ខេត្តកំពង់ធំ ៖ ឧប្បត្តិហេតុគ្រោះធម្មជាតិបានឆក់យកជីវិតយុវជនម្នាក់បណ្តាលឲ្យស្លាប់កណ្តាលវាលស្រែយ៉ាងអាណោចអាធម៌ ខណៈ ពេលដែលកំពុងតែជិះកង់ដេញគោត្រឡប់មកផ្ទះត្រូវបានរន្ទះបាញ់ផ្តាច់សង្ខាស្លាប់ភ្លាមៗនៅកណ្តាលវាលស្រែ។ ករណីរន្ទះបាញ់នេះបានកើតកាលពីវេលាម៉ោង៤និង១០នាទីល្ងាច ថ្ងៃទី២៥ ខែមេសា ឆ្នាំ២០១៨ នៅក្នុងភូមិសិរីសាមគ្គីត្បូង ឃុំស្រឡៅ ស្រុកបារាយណ៌ ខេត្តកំពង់ធំ ។
ប្រភពពីកន្លែងកើតហេតុនិយាយថា នៅមុនពេលកើតហេតុជនរងគ្រោះឈ្មោះ គំ អឿន ភេទប្រុស អាយុ២១ឆ្នាំ រស់នៅភូមិ-ឃុំកើតហេតុខាងលើបានជិះកង់ទៅមើលគោនៅតំបន់ត្រពាំងកាប់ឆ្កែក្រោយពីមេឃមានភ្លៀង ខ្យល់ ផ្គរ និងរន្ទះផង រហូតយប់ជ្រៅនៅមិនឃើញជនរងគ្រោះត្រឡប់មកផ្ទះវិញ ឃើញតែគោដើរមកផ្ទះបាត់មនុស្សមកឃើញមកជាមួយ ។
ឃើញដូច្នោះឪពុកជនរងគ្រោះ និងបងប្អូនក៏បាននាំគ្នាចេញទៅដើរតាមរករហូតដល់វេលាម៉ោង៣និង១០នាទីទៀបភ្លឺថ្ងៃទី២៦ ខែមេសា ឆ្នាំ២០១៨ ទើបប្រទះឃើញសាកសពជនរងគ្រោះបានដេកស្លាប់នៅកណ្ដាលស្រែដោយមានឈាមហូរចេញមកតាមស្លឹកត្រចៀក និងស្នាមឆេះខោអាវហើយក៏នាំគ្នារាយការណ៍ដល់សមត្ថកិច្ច និងដឹកសពជនរងគ្រោះមកផ្ទះ ។
សមត្ថកិច្ចសន្និដ្ឋានថា ជនរងគ្រោះពិតជាស្លាប់ដោយសារករណីរន្ទះបាញ់ពិតប្រាកដមែន ក្រោយពីធ្វើកោសល្យវិច្ច័យរួចក៏ប្រគល់ជូនសាច់ញាតិក្រុមគ្រួសារចាត់ចែងធ្វើបុណ្យតាមប្រពៃណីយ៍ ៕
ចែករំលែកព័តមាននេះ