រាជធានីភ្នំពេញ ៖ ឧប្បត្តិហេតុគ្រោះថ្នាក់ចរាចរមួយបានកើតឡើងបណ្ដាលឲ្យបុរស២នាក់រងរបួសធ្ងន់ធ្ងរ ខណៈពេលដែលជនរងគ្រោះខាងលើកំពុងជិះម៉ូតូម៉ាកឌូក១គ្រឿងឌុបគ្នាបើកបរឆ្លងផ្លូវ ស្រាប់តែមានរថយន្តកូរ៉េ២គ្រឿងបើកបរក្នុងល្បឿនលឿនជ្រុលទៅបុកពេញទំហឹងជាបន្តបន្ទាប់តែម្ដង ។ ឧប្បត្តិហេតុគ្រោះថ្នាក់ចរាចរនោះបានកើតឡើងកាលពីវេលាម៉ោង០៥និង៤៥នាទីល្ងាច ថ្ងៃទី២៤ ខែមេសា ឆ្នាំ២០១៨ នៅលើកំណាត់ផ្លូវ៣០ម៉ែត្រ ស្ថិតនៅក្នុងភូមិតំណាក់ត្រយឹង សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ។
បុរសរងគ្រោះខាងលើឈ្មោះ ឈុន សុធា អាយុ២៥ឆ្នាំ មុខរបរកម្មកររោងចក្រ មានស្រុកកំណើតនៅក្នុងភូមិកំភា ឃុំរំលេច ស្រុកស៊ីធរកណ្តាល ខេត្តព្រៃវែង រងរបួសបាក់ភ្លៅឆ្វេងដៃឆ្វេង ជាអ្នកបើកបរម៉ូតូម៉ាក DUKE ពណ៌សលាយទឹកក្រូច ពាក់ផ្លាកលេខ ភ្នំពេញ ១CV-៧៦៥៩ ។ ចំណែកម្នាក់ទៀតដែលជាអ្នករួមដំណើរជាមួយឈ្មោះ ឱក វណ្ណា ភេទប្រុស អាយុ២៦ឆ្នាំ ត្រូវជាមិត្តភក្តិរួមការងារ មានទីលំនៅក្នុងភូមិបាក់ខែង សង្កាត់បាក់ខែង ខណ្ឌជ្រោយចង្វារ រងរបួសធ្ងន់ ។
ដោយឡែករថយន្តដែលបើកបុកពួកគេជាបន្តបន្ទាប់នោះ ១គ្រឿងជាប្រភេទរថយន្តទ្រុងឃ្លុបបិទជិត ហើយរថយន្តនេះមិនត្រូវបានគេស្គាល់ផ្លាកលេខនោះទេ ព្រោះបើករត់បាត់ស្រមោល ។ ឬឯ១គ្រឿងទៀតម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ ២AJ-៧៤៩១ បើកបរដោយបុរសម្នាក់ក្នុងស្ថានភាពស្រវឹងជោកតែម្ដង និងត្រូវបានប្រជាពលរដ្ឋឃាត់ខ្លួនប្រគល់ជូននគរបាលចាត់ការតាមច្បាប់ ។
តាមប្រភពព័ត៌មានបានឲ្យដឹងថា នៅមុនពេលកើតហេតុ ជនរងគ្រោះទាំង២នាក់បានជិះម៉ូតូម៉ាកឌូកឆ្លងផ្លូវក្នុងទិសដៅពីលិចទៅកើត ខណៈនោះស្រាប់តែមានរថយន្តកូរ៉េមានទ្រុងឃ្លុបបិទជិតមួយគ្រឿង បើកបរក្នុងទិសដៅពីលិចទៅកើតក្នុងល្បឿនយ៉ាងលឿនទៅដល់ក៏បានបុកពេញទំហឹង បណ្ដាលឲ្យរថយន្តនោះដាច់ទ្វារមួយជ្រុះធ្លាក់មកដីរួចក៏បន្តដំណើរទៅមុខគេចខ្លួនបាត់ស្រមោលតែម្ដង ស្របពេលនោះដែរ ស្រាប់តែមានរថយន្តម៉ាកហ៊ីយ៉ាន់ដាយ១គ្រឿងទៀតទៅដល់ល្មម និងបានបុកជនរងគ្រោះថែមមួយតង់ទៀត ដែលជាហេតុធ្វើឲ្យជនរងគ្រោះកាន់តែរងរបួសធ្ងន់ថែមទៀត ។
ប្រភពខាងលើបានបន្តទៀតថា ក្រោយពេលកើតហេតុ រថយន្តបង្កហេតុទី២ ត្រូវបានប្រជាពលរដ្ឋនាំគ្នាឃាត់បាន ហើយអ្នកបើកបរស្រវឹងជោកជាំ បន្ទាប់មមក៏បានប្រគល់ជូននគរបាលការិយាល័យចរាចរណ៍ផ្លូវគោ នៃស្នងការដ្ឋាននគរបាលរាជធានីភ្នំពេញ ចាត់ការតាមច្បាប់ ។ ចំណែកជនរងគ្រោះ ត្រូវបានរថយន្តសង្គ្រោះរបស់អង្គភាព៧១១ ដឹកបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈ ៕
ចែករំលែកព័តមាននេះ