រាជធានីភ្នំពេញ ៖ ខណៈកម្លាំងពលកម្មក្នុងប្រទេសកម្ពុជានៅមានតម្លៃទាបជាងបណ្ដាប្រទេសមួយចំនួន និងស្របពេលដែលធនធានជំនាញក៏អាចប្រកួតប្រជែងជាមួយបណ្ដាប្រទេសទាំងនោះបាន វិនិយោគិនមកពីអឺរ៉ុប, កាណាដា ក៏ដូចជាសហរដ្ឋអាមេរិក បានបង្ហាញពីចំណាប់អារម្មណ៍របស់ខ្លួនលើការវិនិយោគរោងចក្រដំឡើងកង់ ដើម្បីនាំចេញទៅទីផ្សារអន្តរជាតិ ។
ថ្លែងក្នុងជំនួបជាមួយវិនិយោគិនមកពីបណ្ដាប្រទេសទាំងនោះកាលពីរសៀលថ្ងៃទី២៤ មេសា លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានលើកឡើងថា ទីផ្សារកង់នៅក្រៅប្រទេសកំពុងមានការពេញនិយមជាខ្លាំង និងមានតម្លៃខ្ពស់ផងដែរ ពិសេសប្រភេទកង់ជិះឡើងភ្នំ និងជិះសម្រាប់ហាត់ប្រាណ ។ សម្រាប់កង់ដែលកម្ពុជាបានផលិតនាំចេញបច្ចុប្បន្ន ក៏មានការទទួលស្គាល់ពីទីផ្សារអន្តរជាតិផងដែរ ទាំងការដំឡើង និងផ្សារភ្ជាប់គ្នា ។ ដូចនេះហើយទើបវិនិយោគិនមកពីបណ្ដាប្រទេសដែលមានទីផ្សារកង់ទាំងនោះ បានមកកម្ពុជានិងស្វែងរកការវិនិយោគដំឡើងកង់នេះតែម្ដង ។
លោកបញ្ជាក់ថា ៖« ដោយសារតែកម្លាំងពលកម្មនៅអាមេរិក កាណាដា និងហុងកុង ជាដើមមានតម្លៃខ្ពស់ ដូចនេះ វិនិយោគិនប្រទេសទាំងនោះត្រូវងាកទៅរកប្រទេសណាដែលមានកម្លាំងពលកម្មទាបជាង ហើយកម្ពុជាគឺជាគោលដៅមួយរបស់ពួកគេ ព្រោះទាំងជំនាញ ធនធាន និងតម្លៃពលកម្ម ក៏ជាចំណាប់អារម្មណ៍របស់ពួកគេដែរ » ។
លោករដ្ឋមន្ត្រីបន្ដថា ៖« វិនិយោគិនទាំងនោះមានជាច្រើនប្រភេទ ដោយអ្នកខ្លះចាប់អារម្មណ៍លើការផលិតលីបកង់ អ្នកខ្លះផលិតតួកង់ និងច្រវាក់កង់ ជាដើម រួចហើយយកគ្រឿងបង្គុំទាំងនោះទៅដំឡើងជាកង់សម្រាប់នាំចេញទៅកាន់ប្រទេសណាដែលមានតម្រូវការ» ។
លោករដ្ឋមន្ត្រីបន្ថែមថា បើសិនជាការវិនិយោគនេះបានសម្រេចនោះ ប្រជាពលរដ្ឋជាច្រើននៅក្នុងមូលដ្ឋាន អាចនឹងទទួលបានផលប្រយោជន៍ជាច្រើន ដូចជា ការងារផ្ទាល់នៅក្នុងរោងចក្រ និងអ្នកប្រកបរបរផ្សេងៗទៀតនៅក្បែរៗរោងចក្រ ជាពិសេសកម្ពុជាក៏មានផលិតផលជាច្រើនសម្រាប់នាំចេញទៅកាន់ទីផ្សារអន្តរជាតិផងដែរ ។
លោកថា ៖« តាមរយៈការពិភាក្សាជាមួយយើងឃើញថា ពួកគាត់បានបង្ហាញពីការចាប់អារម្មណ៍ខ្លាំង ហើយសន្យានឹងបណ្ដាក់ទុនវិនិយោគវិស័យកង់នេះនៅកម្ពុជា ដោយនឹងបញ្ជូនអ្នកជំនាញរបស់គេមកសិក្សាជាបន្តបន្ទាប់ទៀត ។ ដោយឡែក សម្រាប់ការងារសាងសង់រោងចក្រ ក៏ត្រូវការពេលវេលាបន្តិចដែរដើម្បីលេចចេញជារូបរាង ក៏ប៉ុន្តែយើងជឿថា នៅចុងឆ្នាំនេះ រោងចក្រដំឡើងទោចក្រយាននឹងមានជាបន្តបន្ទាប់នៅកម្ពុជាយើង » ។
គួរបញ្ជាក់ថា បើតាមរបាយការណ៍របស់ក្រសួងពាណិជ្ជកម្ម ក្នុងឆ្នាំ២០១៧ ការនាំចេញកង់ពីកម្ពុជាទៅកាន់ទីផ្សារអន្តរជាតិ មានចំនួនជាង១,៨លានគ្រឿង ស្មើនឹងទឹកប្រាក់ជាង៣០០លានដុល្លារអាមេរិក ខណៈការនាំចេញសរុបក្រោមការអនុគ្រោះពន្ធ ក្នុងឆ្នាំ២០១៧ (អ្វីគ្រប់យ៉ាង លើកលែងអាវុធ) មានទឹកប្រាក់សរុបប្រមាណ៩ពាន់លានដុល្លារអាមេរិក ៕
ចែករំលែកព័តមាននេះ