រាជធានីភ្នំពេញ ៖ ស្រវឹងស្រាបើករថយន្តពាក់ស្លាកលេខខេមរភូមិន្ទទៅបុករថយន្តម៉ែកសឺដេសហើយមិនព្រមសុំទោសទេអាងជិះរថយន្តពាក់ស្លាកលេខខេមរភូមិន្ទ បង្កឲ្យកកស្ទះចរាចរណ៍ពេញផ្លូវ ហេតុការណ៏នេះបានកើតឡើងកាលពីវេលាម៉ោង៨និង៣៥នាទីយប់ ថ្ងៃទី២៥ ខែមេសា ឆ្នាំ២០១៨ នៅតាមបណ្តោយមហាវិថីសហព័ន្ធរុស្សី កែងមហាវិថីព្រះមុន្នីវង្ស សង្កាត់វាលវង់ ខណ្ឌ៧មករា ។
ប្រភពព័ត៌មានពីកន្លែងកើតហេតុបានប្រាប់ឱ្យដឹងថា មុនកើតហេតុគេឃើញមានរថយន្តមួយគ្រឿងម៉ាកម៉ែកសឺដេស ពណ៌ខ្មៅ ពាក់ផ្លាកលេខ ភ្នំពេញ ២AM-៩៦៨៥ ជិះគ្នា៣នាក់ ស្រី២នាក់ និងបុរសជនជាតិចិនម្នាក់ ធ្វើដំណើរតាមផ្លូវសហព័ន្ធរុស្សីក្នុងទិសដៅពីលិចទៅកើតមកដល់កន្លែងកើតក៏ឈប់ស្តុបក៏មានរថយន្តមួយគ្រឿងទៀតពាក់ផ្លាកលេខ ខេមរភូមិន្ទ០៩ ២-៩០៧៨ ធ្វើដំណើរស្របទិសគ្នាដោយបុរសវ័យចំណាស់ស្រវឹងស្រា២នាក់មកដល់កន្លែងកើតហេតុជ្រុលទៅបុកពីក្រោយរថយន្តម៉ែកសឺដេស ។ ភ្លាមៗនោះភាគីរថយន្តរងគ្រោះបានចុះមកសួរនាំតែបែរជាត្រូវរថយន្តបង្កតាំងខ្លួនជាមន្ត្រីរាជការចុះមកស្តីបន្ទោសឱ្យរថយន្តរងគ្រោះទៅវិញ ហើយមិនព្រមដោះស្រាយទេថែមទាំងអួតអាងឱ្យមើលផ្លាកលេខរថយន្តគាត់ផងកុំចង់ខ្លាំង ។
ក្រោយពេលកើតហេតុរថយន្តបង្កបានសង៥០ដុល្លារឱ្យរថយន្តរងគ្រោះតែភាគីរថយន្តរងគ្រោះមិនព្រមយក ដោយគាត់ឱ្យខាងរថយន្តបង្កសុំទោសតែរថយន្តបង្កមិនព្រមសុំទោសបង្កឲ្យកកស្ទះចរាចរណ៍ពេញដងផ្លូវ ។ បន្ទាប់ពីមានការសម្របសម្រួលពីសមត្ថកិច្ចមូលដ្ឋានភាគីរថយន្តទាំង២គ្រឿងក៏ព្រមស្មើគ្នារួចបើករថយន្តចេញរៀងៗខ្លួនទៅ ៕
ចែករំលែកព័តមាននេះ