ខេត្តកំពង់ឆ្នាំង ៖ «ក្នុងនាមគណៈបក្សប្រជាជនកម្ពុជាក៏ដូចជា សម្តេចតេជោ ហ៊ុន សែន ជានាយករដ្ឋមន្ត្រី និងជាប្រធានគណៈបក្ស មិនទុកឱ្យនរណាម្នាក់ស្លាប់ដោយអត់បាយនោះឡើយ ជាមួយគ្នានេះក៏មិនដែលភ្លេចទេនូវទុក្ខរបស់ប្រជាពលរដ្ឋ ដែលបានរងគ្រោះដោយគ្រោះថ្នាក់ផ្សេងៗនោះទេ» ។ លោកឧកញ៉ា កុយ សុវណ្ណ ប្រធានកិត្តិយសសាខាសម្ព័ន្ធយុវជនស្រឡាញ់សន្តិភាព ខេត្តកំពង់ឆ្នាំង មានប្រសាសបែបនេះនៅក្នុងពិធីចុះជួបសំណេះសំណាល និងចែកអំណោយដល់ក្រុមគ្រួសារជនរងគ្រោះដោយភ្លើងឆេះផ្ទះចំនួន២គ្រួសារ កាលពីពេលកន្លងទៅ ។ ពិធីនេះបានធ្វើឡើងនៅព្រឹកថ្ងៃទី២៥ ខែមេសា ឆ្នាំ២០១៨ នៅភូមិអណ្តូងឬស្សី ឃុំស្រែថ្មី ស្រុករលាប្អៀរ និងក្នុងភូមិកំពង់ក្តារ ឃុំច្រេស ស្រុកកំពង់ត្រឡាច ។
លោកឧកញ៉ាបានបន្តថា ក្រោយពីបានទទួលដំណឹងដ៏ក្រៀមក្រមថា មានប្រជាពលរដ្ឋ២គ្រួសារបានរងគ្រោះដោយភ្លើងឆេះផ្ទះនៅក្នុងខេត្តកំពង់ឆ្នាំងក្នុងនាមថ្នាក់ដឹកនាំសម្ព័ន្ធយុវជនស្រឡាញ់សន្តិភាពខេត្តកំពង់ឆ្នាំងបានដឹកនាំក្រុមការងារ ចុះមកសួរសុខទុក្ខ និងនាំយកអំណោយមួយចំនួនមកជួយដោះស្រាយការលំបាកជូនបងប្អូន ដោយមិនប្រកាន់និន្នាការអ្វីឡើយ ។
លោកឧកញ៉ាបានបន្តថា សម្តេចតេជោក៏បានផ្តាំផ្ញើរសួរសុខទុក្ខ និងរំលែកទុក្ខផងដែរចំពោះក្រុមគ្រួសារទាំង២ សូមកុំអស់សង្ឍឹម និងត្រូវពង្រឹងស្មារតី តាំងចិត្តតស៊ូប្រកបមុខរបររកស៊ី និងធ្វើស្រែចំការបន្តទៀត ដើម្បីធ្វើអោយជីវភាពរស់នៅបានល្អប្រសើរឡើងវិញ ៕
ចែករំលែកព័តមាននេះ