រាជធានីភ្នំពេញ ៖ អាវុធហត្ថរាជធានីភ្នំពេញបានប្រកាសឲ្យដឹងកាលពីពេលថ្មីៗនេះថា អាវុធហត្ថរាជធានីភ្នំពេញនឹងសហការណ៍ជាមួយមន្ទីរជំនាញផ្នែកសុខាភិបាលដើម្បី «ស្រាវជ្រាវបោសសំអាតគ្រប់រថយន្តសង្គ្រោះដែលគ្មានច្បាប់អនុញ្ញាតទាំងអស់» ក្នុងរាជធានីភ្នំពេញ ដើម្បីការពារកុំឲ្យមានជនរងគ្រោះដោយគ្រោះថ្នាក់ចរាចរណ៍នានាលើដងផ្លូវ ត្រូវបាត់បង់ជីវិត ។
ប្រកាសចាត់វិធានការបោសសំអាតឡានសង្គ្រោះបន្ទាន់ដែលគ្មានច្បាប់អនុញ្ញាតិធ្វើឡើង បន្ទាប់ពីមានករណីគ្រោះថ្នាក់ចរាចរណ៍មួយកើតឡើងកាលពីយប់ថ្ងៃទី១៩ ខែមេសា ឆ្នាំ២០១៨ នៅតាមបណ្តោយផ្លូវហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ក្រោយពេលកើតហេតុ មិនយូរប៉ុន្មាន ស្រាប់តែមានរថយន្តគិលានសង្គ្រោះពណ៌ក្រហមលាយស ០១គ្រឿង មកលើកជនរងគ្រោះដាក់លើហ្វ្រង់កាសែងចូលរថយន្ត ដោយមិនមានការពិនិត្យ ឬសង្គ្រោះបឋម និងគ្មានការប្រុងប្រយ័ត្ន ហើយដឹកចេញទៅបាត់ ដោយមិនមានផ្តល់ដំណឹងដល់អ្នកជុំវិញថា នឹងយកជនរងគ្រោះទៅកាន់ទីណា ។
នេះបើយោងតាមការព័ត៌មានលើហ្វេសប៊ុកកងរាជអាវុធហត្ថរាជធានីភ្នំពេញ ។ ប្រភពដដែលបានបញ្ជាក់ថា ដំណឹងជនរងគ្រោះត្រូវបានដឹងដល់មិត្តភក្តិដែលជាក្រុមអតីតមិត្តរួមជំនាន់ទសវត្សទី៨០ នៃសាលាបាក់ទូក ។ មិត្តភក្តិម្នាក់ៗបានទំនាក់ទំនងគ្នាក្នុងក្រុម វ៉តស្អាប់ (WhatsApp) ស្វែងរកការជួយសង្គ្រោះគ្រប់មធ្យោបាយដោយយកចិត្តទុកដាក់ និងមានមិត្តមួយចំនួនមានទាំងវេជ្ជបណ្ឌិតជំនាញបានខ្នះខ្នែង ចេញស្វែងរកជនរងគ្រោះ តាមគ្លីនិក ទាំងការព្រួយបារម្ភ «ស្រាប់តែបានលឺដំណឹងថា ជនរងគ្រោះត្រូវបានរថយន្តសង្គ្រោះពណ៌ស ផ្សេងមួយទៀតដឹកយកមកដាក់កន្លែងកើតហេតុវិញ ព្រោះតែជនរងគ្រោះបានដាច់ខ្យល់ស្លាប់ទៅហើយ» ។
ព័ត៌មានលើហ្វេសប៊ុកកងរាជអាវុធហត្ថរាជធានីភ្នំពេញដដែលបានបញ្ជាក់ថា ៖ «ទីបំផុតជនរងគ្រោះឈ្មោះ តាំង សេងលី ពិតជាបានបាត់បង់ជីវិតពិតប្រាកដមែន ហើយក្នុងហេតុការនោះ ជនងរងគ្រោះថែមទាំងបាត់បង់កាបូបដាក់ប្រាក់ធំមួយផងដែរ ព្រោះជនរងគ្រោះជាចុងភៅទើបតែមកពីទទួលថ្លៃឈ្នួលធ្វើម្ហូបការពីភ្ញៀវ ។ ដំណឹងនេះធ្វើឲ្យសាច់ញាតិបងប្អូនជាពិសេសមិត្តរួមជំនាន់ និងអតីតលោកគ្រូអ្នកគ្រូជិត៣០០នាក់ មានក្តីសោកស្តាយ ដោយមិនអស់ចិត្តគ្រប់ៗគ្នា ព្រោះតែមិនអាចជួយជនរងគ្រោះបានទាន់ពេលវេលា» ។
ព្រមជាមួយគ្នានោះនៅថ្ងៃទី២០ ខែមេសា ឆ្នាំ២០១៨ លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ ហើយក៏ជាមិត្តម្នាក់ក្នុងចំណោមមិត្តភក្តិរួមជំនាន់ទសវត្សទី៨០ នៃសាលាបាក់ទូក បានសហការជាមួយមន្ទីរជំនាញ សុខាភិបាលរាជធានី បើកការស៊ើបអង្កេតលើករណីជួយសង្គ្រោះរបស់រថយន្តគិលានសង្គ្រោះ ដែលបានដឹកជនរងគ្រោះទៅបាត់ ហើយដឹកត្រឡប់មកវិញ ។ ការស៊ើបអង្កេតបានរកឃើញថា រថយន្តគិលានសង្គ្រោះដែលដឹកជនរងគ្រោះចេញទៅ និងដឹកមកវិញ គឺជារថយន្តពីរផ្សេងគ្នាតែមានថៅកែតែមួយ ហើយពួកគេមិនមែនជាគ្រូពេទ្យជំនាញ និងពុំមែនជាអង្គភាពពេទ្យ ឬគ្លីនិកឯកជនណាមួយទេ គឺថៅកែពួកគេឈ្មោះ ងួន ប្រាក់ធី ហៅឌី បានទិញរថយន្តមកចាប់សឺរ៉ែនសង្គ្រោះចំនួន០៤គ្រឿង សម្រាប់ស៊ីឈ្នួល ដឹកសព និងអ្នកជំងឺ និងប្រចាំការតាមដងផ្លូវនាពេលយប់ ដើម្បីចាំដឹកអ្នករបួសគ្រោះថ្នាក់ផ្សេងៗយកទៅដាក់តាមគ្លីនិកទទួលថ្លៃសេវាដឹក ។ នៅក្នុងរថយន្តពួកគេក្រៅពីពុំមានគ្រូពេទ្យជំនាញហើយនោះថែមទាំងពុំមានឧបករណ៍សម្ភារ បច្ចេកទេសពេទ្យ សម្រាប់ជួយសង្គ្រោះជនរងគ្រោះផងដែរ ។
កងរាជអាវុធហត្ថរាជធានីភ្នំពេញបញ្ជាក់ថា ៖ «ករណីនេះអាវុធហត្ថរាជធានីភ្នំពេញ និងសហការណ៍ជាមួយមន្ទីរជំនាញផ្នែកសុខាភិបាល ដើម្បីស្រាវជ្រាវបោសសំអាតគ្រប់រថយន្តសង្គ្រោះដែលគ្មានច្បាប់អនុញ្ញាតទាំងអស់ក្នុងរាជធានីភ្នំពេញចាប់ពីពេលនេះតទៅ ដើម្បីការពារដល់អាយុជីវិតជនរងគ្រោះផ្សេងៗទៀតកុំឲ្យជួបរឿងអកុសល» ៕
ចែករំលែកព័តមាននេះ