រាជធានីភ្នំពេញ ៖ កំពង់ផែស្វយ័តក្រុងព្រះសីហនុ ជាច្រកដឹកជញ្ជូនតាមផ្លូវទឹកមួយយ៉ាងសំខាន់ក្នុងការនាំចេញផលិតផលរបស់កម្ពុជាទៅកាន់ទីផ្សារអន្តរជាតិ និងនាំចូលទំនិញសព្វសារពើមកផ្គត់ផ្គង់តម្រូវការក្នុងស្រុក ។ បច្ចុប្បន្នកំពង់ផែមួយនេះ កាន់តែដើរតួសំខាន់ឡើងៗ និងកំពុងពង្រីកវិសាលភាពរបស់ខ្លួនបន្ថែមទៀតដើម្បីបំពេញតាមតម្រូវការ ខណៈសកម្មភាពដឹកជញ្ជូនទំនិញតាមផ្លូវទឹកកំពុងមានកំណើនខ្ពស់…
រាជធានីភ្នំពេញ ៖ កំពង់ផែស្វយ័តក្រុងព្រះសីហនុ ជាច្រកដឹកជញ្ជូនតាមផ្លូវទឹកមួយយ៉ាងសំខាន់ក្នុងការនាំចេញផលិតផលរបស់កម្ពុជាទៅកាន់ទីផ្សារអន្តរជាតិ និងនាំចូលទំនិញសព្វសារពើមកផ្គត់ផ្គង់តម្រូវការក្នុងស្រុក ។ បច្ចុប្បន្នកំពង់ផែមួយនេះ កាន់តែដើរតួសំខាន់ឡើងៗ និងកំពុងពង្រីកវិសាលភាពរបស់ខ្លួនបន្ថែមទៀតដើម្បីបំពេញតាមតម្រូវការ ខណៈសកម្មភាពដឹកជញ្ជូនទំនិញតាមផ្លូវទឹកកំពុងមានកំណើនខ្ពស់ ។ តួយ៉ាង ក្នុងត្រីមាសទី១ឆ្នាំនេះ បរិមាណទំនិញ ឆ្លងកាត់បានកើនឡើងប្រមាណ២២% បើធៀបនឹងគ្រាដូចគ្នាឆ្នាំមុន ។
ប្រធានការិយាល័យស្ថិតិកំពង់ផែស្វយ័តក្រុងព្រះសីហនុ បានមានប្រសាសន៍កាលពីថ្ងៃទី២៣ មេសា កន្លងមកថា បរិមាណទំនិញឆ្លងកាត់កំពង់ផែស្វយ័តក្រុងព្រះសីហនុនៅក្នុងត្រីមាសទី១ ឆ្នាំនេះ មានចំនួនសរុបជាង១,២លានតោន កើនឡើងប្រមាណ២២,៨៦% បើធៀបនឹងគ្រាដូចគ្នាឆ្នាំមុន ។
លោក អ៊ុក សុមេធី ប្រធានការិយាល័យស្ថិតិរូបនេះបន្ដថា ៖« នៅត្រីមាសទី១កន្លងទៅនេះ ទំនិញដែលយើងនាំចេញច្រើនជាងគេ មាន សម្លៀកបំពាក់ អង្ករ រួមនឹងកសិផលមួយចំនួន ។ ដោយឡែក ទំនិញនាំចូលវិញ រួមមាន សម្ភារប្រើប្រាស់បម្រើនៅក្នុងវិស័យកាត់ដេរ គ្រឿងអេឡិចត្រូនិក និងសម្ភារប្រើប្រាស់ផ្សេងៗទៀត » ។
បច្ចុប្បន្ន សកម្មភាពដឹកជញ្ជូនទំនិញនៅក្នុងកំពង់ផែកាន់តែមានសក្ដានុពលខ្លាំងឡើងៗ ហើយដើម្បីបំពេញតាមតម្រូវការ កំពង់ផែបានបន្ថែមគ្រឿងចក្រលើកដាក់ទំនិញ និងពង្រីកផ្ទៃដីឲ្យកាន់តែទូលាយ ដើម្បីសម្រួលដល់ការលើកដាក់ទំនិញមិនឲ្យកកស្ទះ និងទាន់ពេលវេលា ។
លោកសុមេធី បន្តថា ៖« យើងមានផែនការច្បាស់លាស់ក្នុងការបង្កើនផលិតភាពកំពង់ផែ។ ដូច្នេះហើយ ការដឹកទំនិញឆ្លងកាត់កាន់តែមានសកម្មភាពមមាញឹកទៅៗ ហើយនៅខែឧសភាខាងមុខនេះ យើងនឹងដាក់ឱ្យដំណើរការផែពហុបំណង, ពង្រឹងផលិតភាពការងារ និងការបណ្តុះបណ្តាលឱ្យមានប្រសិទ្ធភាពជាងមុន, មានផែនការបំពាក់គ្រឿងចក្រលើកដាក់ និងដឹកជញ្ជូនបន្ថែមទៀត និងមានគម្រោងធ្វើផែកុងតឺន័រថ្មីមួយទៀតសម្រាប់ឆ្លើយតបទៅនឹងការកើនឡើងនាពេលខាងមុខ និងដើម្បីទាក់ទាញឱ្យមានអ្នកប្រើប្រាស់ផែកាន់តែច្រើន » ។
ក្រោមកម្ចីពីរដ្ឋាភិបាលជប៉ុន កម្ពុជាកំពុងសាងសង់កំពង់ផែទឹកជ្រៅមួយទៀតមានជម្រៅជាង១៤ម៉ែត្រ ដែលអនុញ្ញាតឲ្យនាវាដឹកទំនិញនៅក្នុងតំបន់ប្រហែល៩៣%ចូលចតដោយគ្មានឧបសគ្គ ។ បន្ទាប់ពីស្ថាបនារួច នឹងជួយឲ្យតម្លៃសេវាដឹកទំនិញតាមផ្លូវសមុទ្រថយចុះច្រើន ខណៈបច្ចុប្បន្ន បើធៀបនឹងសេវាដឹកជញ្ជូនតាមផ្លូវគោកក្នុងស្រុក គឺនៅថ្លៃជាងនៅឡើយ ។ នៅថ្ងៃអនាគត ប្រសិនបើថ្លៃសេវាដឹកជញ្ជូនតាមសមុទ្រថយចុះ នឹងធ្វើឲ្យសេដ្ឋកិច្ច ពាណិជ្ជកម្មក្នុងស្រុកមានលក្ខណៈកាន់តែប្រកួតប្រជែង ហើយមានកំណើនបន្ថែមទៀត ។
តាមការបញ្ជាក់ពីលោក លូ គឹមឈន់ ប្រតិភូរាជរដ្ឋាភិបាល ទទួលបន្ទុកប្រធានអគ្គនាយកកំពង់ផែស្វយ័តក្រុងព្រះសីហនុ កាលពីខែមីនា
កន្លងមកថា ៖« នៅឆ្នាំ២០២២ ការសាងសង់ផែទឹកជ្រៅនឹងរួចរាល់ ហើយចំនួនកុងតឺន័រនឹងកើនឡើងប្រមាណលើសពី៧០០ពាន់កុងតឺន័រ នាវាធុនធំអាចចូលចតបានតាមលក្ខណៈស្តង់ដាគុណភាព ហើយតម្លៃដឹកជញ្ជូនតាមផ្លូវសមុទ្រ នឹងមានលក្ខណៈល្អដូចប្រទេសនៅជុំវិញយើង » ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting លោក ង៉ែត ជូ មានប្រសាសន៍ថា ការនាំចេញ -នាំចូលរបស់កម្ពុជាភាគច្រើន គឺឆ្លងកាត់កំពង់ផែស្វយ័តក្រុងព្រះសីហនុ ។ ដូច្នេះ វាជាច្រកផ្លូវទឹកមួយដ៏សំខាន់សម្រាប់បម្រើដល់វិស័យសេដ្ឋកិច្ចកម្ពុជាទាំងមូល ។
សេដ្ឋវិទូរូបនេះបន្ដថា ៖« អ្វីដែលខ្ញុំបានដឹងពីមតិមួយចំនួន ពីសហគមន៍វិនិយោគមួយចំនួនគេតែងគិតថា ថ្លៃដឹកជញ្ជូនទៅតាមផែហ្នឹង គឺនៅតែមានតម្លៃខ្ពស់ ជាមួយនឹងមូលហេតុផ្សេងៗ។ វាមិនមែនជារឿងផែខ្លួនឯង តែជារឿងបន្ថែមពីលើហ្នឹង ដូចជា សេវាដឹកជញ្ជូនទូទៅនៅស្រុកយើង គឺនៅមានតម្លៃខ្ពស់ ។ អីចឹង ការជួយពង្រឹង និងពង្រីកសេវាកម្មរបស់ផែ ក៏អាចជាផ្នែកមួយជួយលើកទឹកចិត្តដល់វិស័យឯកជនផងដែរ » ។
យោងតាមរបាយការណ៍ហិរញ្ញវត្ថុសម្រាប់រយៈពេល១២ខែ គិតត្រឹមថ្ងៃទី៣១ ខែធ្នូ ឆ្នាំ២០១៧ កំពង់ផែស្វយ័តក្រុងព្រះសីហនុ មានចំណូលប្រមាណជិត៥៧លានដុល្លារ កើនឡើង៨,៨១% បើធៀបនឹងរយៈពេលដូចគ្នាក្នុងឆ្នាំ២០១៦ ។ ប្រាក់ចំណេញសុទ្ធក្រោយបង់ពន្ធ មានប្រមាណជាង៦លានដុល្លារ ថយចុះ៥,៩២% បើធៀបនឹងរយៈពេលដូចគ្នាក្នុងឆ្នាំ២០១៦ ។
គិតត្រឹមថ្ងៃទី៣១ ធ្នូ ឆ្នាំ២០១៧នេះដែរ ទ្រព្យសកម្មសរុបរបស់កំពង់ផែស្វយ័តក្រុងព្រះសីហនុ មានចំនួនជាង៣២០លានដុល្លារ កើនឡើង១៨,២៤% និងមូលធនសរុបមានចំនួនជាង១៦១លានដុល្លារ កើនឡើង២០,៩៥% ។ នេះបើតាមរបាយការណ៍បានបញ្ជាក់ ៕
ចែករំលែកព័តមាននេះ