ខេត្តបាត់ដំបង ៖ ពិធីបើកវគ្គហ្វឹកហ្វឺននៅទីលានបាញ់គ្រាប់ពិតមរតកតេជោសែន ភ្នំវាលចាប ស្ថិតនៅភូមិកណ្ដាលស្ទឹង ឃុំអណ្ដើកហែប ស្រុករតនមណ្ឌល ខេត្តបាត់ដំបង ដល់នាយទាហានចំនួន២៣២នាក់ មកពីតំបន់សឹករងខេត្តពោធិ៍សាត់…
ខេត្តបាត់ដំបង ៖ ពិធីបើកវគ្គហ្វឹកហ្វឺននៅទីលានបាញ់គ្រាប់ពិតមរតកតេជោសែន ភ្នំវាលចាប ស្ថិតនៅភូមិកណ្ដាលស្ទឹង ឃុំអណ្ដើកហែប ស្រុករតនមណ្ឌល ខេត្តបាត់ដំបង ដល់នាយទាហានចំនួន២៣២នាក់ មកពីតំបន់សឹករងខេត្តពោធិ៍សាត់ បាត់ដំបង ប៉ៃលិន បន្ទាយមានជ័យ និងមកពីកងពលថ្មើរជើងលេខ៥១, ៥២, និង៥៣ ព្រមទាំងកងការពារព្រំដែនលេខ៥០១, ៥០២, ៥០៣, និង៥០៤ ចំណុះយោធភូមិភាគទី៥ ក្រោមអធិបតីភាព លោកឧត្តមសេនីយ៍ទោ ជា រស់ មេបញ្ជាការងយោធភូមិភាគទី៥ លោកឧត្តមសេនីយ៍ទោ ជុំ សុឃឿន អគ្គនាយករង នាយកដ្ឋានផ្គត់ផ្គង់ក្រសួងការពារជាតិប្រចាំតំបន់២ តំបន់៣ និងតំបន់៤ ដោយមានថ្នាក់នាយការិយាល័យបានមកចូលរួមវេលាព្រឹកថ្ងៃទី២៥ ខែមេសា ឆ្នាំ២០១៨ ។
លោកឧត្តមសេនីយ៍ត្រីយ៍ សួន សុន នាយកសាលាពលទាហានទី៥ បានរាយការណ៍ថា នេះជាលើកទី១ ដែលនៅទីលានបាញ់គ្រាប់ពិតនៅទីនេះបានបើកវគ្គហ្វឹកហ្វឺនយុទ្ធវិធីនេះដល់កងអនុសេនាតូច កងអនុសេនាធំ របស់យោធភូមិភាគទី៥ ក្នុងឆ្នាំ២០១៨ ដែលមានរយៈពេល៣ខែ ចាប់ពីថ្ងៃទី២៥ ខែមេសា នេះទៅដល់ថ្ងៃ២៣ ខែកក្កដា ឆ្នាំ២០១៨នេះ ដោយផ្ដោតលើមេរៀនទ្រឹស្ដីនៅក្នុងថ្នាក់ និងអនុវត្តន៍ជាក់ស្តែងនៅលើទីលានពិតៗ ដោយមានការហូបចុក និងស្នាក់នៅក្នុងទីលាននេះផ្ទាល់តែម្តង ។
បន្តមកលោកឧត្តមសេនីយ៍ទោ ជា រស់ មេបញ្ជាការរងយោធភូមិភាគទី៥ បានថ្លែងថា តំបន់នេះពីអតីតកាលជាតំបន់ព្រៃភ្នំ ហើយជាជម្រកកន្លែងតស៊ូសម័យមានសង្គ្រាមតាំងពីមានកំណើតខ្មែរក្រហមតាំងពីដំបូងមកម្ល៉េះ (ឆ្នាំ១៩៦៨) ដែលកាលនោះ សម្តេច ហេង សំរិន សព្វថ្ងៃជាប្រធានរដ្ឋសភានេះ ក៏ធ្លាប់បានមកលាក់ខ្លួនតស៊ូនៅតំបន់នេះដែរ ហើយបន្ទាប់ពីយើងរកបានសុខសន្តិភាពរួចមក កងទ័ពយើងបានជំរុញកែប្រែតំបន់ឆ្នួនផ្ទុះសង្គ្រាមពីប្រវត្តិសាស្ត្រនេះឲ្យក្លាយទៅជាទីលានសម្រាប់ហ្វឹកហ្វឺន ហាត់បន្ថែមផ្នែកយុទ្ធសាស្ត្រកងទ័ពបន្ថែមទៀត ក្រោយការជួយជ្រោមជ្រែងពី សម្តេចតេជោ ហ៊ុន សែន ជានាយករដ្ឋមន្ត្រី បានជួយឧបត្ថម្ភគាំទ្រក្នុងការបង្កើតផ្លូវថ្នល់ អគារស្នាក់នៅ មន្ទីរពេទ្យ សំខាន់ទីតាំងទីលានដែលត្រូវអនុវត្តន៍ជាក់ស្តែងកើតមាននៅទីនេះផ្ទាល់តែម្តង ព្រោះមានលក្ខណៈភូមិសាស្ត្រអាចទទួលយកបានដោយត្រូវចំណាយថវិកាអស់រាប់លានដុល្លារកន្លងមកនេះ តែពេលនេះនៅតែមិនទាន់គ្រប់គ្រាន់នៅឡើយសម្រាប់កងទ័ពឲ្យមានគុណភាពបន្ថែមទៀត ។
លោកឧត្តមសេនីយ៍ទោ បានពិនិត្យមើលថា គ្រាន់តែទាហានយើងមកលើកនេះជាលើកដំបូងជាង២០០នាក់សោះ ត្រូវខ្វះកន្លែងស្នាក់នៅព្រោះអគារស្នាក់នៅមានតែ៣ខ្នង ដោយមានបងប្អូនយើងខ្លះត្រូវស្នាក់នៅក្នុងអគាររបស់កងរថក្រោះ ចុះបើលើកក្រោយយើងត្រូវការបើកវគ្គហ្វឹកហ្វឺនចំនួនច្រើនទៀតនោះ គឺយើងត្រូវជួបការលំបាកកាន់តែច្រើនចំពោះការស្នាក់នៅរបស់កងទ័ព ដូច្នោះមានតែអំពាវនាវស្វែងរកសប្បុរសជន ឬដៃគូរសម្ព័ន្ធមេត្រីភាពណាដែលអាចជួយបានគឺយើងសុំអំពាវនាវជួយសាងសង់អគារស្នាក់នៅបន្ថែមទៀតដល់កងទ័ពដែលការប៉ាន់ស្មានប្រមាណត្រូវការប្រហែល៣ខ្នងទៀត ។
ពេលនេះយោធភូមិភាគទី៥ កំពុងប្រឈមមុខចំពោះការនាំភ្លើងអគ្គិសនីចូលមកទីនេះត្រូវចំណាយថវិកាប្រមាណពី៥០ទៅ៦០ម៉ឺនដុល្លារ ទើបអាចតភ្លើងចូលមកទីនេះបានទោះបីមានចំណារការអនុញ្ញាតពី សម្តេចតេជោបានរួចមកហើយក្តី ហើយសព្វថ្ងៃនេះគឺប្រើប្រាស់តែភ្លើងម៉ាស៊ីនផ្ទាល់ខ្លួន និងសូឡាដែលមានក្នុងអង្គភាពតែប៉ុណ្ណោះ ។ លោកបានបន្ថែមអំពីកងកម្លាំងទ័ពបានត្រៀមជានិច្ចដើម្បីចូលរួមសមយុទ្ធហនុមានមាសដែលត្រូវធ្វើនៅពេលខាងមុននេះបន្ទាប់ពីបានបញ្ចប់សមយុទ្ធយោធានាគមាសនៅកម្ពុជានាពេលថ្មីៗនេះរួចមក ៕
ចែករំលែកព័តមាននេះ