រាជធានីភ្នំពេញ ៖ វិនិយោគិនចិនមកពីខេត្តក្វាងស៊ី បានបង្ហាញពីគោលបំណងវិនិយោគលើការផលិតខ្សែភ្លើង និងរៀបចំប្រព័ន្ធទឹកស្អាតនៅក្នុងខេត្តកែប និងខេត្តកំពត ដើម្បីផ្គត់ផ្គង់តម្រូវការប្រើប្រាស់ក្នុងប្រទេសកម្ពុជា ។ នេះបើតាមជំនួបរវាងលោក ឆឹន អ៊ូ (Chen Wu) អភិបាលខេត្តក្វាងស៊ី ជាមួយលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា កាលពីថ្ងៃទី២៣ មេសា កន្លងមក ។
លោក ឆឹន អ៊ូ បានស្នើឲ្យក្រសួងពាណិជ្ជកម្ម ជួយគាំទ្រគម្រោងវិនិយោគនេះ ដើម្បីបង្កើនទំហំពាណិជ្ជកម្មរវាងខេត្តក្វាងស៊ី និងកម្ពុជាផងដែរ ហើយលោកសន្យានឹងខិតខំកៀងគរវិនិយោគិនខេត្តក្វាងស៊ី មកបណ្ដាក់ទុនវិនិយោគនៅកម្ពុជាបន្ថែមទៀត ។
លោកថា ៖« ខ្ញុំនឹងខិតខំកៀងគរវិនិយោគិនខេត្តក្វាងស៊ី ឲ្យចូលមកបណ្តាក់ទុនច្រើនថែមទៀតនៅកម្ពុជា ដើម្បីឈានទៅសម្រេចគោលដៅយុទ្ធសាស្ត្រផ្លូវមួយ ខ្សែក្រវាត់មួយ ដែលផ្តួចផ្តើមដោយលោក ស៊ី ជិនពីង ប្រធានាធិបតីនៃសាធារណរដ្ឋប្រជាមានិតចិន » ។
រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ បានសម្តែងនូវការគាំទ្រពេញទំហឹងចំពោះគម្រោងវិនិយោគរបស់ខេត្តក្វាងស៊ី និងបានសន្យាជួយសម្រួលគម្រោងនេះឲ្យលេចរូបរាងឡើងនាពេលអនាគត។ ជាមួយគ្នានេះ លោករដ្ឋមន្ត្រីបានស្នើឲ្យលោកអភិបាលខេត្ត និងវិនិយោគិនខេត្តក្វាងស៊ី ពិចារណាវិនិយោគលើការសាងសង់ឡសម្ងួតទិន្នផលកសិកម្ម និងកែច្នៃកសិផលមួយចំនួនដូចជា ស្រូវ ស្វាយ ពោត និងដំឡូងមី ដើម្បីនាំចេញទៅកាន់ប្រទេសទី៣ បន្ថែមទៀត ។
លោកបន្តថា ៖« ចិនពិតជាដៃគូដ៏មានសារសំខាន់ណាស់ មិនត្រឹមតែផ្តល់ជំនួយធំជាងគេដល់កម្ពុជានោះទេ ប៉ុន្តែក៏ជាប្រទេសដែលបាននិងកំពុងវិនិយោគធំជាងគេនៅកម្ពុជា ហើយទេសចរចិនមកទស្សនាកម្ពុជា ក៏ច្រើនជាងគេផងដែរ » ។
គោលបំណងសំខាន់នៃដំណើរទស្សនកិច្ចរបស់ប្រតិភូខេត្តក្វាងស៊ី មកកម្ពុជានាពេលនេះ គឺដើម្បីអញ្ជើញមន្ត្រីជាន់ខ្ពស់កម្ពុជា ចូលរួមពិព័រណ៍ចិន-អាស៊ាន លើកទី១៥ ដែលនឹងធ្វើឡើងពីថ្ងៃទី១២-១៥ ខែកញ្ញា ឆ្នាំ២០១៨ ខាងមុខ នៅទីក្រុងណាននីងនៃតំបន់ស្វយ័តក្វាងស៊ី ក្រោមប្រធានបទ « រួមគ្នាកសាងវិថីសូត្រសមុទ្រសតវត្សរ៍ទី២១ លើកិច្ចសហប្រតិបត្តិការនៃភាពច្នៃប្រឌិតថ្មី ចិន-អាស៊ាន » ។ ពិព័រណ៍លើកនេះ កម្ពុជាត្រូវធ្វើជាប្រទេសកិត្តិយស បន្ទាប់ពីព្រុយណេ ៕
ចែករំលែកព័តមាននេះ