រាជធានីភ្នំពេញ ៖ សមត្ថកិច្ចនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃ កាលពីរសៀលថ្ងៃទី២៥ មេសា ២០១៨ បានបញ្ជូនខ្លួនស្ត្រីសង្ស័យម្នាក់ ពាក់ព័ន្ធករណីជួញដូរគ្រឿងញៀនឆ្លងដែនប្រមាណជិត៤គីឡូក្រាមតាមកញ្ចប់ផ្ញើតាមប្រៃសណីយ៍ ។ ជនសង្ស័យឈ្មោះ ឈី ស៊ីថន ភេទស្រី អាយុ៣០ឆ្នាំ ។
ប្រភពព័ត៌មាននៅសាលាដំបូងរាជធានីភ្នំពេញបានឱ្យដឹងថា ប្រតិបត្តិការបង្ក្រាបករណីជួញដូរសារធាតុញៀនឆ្លងដែននេះ គឺបានធ្វើឡើងដោយមានការសហការគ្នា រវាងនាយកដ្ឋានសន្តិសុខផ្ទៃក្នុង និងការិយាល័យទី៧នៃមន្ទីរប្រឆាំងគ្រឿងញៀន និងគណៈកម្មការបង្ក្រាបបទល្មើស កាលពីថ្ងៃទី២៣ មេសា វេលាម៉ោង៥ល្ងាច នៅចំណុចប្រៃសណីយ៍កម្ពុជា ក្នុងសង្កាត់វត្តភ្នំ ខណ្ឌដូនពេញ ។
ប្រភពឱ្យដឹងថា សមត្ថកិច្ចចម្រុះនៃអនុគណៈកម្មការត្រួតពិនិត្យគ្រឿងញៀន តាមបញ្ញើប្រៃសណីយ៍មានការសំរបសំរួលពីព្រះរាជអាជ្ញារងលោក រៀល សុភិន បានដំណើរការត្រួតពិនិត្យលើកញ្ចប់បញ្ញើមិនប្រក្រតី ដែលផ្ញើមកពីប្រទេសប៊ែលហ្ស៊ិកមកកម្ពុជា ហើយអ្នកទទួលជាស្ត្រីខ្មែរម្នាក់ក៏ត្រូវឃាត់ខ្លួន និងចាប់យកវត្ថុតាងជាសារធាតុញៀនប្រភេទអុិចស្តាស៊ីលគ្រាប់(MDMA) ទម្ងន់សរុប៣ ៤០០ក្រាម ។ ក្រោយពីឃាត់ខ្លួន សមត្ថកិច្ចបានបញ្ជូនស្ត្រីសង្ស័យទៅកាន់សាលាដំបូងរាជធានីភ្នំពេញ ចាត់ការតាមនីតិវិធី ៕
ចែករំលែកព័តមាននេះ