មន្ត្រីតុលាការមួយរូបនិយាយថា ស្ត្រីទីមួយហ្គាតេម៉ាឡា លោកស្រី Sandra Torres de Colom បានស្វះស្វែងរកការបញ្ចប់ចំណងអាពាហ៍ពិពាហ៍រយៈពេល៨ឆ្នាំមកហើយ របស់លោកស្រីដើម្បីឱ្យលោកស្រីអាចកាន់តំណែងប្រធានាធិបតីបន្តវេនពីស្វាមីរបស់លោកស្រី ។
តាមច្បាប់រដ្ឋធម្មនុញ្ញរបស់ប្រទេសហ្គាតេម៉ាឡា គឺហាមសមាជិកគ្រួសាររបស់ប្រធានាធិបតីមិនឱ្យឈរឈ្មោះសម្រាប់តំណែងប្រធានាធិបតីឡើយ ដូច្នេះទើបលោកស្រី Sandra Torres de Colom បានព្យាយាមលែងលះគ្នាជាមួយស្វាមីរបស់លោកស្រីដើម្បីអាចឈរឈ្មោះសម្រាប់តំណែងប្រធានាធិបតីបាន ។
អ្នកនាំពាក្យតុលាការ លោក Edwin Escobar ថ្លែងថា ដំណើរការលែងលះមួយចាប់ផ្តើមកាលពីថ្ងៃទី២១ មីនា កន្លងមក រវាងលោកស្រី Sandra Torres de Colom ជាមួយ លោក Alvaro Colom ដែលមិនអាចឈរឈ្មោះជាបេក្ខជនសម្រាប់ការបោះឆ្នោតប្រធានាធិបតីម្តងទៀតបាន ។
ប្រសិនបើភាគីទាំង២យល់ព្រមនេះការលែងលះគ្នានោះនឹងត្រូវចប់សព្វគ្រប់ក្នុងរយៈពេលមួយខែ។
លោកស្រី Torres ប្រកាសកាលពីថ្ងៃទី៨ មីនា កន្លងមក ថា លោកស្រីនឹងឈរឈ្មោះជាបេក្ខនារីសម្រាប់តំណែងប្រធានាធិបតីនៃគណបក្សបង្រួបបង្រួមជាតិកំពុងកាន់អំណាចសម្រាប់ការបោះឆ្នោតប្រធានាធិបតីដែលនឹងរៀបចំឡើងនៅខែកញ្ញាខាងមុខនេះ ៕
ចែករំលែកព័តមាននេះ