អភិបាលខេត្តចុះផ្តល់អត្រានុកូលដ្ឋានជូនពលរដ្ឋនៅតំបន់ដាច់ស្រយាល
- កំពង់ចាម
ខេត្តកំពង់ចាម ៖ ដើម្បីសម្រួលដល់ការលំបាករបស់បងប្អូនប្រជាពលរដ្ឋ ពិសេសប្រជាពលរដ្ឋដែល រស់នៅតំបន់ដាច់ស្រយាល អភិបាល នៃគណៈអភិបាលខេត្តកំពង់ចាម លោក គួច ចំរើន…
ខេត្តកំពង់ចាម ៖ ដើម្បីសម្រួលដល់ការលំបាករបស់បងប្អូនប្រជាពលរដ្ឋ ពិសេសប្រជាពលរដ្ឋដែល រស់នៅតំបន់ដាច់ស្រយាល អភិបាល នៃគណៈអភិបាលខេត្តកំពង់ចាម លោក គួច ចំរើន…
ខេត្តកំពង់ចាម ៖ ដើម្បីសម្រួលដល់ការលំបាករបស់បងប្អូនប្រជាពលរដ្ឋ ពិសេសប្រជាពលរដ្ឋដែល រស់នៅតំបន់ដាច់ស្រយាល អភិបាល នៃគណៈអភិបាលខេត្តកំពង់ចាម លោក គួច ចំរើន កាលពីព្រឹកថ្ងៃទី២៥ ខែមេសា នេះ បានដឹកនាំមន្ត្រីពាក់ព័ន្ធចុះផ្តល់ អត្រានុកូលដ្ឋាន និងឯកសារអត្តសញ្ញាណកម្ម ជូនប្រជាពលរដ្ឋជាច្រើនគ្រួសាររស់នៅស្រុកបាធាយ ។
ក្នុងឱកាសនោះ លោក គួច ចំរើន បានមានប្រសាសន៍ថា សមាសភាពក្រុមការងារដែលលោកបានដឹកនាំចុះទៅផ្តល់សេវាជូនប្រជាពលរដ្ឋនេះរួមមាន លោកមេឃុំ ស្មៀន អភិបាលស្រុក និងនគរបាលខាងអត្តសញ្ញាណកម្ម បានចុះទៅភូមិអូម៉ាល់ ឃុំបាធាយ ស្រុកបាធាយ ដែលជាភូមិមួយនៅដាច់ស្រយាលពីគេឯង គឺនៅជាប់ព្រំប្រទល់ខេត្តកំពង់ឆ្នាំង ពិបាកក្នុងការធ្វើដំណើរ ដោយសារតែភូមិខាងលើលិចទឹកនៅរដូវវស្សា ។ ដោយមើលឃើញពីការលំបាកបែបនេះ ទើបលោកដឹកនាំមន្ត្រីពាក់ព័ន្ធចុះផ្តល់ផ្ទាល់ដល់លំនៅដ្ឋានប្រជាពលរដ្ឋ ដើម្បីចង់ដឹងពីសុខទុក្ខ និងការចង់បានរបស់ពួកគាត់ផងដែរ ។
លោកបន្តថា ការចុះយុទ្ធនាការចុះលិខិតបញ្ជាក់កំណើត សំបុត្រកំណើត សំបុត្របញ្ជាក់អាពាហ៍ពិពាហ៍ សំបុត្រអាពាហ៍ពិពាហ៍ សំបុត្របញ្ជាក់មរណៈភាព សំបុត្រមរណភាព អត្តសញ្ញាណបណ្ណ នេះគឺធ្វើឡើងស្របតាមការដាក់ចេញនូវយុទ្ធនាការចលនាប្រលងប្រណាំង «ឃុំសង្កាត់បម្រើសេវាល្អ» នេះ ដើម្បីអោយមេឃុំចៅសង្កាត់ ស្មៀន និងមន្ត្រីនគរបាលប៉ុស្តិ៍ ចុះបញ្ជីគ្រួសារ (ក៣) និងបញ្ជីស្នាក់នៅ (ក១) ស្របពេលពួកគាត់ចុះសំបុត្រកំណើត សំបុត្រអាពាហ៍ពិពាហ៍ និងសំបុត្រមរណភាព ដោយឥតគិតថ្លៃនៅតាមខ្នងផ្ទះរបស់ប្រជាពលរដ្ឋ ។ ការចុះបញ្ជីនេះ ពិតជាមានសារៈសំខាន់ខ្លាំងណាស់សម្រាប់ប្រជាពលរដ្ឋរបស់យើងក្នុងការប្រើប្រាស់ឯកសារនេះ ដើម្បីធ្វើការងារអ្វីមួយ ដូចជាការផ្ទេរទ្រព្យសម្បត្តិពីឪពុកម្តាយទៅកូន ការចុះឈ្មោះចូលរៀនរបស់កុមារ និងការងារជាច្រើនទៀតដែលជាតម្រូវការផ្សេងៗជាការចាំបាច់ដែលមិនអាចខ្វះខាតឯកសារណាមួយនោះឡើយ ។
លោក គួច ចំរើន បានលើកឡើងទៀតថា ការចុះយុទ្ធនាការលើកនេះ គឺជាការផ្តល់សេវាជូនបងប្អូនប្រជាពលរដ្ឋនៅក្នុងភូមិឱម៉ាល់ មិនឲ្យជួបការលំបាកក្នុងការធ្វើដំណើរទៅចុះបញ្ជីរអត្រានុកូដ្ឋានទៀតនោះទេ ចំណែកប្រជាពលរដ្ឋដែលបានចុះបញ្ជីកំណើតកូនម្តងរួចមកហើយ សូមកុំចុះម្តងទៀតទេ ព្រោះបណ្តាលឲ្យមានការភាន់ច្រលំ ស្ទួនឈ្មោះដែលធ្វើឲ្យមានការលំបាកដល់មន្ត្រីជំនាញប្រសិនបើមានការបាត់ឯកសារណាមួយ ត្រូវរាយការណ៍ជូនមេឃុំ ឬស្វែងរកឯកសារទាំងនោះនៅរដ្ឋបាលសាលាស្រុកបាធាយ និងក្រសួងមហាផ្ទៃ ។
លោក គួច ចំរើន និងក្រុមការងារបានបំពេញការងារនេះរហូតចប់ និងបានរៀបចំអាហារដើម្បីបង្កើនភាពស្និទ្ធស្នាលជាមួយបងប្អូនប្រជាពលរដ្ឋផងដែរ ។ ហើយនៅថ្ងៃដដែលនោះ លោក គួច ចំរើន ក៏បានចុះពិនិត្យផ្ទះរបស់ប្រជាពលរដ្ឋដែលរងគ្រោះដោយសារខ្យល់កន្ត្រាក់កាលពីយប់ថ្ងៃ២៤ ខែមេសា ឆ្នាំ២០១៨ មានសរុបចំនួន៣២គ្រួសារ ក្នុងនោះ២៣គ្រួសារនៅក្នុងឃុំសណ្តែក ដែល២គ្រួសាររលំផ្ទះធ្ងន់ធ្ងរទទួលបានថវិកា៥០ម៉ឺនរៀល និង២១គ្រួសារទៀតរងផលប៉ះពាល់បន្ទិចបន្ទួច ទទួលបានថវិកា១០ម៉ឺនរៀល ដោយឡែកឃុំត្រប់៩គ្រួសាររងផលប៉ះពាល់បន្ទិចបន្ទួច ទទួលបានថវិកា១០ម៉ឺនរៀលផងដែរ ៕
ចែករំលែកព័តមាននេះ