ខេត្តប៉ៃលិន ៖ នៅរដូវដាំដុះដើមឆ្នាំនេះ អាកាសធាតុពិតជាអំណោយផលដល់ដំណាំកសិកម្ម ពិសេស ពោតក្រហម និងដំឡូងមី និងដំណាំរួមផ្សំដទៃទៀត ធ្វើឲ្យកសិករក្នុងក្រុងប៉ៃលិនសប្បាយរីករាយយ៉ាងខ្លាំង ខណៈដំណាំរបស់ពួកគាត់លូតលាស់ល្អ មិនមានការខូចខាតដូចឆ្នាំមុនៗ នាំឱ្យពួកគាត់មានសង្ឃឹមថា ពេលប្រមូលផលនឹងទទួលបានទិន្នផលខ្ពស់ ។
លោក សាន្ត សុខា កសិកររស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន បានឱ្យដឹងថា ឆ្នាំនេះ តម្លៃទីផ្សារពោតក្រហម និងដំឡូងមី ឡើងថ្លៃខ្ពស់ជាងឆ្នាំមុនៗ ធ្វើឱ្យពួកគាត់មានកម្លាំងចិត្ត និងប្រញាប់ធ្វើការដាំដុះឡើងវិញឲ្យទាន់រដូវ ។
លោកនិយាយថា ៖« អាកាសធាតុឆ្នាំនេះ ពិតជាអំណោយផលមែន ក្រោយពីដាំរួច ភ្លៀងបានធ្លាក់មកជាប់ៗគ្នារាល់ថ្ងៃ ធ្វើឱ្យដំណាំដុះល្អ ទាំងពោតក្រហម និងដើមដំឡូងមី ដោយមិនបានទិញពូជ ឬយកដើមទៅដាំជួសបន្ថែមថ្មីដូចឆ្នាំមុនៗនោះទេ » ។
លោក សាន្ត សុខា បានកត់សម្គាល់ថា កន្លងមក ពួកគាត់ម្នាក់ៗដែលធ្លាប់តែរអ៊ូរឿងជំពាក់បំណុលអង្គការ ឬធនាគារកាលពីប៉ុន្មានឆ្នាំមុន រហូតអ្នកខ្លះប្រកាសលក់ដី ទៅទូទាត់ការខាតបង់ចម្ការនោះ តែពេលនេះ លែងសូវឮមាត់ដូចសព្វមួយដងហើយ ពោលគឺស្ងាត់តែម្តង ។
លោកមានសុទិដ្ឋិនិយមថា ៖« បើសិនជាអាកាសធាតុអំណោយផលតាំងពីដើមឆ្នាំរហូតដល់ពេលប្រមូលផល ហើយទីផ្សារកសិផលយើងនៅតែមានតម្លៃខ្ពស់ដូចពេលនេះ ខ្ញុំជឿជាក់ថា កសិករទូទាំងប្រទេស នឹងអាចសងបំណុលដែលជំពាក់គេនោះអស់ ហើយក៏អាចមានជីវភាពធូរធារបន្តិចម្តងៗសាជាថ្មីឡើងវិញដែរ » ។
លោកក៏បានសម្ដែងនូវអំណរគុណដល់មន្ទីរពាក់ព័ន្ធ ក៏ដូចជាអាជ្ញាធរខេត្ត ពិសេសរាជរដ្ឋាភិបាល ដែលបានយកចិត្តទុកដាក់ក្នុងការចរចាជាមួយឈ្មួញឱ្យរក្សាតម្លៃទីផ្សារកសិផលនៅខ្ពស់ដដែលផងដែរ ។
សូមបញ្ជាក់ថា តម្លៃទីផ្សារដំឡូងមីបច្ចុប្បន្នមានការឡើងថ្លៃខ្លាំង ដោយកន្លែងខ្លះ ដំឡូងមីស្រស់ ឈ្មួញទិញ១គីឡូក្រាមរហូតដល់៣ទៅ៤បាត (ប្រាក់ថៃ) ឬស្មើនឹងជាង៣០០ទៅជាង៤០០រៀល ។ ចំណែកដំឡូងមីស្ងួត តម្លៃពី៧ទៅ៨បាតក្នុង១គីឡូក្រាម បើធៀបនឹងឆ្នាំមុនៗ ខុសគ្នាយ៉ាងខ្លាំង ដោយដំឡូងមីស្រស់១គីឡូក្រាម ត្រឹមតែ០,៩ទៅ១,៥បាត ហើយចំណិតដំឡូងមីស្ងួត តម្លៃត្រឹមតែ៤ទៅ៥បាតប៉ុណ្ណោះ។ ហេតុដូច្នេះហើយ ទើបរហូតមកដល់ពេលនេះ កសិករម្នាក់ៗខំប្រឹងប្រែងដាំដំឡូងមីស្ទើរគ្រប់ៗគ្នា ៕
ចែករំលែកព័តមាននេះ