ខេត្តកណ្តាល ៖ ប៉ូលិសព្រហ្មទណ្ឌស្រុកកៀនស្វាយ បានបញ្ជូនបុរសជាជនសង្ស័យម្នាក់ទៅតុលាការខេត្តនៅរសៀលថ្ងៃទី២៥ មេសានេះ ដោយជាប់ចោទពីបទរួមភេទជាមួយអនីតិជនក្រោម១៥ឆ្នាំប្រព្រឹត្តឡើងកាលពីយប់ថ្ងៃទី២២ មេសា វេលាម៉ោង៨យប់ នៅភូមិស្តៅកន្លែង៥ ឃុំដីឥដ្ឋ ស្រុកកៀនស្វាយ។
នារីរងគ្រោះខាងលើអាយុ១៣ឆ្នាំ មានទីលំនៅក្នុងខេត្តកណ្តាល ចំណែកជនសង្ស័យឈ្មោះ ស៊ុយ រតនា ភេទប្រុស អាយុ២០ឆ្នាំ មុខរបរកម្មករ មានទីលំនៅភូមិស្រែអំពិល ឃុំឈើទាល ស្រុកកៀនស្វាយ។
សូមបញ្ជាក់ថា នៅថ្ងៃកើតហេតុ ជនសង្ស័យបានទូរស័ព្ទបបួលនារីរងគ្រោះជាសង្សារមកលេងផ្ទះមិត្តភក្តិរបស់គេម្នាក់ឈ្មោះ អុន ភេទ នៅភូមិស្តៅកន្លែង៥ ឃុំដីឥដ្ឋ ស្រុកកៀនស្វាយ ហើយនារីរងគ្រោះក៏យល់ព្រម។ ភ្លាមនោះជនសង្ស័យក៏ជិះម៉ូតូទៅដឹកនាងមកផ្ទះមិត្តហើយនិយាយគ្នាលេង មួយសន្ទុះក្រោយមកនារីរងគ្រោះក៏ឲ្យជនសង្ស័យជូនទៅផ្ទះវិញ តែជនសង្ស័យប្រាប់ថា «យប់ហើយនៅដេកទីនេះជាមួយខ្លួនមួយយប់ទៅ» បន្ទាប់មកនារីរងគ្រោះនឹងជនសង្ស័យក៏នាំគ្នាទៅដេកនៅលើគ្រែមួយក្រោមផ្ទះរបស់មិត្ត។ ឆ្លៀតពេលនោះជនសង្ស័យក៏ធ្វើសកម្មភាពចាប់អោបថើប និងរួមភេទជាមួយនារីរងគ្រោះសំរេច១ម្តង រួចក៏នាំគ្នាដេក រហូតដល់យប់ជ្រៅជនសង្ស័យបំរុងម្តងទៀត តែនារីមិនព្រមក៏នាំគ្នាដេកទៅ រហូតដល់ម៉ោង៤ទៀបភ្លឺឈានចូលថ្ងៃទី២៣ មេសា ជនសង្ស័យក៏ជូននារីរងគ្រោះត្រឡប់ទៅផ្ទះវិញ។ លុះដល់ថ្ងៃទី២៤ មេសា វេលាម៉ោង២រសៀល ទើបម្តាយនារីរងគ្រោះមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលដីឥដ្ឋ។
ក្រោយពីទទួលបានពាក្យប្តឹងភ្លាមកម្លាំងប៉ុស្តិ៍បានចុះទៅនាំជនសង្ស័យមកសាកសួរ ហើយជនសង្ស័យសារភាពថា «ខ្លួនពិតជាបានធ្វើសកម្មភាពរួមភេទជាមួយនារីនរងគ្រោះជាសង្សាពិតប្រាកដមែន»។ ក្រោយមកប៉ូលិសប៉ុស្តិ៍បានបញ្ជូនជនសង្ស័យទៅអធិការដ្ឋាននគរបាលស្រុកកៀនស្វាយ ដើម្បីបន្តចាត់ការតាមនីតិវិធី។
ពាក់ព័ន្ធនឹងករណីនេះ ក្រុមគ្រួសារជនសង្ស័យព្យាយាមទៅផ្សះផ្សាជាមួយម្តាយជនរងគ្រោះថា «កូនស្រលាញ់គ្នាគួរតែរៀបការឲ្យគ្នាទៅ» ចំណែកម្តាយជនរងគ្រោះហាក់មានទំនងចង់ឲ្យកូនជួបគ្នា តែអ៊ុំជនរងគ្រោះជំទាស់ដោយផ្អែកថា «ក្មួយនៅក្មេងមិនគ្រប់អាយុត្រូវរៀបការ»។ សំដីទាំងនេះ គឺជាការលើកឡើងរបស់ក្រុមគ្រួសារជនសង្ស័យ ចំណែកបុរសជាប់ខ្នោះដៃអាល័យស្នេហ៍ក៏ទទូចសុំឲ្យឪពុកម្តាយរបស់ខ្លួនសម្រួលម្តាយខាងស្រីបើកផ្លូវឲ្យរូបគេទាំងពីរនាក់បានជួបគ្នាដើម្បីរៀបការ។ ប៉ុន្តែពេលនេះវាសនារបស់ជនសង្ស័យគេចផុតពីគុគបានលុះត្រាម្តាយខាងស្រីជាអ្នកសំរេច ដោយឡែកប្រព័ន្ធតុលាការ គឺត្រូវអនុវត្តច្បាប់ផ្អែកលើក្មេងស្រីជាអនីតិជនអាយុក្រោម១៥ឆ្នាំ ជនសង្ស័យក្នុងរឿងនេះមិនអាចគេចផុតពីសំណាញ់ច្បាប់បានទេ៕
ចែករំលែកព័តមាននេះ