រាជធានីភ្នំពេញ ៖ រឿងនារីខារ៉ាអូខេខ្មែរម្នាក់ ដែលមិនព្រមអី…អី…ជាមួយភ្ញៀវចិនមួយក្រុម ហើយត្រូវថៅកែចិនស្ទុះទៅចាប់ទាត់ធាក់ស្ទើរកំពុបនោម ដែលកោះសន្តិភាពបានផ្សាយម្សិលមិញនេះ ត្រូវបានបញ្ចប់ហើយ តាមរយៈពាក្យបណ្តឹងទៅក្រសួងមហាផ្ទៃ ។ ប្រភពព័ត៌មានទម្លាយមកថា ថៅកែចិនព្រមសងតម្លៃខូចខាត ដោយបញ្ចប់រឿងអស់៨ពាន់ដុល្លារ ។ នារីដែលរងគ្រោះជាម្ចាស់ដើមបណ្តឹង ក៏ព្រមបញ្ចប់រឿងត្រឹម៨ពាន់ដុល្លារនេះដែរ ។
គួរកត់សម្គាល់ថា កាលពីវេលាម៉ោង៨យប់ថ្ងៃទី២៣ មេសា ។ នារីម្នាក់ក្នុងចំណោមគ្នា៣នាក់ ត្រូវបានថៅកែខារ៉ាអូខេមួយកន្លែង នៅផ្សាររតនាផ្លាហ្សាបឹងត្របែក ប្រើអំពើហិង្សាវាយទាត់ធាក់ស្ទើរកំពុបនោម ដោយសារតែក្រុមនារីទាំងនេះ មិនព្រមកំដរភ្ញៀវចេញទៅអី…អី… ជាមួយនៅផ្ទះសំណាក់ទ្វារនាគខាងក្រៅ ។ បាតុភាពនេះបង្កភ្ញាក់ផ្អើលពេញមុខហាងខារ៉ាអូខេ នៅផ្សាររតនាផ្លាហ្សាបឹងត្របែក ចំណុចខារ៉ាអូខេ
QI HAO GONG GOAN ហៅ (number 1 KTV) សង្កាត់បឹងត្របែក ខណ្ឌចំការមន ។
នារីរងគ្រោះ សុំមិនប្រាប់អត្តសញ្ញាណបានរៀបរាប់ថា ពួកនាងទាំង៣នាក់ជាជនជាតិខ្មែរ មិនបានធ្វើការនៅទីនេះទេ ហើយពួកនាងមកធ្វើការទីនេះ ដោយសារតែស្គាល់មិត្តភក្តិធ្វើការនៅទីនោះ ទូរស័ព្ទហៅទៅធ្វើការជាមួយកំដរភ្ញៀវស្ទាបលេងយកតែលុយធីបប៉ុណ្ណោះ ។ ពេលទៅដល់ខារ៉ាអូខេខាងលើ ពួកគាត់បានឡើងទៅជាន់ទីបួន បន្ទប់ VIP 1 នៅក្នុងនោះ មានភ្ញៀវប្រមាណជា១០នាក់ សុទ្ធតែភ្ញៀវជនជាតិចិនដាច់ដាប ។ ពួកនាងក៏បានចូលទៅក្នុងបន្ទប់នោះ ហើយសួរនាំទៅដឹងថា ភ្ញៀវជនជាតិចិនទាំងនោះបម្រុងនាំពួកនាងទៅផ្ទះសំណាក់ទ្វារនាគ តែពួកនាងមិនព្រម ក៏បើកទ្វារដើរចេញមកក្រៅវិញ ក៏ត្រូវថៅកែហាងជាជនជាតិចិននិងបក្សពួកឃាត់មិនឱ្យទៅណា ដោយបង្ខំឱ្យពួកនាងបម្រើភ្ញៀវវិញ គឺឃើញស្ត្រីខ្មែរកំដរដូចក្របីឃ្លៀចឃើញចេកហៀរទឹកមាត់កក្លាក់ ។ ប៉ុន្តែពួកនាងមិនព្រម នៅតែដើរចេញក៏ត្រូវថៅកែហាងជាជនជាតិចិននោះខឹង បានស្ទុះទៅធាក់ពីក្រោយលើពួកនាងម្នាក់ ក្នុងចំណោម៣នាក់ ហើយបោចសក់វាយដំលើរូបរាងកាយនាងដែលជាស្ត្រីទន់ខ្សោយទាំងកំរោល បណ្តាលឲ្យស្ទើរកំពុបនោម របួសនិងបង្កការភ្ញាក់ផ្អើលពាសពេញកន្លែងកើតហេតុ ។
ក្រោយកើតហេតុ ថៅកែចិននោះបានសងសំណងទៅពួកនាងចំនួន៥០០ដុល្លារជាថ្នូរមិនប្តឹងប្តល់ តែពួកនាងមិនព្រម ក៏បានទៅដាក់ពាក្យបណ្តឹងនៅប៉ុស្តិ៍នគរបាលបឹងត្របែក នឹងសំណូមពរឱ្យអាជ្ញាធរមានសមត្ថកិច្ចដែលពាក់ព័ន្ធជួយរកយុត្តិធម៌ជូនពួកគាត់ផង ព្រោះទង្វើនេះហាក់បីដូចជា មិនឱ្យតម្លៃលើស្ត្រីខ្មែរសោះឡើយ ដែលប្រព្រឹត្តិដោយជនជាតិចិន ជាជនបរទេស ដែលអាងលុយចង់បំបិទមាត់ ។ នគរបាលប៉ុស្តិ៍ប្រាប់កោះសន្តិភាពថា ស្ត្រីរងគ្រោះបានទៅដាក់ពាក្យបណ្តឹងនៅក្រសួងមហាផ្ទៃបន្តទៀតហើយ ។នៅល្ងាចថ្ងៃទី២៤ មេសា នគរបាលព្រហ្មទណ្ឌក្រសួងមហាផ្ទៃបាននាំខ្លួនថៅកែចិនទៅដោះស្រាយបញ្ហាតាមពាក្យបណ្តឹងរបស់នារីរងគ្រោះ ព្រមទាំងបានបញ្ចប់ត្រឹមសំណង៨ពាន់ដុល្លារ ។
រឿងប៉ុណ្ណឹង…សងប៉ុណ្ណឹង…បើថៅកែចិនមិនរាងទេ…ថ្ងៃក្រោយសុំកុំរាង !
ចែករំលែកព័តមាននេះ