ទះបាញ់បណ្តាលឲ្យមានមនុស្សស្លាប់ លោកនិងកម្លាំងប៉ុស្តិ៍បានចុះទៅពិនិត្យនៅកន្លែងកើតហេតុក៏ឃើញថា ជនរងគ្រោះពិតជាបានស្លាប់ដោយសារគ្រាប់រន្ទះប្រាកដមែន ហើយក៏បានប្រគល់សពឱ្យសាច់ញាតិយកទៅធ្វើបុណ្យតាមប្រពៃណី ។
នាឱកាសនោះលោកក៏បានផ្តាំផ្ញើដល់ប្រជាកសិករទាំងអស់ សូមឲ្យមានការប្រុងប្រយ័ត្នបានខ្ពស់នៅពេលដែលមានភ្លៀង ខ្យល់ និងផ្គររន្ទះត្រូវទៅរកទីកន្លែងដែលមានសុវត្តិភាព ៕
ចែករំលែកព័តមាននេះ