ខេត្តមណ្ឌលគិរី ៖ លោក ស្វាយ សំអ៊ាង អភិបាលខេត្តមណ្ឌលគិរីបានរំឮកដល់ក្រុមការងារខេត្តត្រូវរូតរះសាងសង់ផ្សារសែនមនោរម្យឡើងវិញ ក្រោយជួបហេតុការណ៏ឆេះហ្មត់ ដើម្បីអភិវឌ្ឍន៍ក្រុងសែនមនោរម្យឲ្យកាន់តែមានភាពល្អប្រសើរ និងទាក់ទាញភ្ញៀវទេសចរណ៍មកកម្សាន្តកាន់តែច្រើនថែមទៀត ។
អភិបាលខេត្តបានជម្រុញដល់ប្រធានក្រុមការងារដោះស្រាយបញ្ហា នៃការសាងសង់ផ្សារសែនមនោរម្យ ត្រូវពន្លឿនការងារនេះឲ្យបានលឿនបំផុត ដើម្បីធ្វើយ៉ាងណាឲ្យប្រជាពលរដ្ឋក៏ដូចជាអាជីវករ បានរៀបចំសាងសង់ផ្ទះសម្បែង និងតូបសម្រាប់លក់ដូរនៅក្នុងផ្សារសែនមនោរម្យនេះឡើងវិញ និងត្រូវដោះស្រាយនូវប្រព័ន្ធលូ បណ្តាញទឹកស្អាត ភ្លើង ព្រមទាំងប៉ះពាល់អោយបានឆាប់រហ័ស ជាពិសេសត្រូវរៀបចំផ្លូវចូលផ្សារឲ្យបានធំទូលាយ ងាយស្រួលអាចឲ្យឡានទឹកបើកចេញចូលបាន ដើម្បីបង្ការក្រោយពេលមានបញ្ហាជាយថាហេតុណាមួយកើតឡើងទៀតនោះ ។
លោកក៏បានធ្វើការអំពាវនាវដល់ប្រជាពលរដ្ឋទាំងអស់ ដែលរងគ្រោះដោយសារភ្លើងឆេះផ្សារ មេត្តាចូលរួមសហការជាមួយមន្ត្រីជំនាញ និងអាជ្ញាធរ ដែលកំពុងអនុវត្តការងារ រៀបចំក្នុងផ្សារ ឲ្យមានភាពស៊ីសង្វាក់គ្នា ដើម្បីជៀសវាង កុំអោយមានការរាំងស្ទះណាមួយ ដល់ការអនុវត្តការងារសាងសង់ផ្សាររបស់មន្ត្រីជំនាញ ។
រីឯការសាងសង់សួនច្បារសែនមនោរម្យលោកអភិបាលខេត្តមានប្រសាសន៍បន្ថែមដែរថា រដ្ឋបាលសាលាខេត្តបានសហការជាមួយក្រសួងរៀបចំដែនដីនគរូបណីយកម្ម និងសំណង់ បានរៀបចំគម្រោងប្លង់ និងរចនាបទរួចរាល់ហើយ ព្រមទាំងបានប្រមូលផ្តុំគៀងគររកប្រភពធនធានសម្រាប់ទ្រទ្រង់ដល់ការសាងសង់សួនច្បារនេះឡើងផងដែរ ។
លោក ចឹង សុចន្ថា អភិបាលរងខេត្ត និងជាប្រធានក្រុមការងារដោះស្រាយបញ្ហាការឆេះផ្សារសែនមនោរម្យបានឲ្យដឹងថា បច្ចុប្បន្ននេះអាជ្ញាធរក្រុងបានសហការជាមួយក្រុមបច្ចេកទេស ខិតខំធ្វើការឈួសឆាយដី និងរៀបចំផ្លូវ ប្រព័ន្ធលូ បណ្តាញទឹកស្អាត ភ្លើង ព្រមទាំង រួសរើផ្ទះដែលប៉ះពាល់ដល់ការស្ថាបនា នឹងចូលរួមដោះស្រាយសំណងគោនយោបាយជូនប្រជាពលរដ្ឋដែលរងនូវផលប៉ះពាល់បានមួយចំនួនផងដែរ ៕
ចែករំលែកព័តមាននេះ