ខេត្តក្រចេះ ៖ អំពើហិង្សានឹកស្មានមិនដល់មួយព្រោះតែរឿងបាត់ពងមាន់ក្នុងសំបុកបាន កើតជាទំនាស់រវាងឪពុកបង្កើត និងកូនប្រុសបង្កើត ក្លាយជាហិង្សាយ៉ាងចាស់ដៃដោយប្រើសុទ្ធតែពូថៅកាប់គ្នាបណ្តាលឲ្យបុរសជាកូនត្រូវរងរបួស ចំណែកឯបុរសជាឪពុកត្រូវបានចាប់ខ្លួន ។ ករណីហិង្សារវាងឪពុក និងកូនដោយសាររឿងបន្តិចបន្តួចសោះបានកើតឡើងទៅជាជម្លោះធ្ងន់ធ្ងរលើគ្រួសារមួយនៅភូមិថ្មរាប ឃុំព្រែកប្រសព្វ ស្រុកព្រែកប្រសព្វ កាលពីថ្ងៃទី២៥ ខែមេសា ឆ្នាំ២០១៨ ។
គ្រួសារនេះ មានកូនចំនួន៨នាក់ ស្រី២នាក់ ហើយកូនជាជនដែលបង្កហេតុឈ្មោះ ឡឹង ស៊ីផល អាយុ៤១ឆ្នាំ ជាកូនប្រុសទី៤ និងមានជម្ងឺលើសឈាមស្លាប់មួយចំហៀងខ្លួន ។ ចំណែកឯបុរសជាឪពុកដែលជាប់ចោទថា បានបង្កហិង្សាមកលើកូនយ៉ាងចាស់ដៃនេះ ឈ្មោះ ឡឹង ឈិត អាយុ៧១ឆ្នាំ មានជម្ងឺលើសឈាមប្រចាំកាយដូចគ្នា ។
បើតាមអធិការនគរបាលស្រុកព្រែកប្រសព្វលោកវរសេនីយ៍ឯក ចាន់ សុផល្លា បានឲ្យដឹងថា ថ្ងៃកើតហេតុគឺឪពុកកូនទាំងពីរនាក់ បានឈ្លោះប្រកែកគ្នាពីរឿងបាត់ពងមាន់ក្នុងសំបុក ។ ក្រោយការប្រកែកគ្នាបានកើតយ៉ាងតឹងសរសៃ.កដាក់គ្នាបុរសដៃដល់ជាកូនក៏បានស្រវ៉ាយកពូថៅគប់ទៅលើបុរសជាឪពុកបណ្តាលឲ្យត្រូវចំចង្កេះ ។ ភ្លាមនោះបុរសជាឪពុកក៏ បានស្រវ៉ាយកពូថៅនោះមកកាប់ទៅលើជនជាកូនបណ្តាលឲ្យត្រូវចំភ្លៅខាងស្តាំ១ពូថៅត្រូវ ចំកំភួនជើងខាងស្តាំ១ពូថៅ និងត្រូវចំកែងជើងខាងឆ្វេង១ពូថៅ ។
លោកអធិការបានបញ្ជាក់ទៀតថា ភ្លាមៗបុរសវ័យចំណាស់ជាឪពុកត្រូវបានកម្លាំងនគរ បាលព្រហ្មទណ្ឌស្រុកចុះទៅនាំខ្លួនមកសាកសួរ ខណៈដែលបុរសជាកូនប្រុសដែលរងរបួស ធ្ងន់ធ្ងរលើរាងកាយដោយសាររងការកាប់ប្រហារពីឪពុកនោះត្រូវបានក្រុមគ្រួសារនាំទៅសង្គ្រោះនៅមន្ទីរពេទ្យស្រុក ៕
ចែករំលែកព័តមាននេះ