រាជធានីភ្នំពេញ ៖ សមត្ថកិច្ចនគរបាលនាយកដ្ឋានសន្តិសុខផ្ទៃក្នុងក្រសួងមហាផ្ទៃ កាលពីរសៀលថ្ងៃទី២៥ មេសា ២០១៨ បានបញ្ជូនខ្លួនជនសង្ស័យម្នាក់ពាក់ពន្ធករណីជួញដូរគ្រឿងញៀនឆ្លងដែន ប្រមាណជិត៤គីឡូក្រាម ។
ជនសង្ស័យខាងលើឈ្មោះ ឈី ស៊ីថន ភេទស្រី អាយុ៣០ឆ្នាំ ។
ប្រភពព័ត៌មាននៅសាលាដំបូងរាជធានីភ្នំពេញបានឲ្យដឹងថា កិច្ចប្រតិបត្តិការបង្ក្រាបករណីជួញដូរសារធាតុញៀនឆ្លងដែននេះ គឺបានធ្វើឡើងដោយមានការសហការណ៍គ្នារវាងនាយកដ្ឋានសន្តិសុខផ្ទៃក្នុង និង ការិយាល័យទី៧ នៃមន្ទីរប្រឆាំងគ្រឿងញៀន និងគណៈកម្មការបង្ក្រាបបទល្មើស កាលពីថ្ងៃទី២៣ មេសា ២០១៨ វេលាម៉ោង៥ល្ងាចនៅចំណុចប្រៃសណីយ៍កម្ពុជា ក្នុងសង្កាត់វត្តភ្នំ ខណ្ឌដូនពេញ រាជធានីភ្នំពេញ ។
នៅវេលាថ្ងៃខែខាងលើនេះសមត្ថកិច្ចចម្រុះនៃអនុគណៈកម្មការត្រួតពិនិត្យគ្រឿងញៀនតាមបញ្ញើរប្រៃសណីយ៍ ដោយមានការសម្របសម្រួលពីលោកព្រះរាជអាជ្ញារងលោក រៀល សុភិន បានដំណើរការត្រួតពិនិត្យស៊ើបអង្កេតលើកញ្ចប់បញ្ញើរមិនប្រក្រតី ដែលផ្ញើមកពីប្រទេសបែលហ្ស៊ិកចូលមកកម្ពុជា ហើយមានអ្នកទទួលជាជនជាតិខ្មែរម្នាក់ឃាត់ខ្លួន (ជនសង្ស័យ) ជាអ្នកទទួលកញ្ចប់បញ្ញើរនោះ ។ ក្នុងនោះចាប់យកវត្ថុសារធាតុញៀនប្រភេទអិចស្តាសគ្រាប់(MDMA)ទម្ងន់សរុប៣៤០០ក្រាម ។
ក្រោយពីឃាត់ខ្លួនសមត្ថកិច្ចបានបញ្ជូនសង្ស័យទៅកាន់សាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ