ខេត្តត្បូងឃ្មុំ ៖ រថយន្តបែន១គ្រឿងម៉ាកហ៊ីយ៉ានដាយចំណុះ៥តោន ពាក់ផ្លាកលេខ កំពង់ចាម ៣A-២២១៩ ដោយបានបើកបរលឿនទៅបុកម៉ូតូ១គ្រឿងម៉ាកវ៉េវក្នុងទិសដៅបញ្ច្រាសគ្នានៅលើកំណាត់ផ្លូវជាតិលេខ៧ ត្រង់ចំណុចមុខមន្ទីរពេទ្យព្រះនរោត្តមសីហនុ ចន្លោះបង្គោលលេខ ១៤៦-១៤៧ ក្នុងភូមិជ្រៃបិទមាស សង្កាត់សួង ក្រុងសួង កាលវេលាម៉ោង២និង៥០នាទីរសៀល ថ្ងៃទី២៥ ខែមេសា ឆ្នាំ២០១៨ ។
លោកវរសេនីយ៏ត្រី ឆៃ សុខុន អធិការរងនគរបាលក្រុងសួងទទួលផែនសណ្តាប់ធ្នាប់ប្រាប់ឲ្យដឹងថា នៅពេលមុនកើតហេតុបុរសឈ្មោះ ផុង ម៉ាលីស អាយុ៣៣ឆ្នាំ នៅភូមិធ្លក សង្កាត់សួង បានជិះម៉ូតូម៉ាកខាងលើក្នុងទិសដៅពីលិចទៅកើត ចំណែករថយន្តបែនវិញបានបើកបរក្នុងទិសដៅបញ្ច្រាសគ្នាដោយបានប្រើប្រាស់ល្បឿនលឿនដោយបានរេចង្កូតមកចូលគន្លងផ្លូវស្តាំដៃម៉ូតូតែម្តង ហើយក៏បានម៉ូតូពេញទំហឹងហើយម៉ូតូចូលពីក្រោមរថយន្តធ្វើឲ្យបុរសអ្នកជិះម៉ូតូស្លាប់ភ្លាមៗ អ្នកបើកបររថយន្តក្រោយពីបានបង្កគ្រោះថ្នាក់ចរាចរណ៏បុកមនុស្សស្លាប់រួចមកក៏ប្រញាប់បើកទ្វាររថយន្តរត់គេចខ្លួនបាត់ស្រមោល ។
តាមការពិនិត្យរថយន្តនេះសង្ស័យអាចជារបស់ថៅកែលក់គ្រួសខ្សាច់ណាម្នាក់នៅឃុំទន្លេបិទ ស្រុកត្បូងឃ្មុំ មិនមាននៅក្នុងកំណត់ហេតុផាកពិន័យរបស់សមត្ថកិច្ចនោះទេនាពេលកន្លងមក ចំណែករថយន្តផ្សេងៗទៀតជាង១០គ្រឿងសុទ្ធតែត្រូវបានផាកពិន័យតែត្រង់រថយន្តនេះបែរជាចន្លោះទៅវិញ ។
ក្រោយពីការវាស់វែងរួចសាកសពត្រូវបានសមត្ថកិច្ចប្រគល់ឲ្យទៅសាច់ញាតិនៃសពដើម្បីដឹកយកទៅរៀបចំធ្វើបុណ្យតាមប្រពៃណី រថយន្តបង្ក និងម៉ូតូត្រូវបាននាំមករក្សាទុកនៅអធិការដ្ឋាននគរបាលក្រុងសួងដើម្បីធ្វើការស្រាវជ្រាវបន្តទៀត ៕
ចែករំលែកព័តមាននេះ