រាជធានីភ្នំពេញ ៖ គណបក្សប្រជាជនកម្ពុជាដែលបក្សកាន់អំណាចបានប្រកាសស្វាគមន៍ ចំពោះការបង្កើតគណបក្សឆន្ទៈខ្មែរបង្កើតឡើងដោយកូនប្រុសលោកគង់ គាំអតីតមន្ត្រីជាន់ខ្ពស់គណបក្សសង្គ្រោះជាតិ និងអតីតប្រធានគណបក្សសម រង្ស៊ី ។
លោក សុខឥសានបានឲ្យដឹងនៅថ្ងៃទី២៦ មេសាថា នៅពេលថ្មីៗនេះលោក គង់ ម៉ូនីកា កូនប្រុសលោកគង់គាំបានសម្រេចបង្កើតគណបក្សមួយមានឈ្មោះថា គណបក្សឆន្ទៈខ្មែរ ដើម្បីចូលរួមប្រកួតប្រជែងក្នុងការបោះឆ្នោតនាថ្ងៃទី២៩ ខែកក្កដា ឆ្នាំ២០១៨ នេះ ។
លោកបន្តថា ការបង្កើតគណបក្សថ្មីនេះបញ្ជាក់ច្បាស់ថា នៅកម្ពុជាសិទ្ធិនយោបាយរបស់ពលរដ្ឋ ត្រូវបានបើកទូលាយស្របតាមស្មារតីរដ្ឋធម្មនុញ្ញនៃព្រះរាជាណាចក្រកម្ពុជា ។ ការបង្កើតគណបក្សនយោបាយថ្មី ក៏បញ្ជាក់ច្បាស់ថា លទ្ធិប្រជាធិបតេយ្យនៅកម្ពុជានៅតែរស់រវើក និងស្រស់បំព្រងដដែល ទោះបីអតីតបក្សប្រឆាំងចង់យកលទ្ធិប្រជាធិបតេយ្យនៅកម្ពុជាមកធ្វើជាកម្មសិទ្ធិផ្ទាល់ខ្លួនក៏ដោយ ។
លោកបញ្ជាក់ថា «គណបក្សប្រជាជនកម្ពុជាស្វាគមន៍ការបង្កើតគណបក្សថ្មីទាំងទ្បាយ ដើម្បីប្រ កួតប្រជែងក្នុងការបោះឆ្នោតនាពេលខាងមុខឆាប់ៗនេះ» ។
សូមជម្រាបថា កាលពីថ្ងៃទី២៥ មេសា លោកគង់ ម៉ូនីកាកូនប្រុសពៅលោកគង់ គាំបានប្រ កាស និងអំពាវនាវបង្កើតគណបក្សនយោបាយមួយឈ្មោះ គណបក្សឆន្ទៈខ្មែរ ដើម្បីចូលរួម បោះឆ្នោតជ្រើសតាំងអ្នកតំណាងរាស្ត្រ អាណត្តិទី៦ រដ្ឋសភាដែលនឹងប្រព្រឹត្តិថ្ងៃទី២៩ ខែកក្ក ដា ឆ្នាំ២០១៨ខាងមុនេះ ។
ទាក់ទង និងគណបក្សនយោបាយដែលត្រៀមខ្លួនក្នុងការប្រកួតប្រជែងការបោះឆ្នោតនៅពេលខាងមុខនេះដែរ បើតាមមន្ត្រីជាន់ខ្ពស់ក្រសួងមហាផ្ទៃបានឲ្យដឹងថា មកត្រឹមព្រឹកថ្ងៃទី២៥ ខែមេ សាថា រហូតមកដល់បច្ចុប្បន្ននេះគណបក្សនយោបាយដែលបានចុះបញ្ជីនៅក្រសួងមហាផ្ទៃ មានចំនួនសរុប៣៧ គណបក្សនយោបាយ ។
ទាក់ទិននឹងការប្រកួតប្រជែងសម្រាប់ការបោះឆ្នោតជ្រើសតាំងសមាជិករដ្ឋសភាអាណត្តិទី៦នៅពេលខាងមុខនេះដែរ ប្រធានគណបក្សយុវជនកម្ពុជា លោកពេជ្រ ស្រស់កាលពេលថ្មីៗកន្លងមកនេះបានព្រមានថា នឹងមិនចូលប្រកួតប្រជែងការបោះឆ្នោតនោះទេ ប្រសិនបើក្រសួង មហាផ្ទៃរកដំណោះស្រាយចំពោះមេឃុំចៅសង្កាត់របស់ខ្លួនធ្វើទុក្ខបុកម្នេញសកម្មជនខ្លួន ។ គឺមិ នព្រមចុះហត្ថលេខាចំពោះការស្នើឈរឈ្មោះបេក្ខជនសម្រាប់បោះឆ្នោតនៅពេលខាងមុខនេះ ។
លោក ពេជ្រ ស្រស់ក៏បានស្នើសុំដល់សម្តេចក្រឡាហោម ស ខេង ឧបនាយករដ្ឋមន្ត្រីដឲ្យដោះស្រាយបញ្ហានេះផងដែរ ។ នៅថ្ងៃទី២៥ ខែមេសា ឆ្នាំ២០១៨ សម្តេច ស ខេ ងបានណែនាំឲ្យអភិបាលនៃគណៈអភិបាលរាជធានីខេត្ត បង្កលក្ខណៈងាយស្រួលដល់ការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ។
លិខិតសម្តេចបានលើកឡើងថា ក្រសួងមហាផ្ទៃសូមស្នើឲ្យរដ្ឋបាលរាជធានីខេត្តធ្វើការណែនាំដល់អាជ្ញាធរឃុំ សង្កាត់ជួយសម្របសម្រួល និងបង្កលក្ខណៈងាយស្រួលក្នុងការចេញលិខិតបញ្ជាក់ផ្សេងៗ ជូនបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្ររបស់គណបក្សនយោបាយដែលបានចុះបញ្ជីត្រឹមត្រូវតាមច្បាប់ សម្រាប់យកទៅប្រើប្រាស់ក្នុងការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោត ជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ ស្របតាមច្បាប់ស្តីពីការបោះឆ្នោត បទបញ្ជា និងនីតិវិធីសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៦ ។
សូមជម្រាបថា ការចុះឈ្មោះគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតនឹងចាប់ផ្តើមពីថ្ងៃទី៣០ ខែមេសា រហូតទៅដល់ថ្ងៃទី១៤ ខែឧសភា ឆ្នាំ២០១៨ ។ សម្រាប់ការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៦ មានរយៈពេ ល២១ថ្ងៃ គឺចាប់ពីថ្ងៃទី៧ ដល់ថ្ងៃទី២៧ ខែកក្កដា ឆ្នាំ២០១៨ ។ ចំណែកការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ខាងមុខនេះ៕
ចែករំលែកព័តមាននេះ